Rom Dãmba 8

Sɩɩga vɩɩm

1Bãng-y tɩ sẽn be-b ne a Zezi marsã wã ka le zoet bʋʋd paalgr ye. 2A Vʋʋsem Sõng noora n kõt vɩɩm a Zezi maasmẽ, la yẽ n fãag foom ne noor ninga sẽn wata ne yel-wẽnd la kũum. 3Wẽnd pidsa a Moyiiz Noora sẽn da ka tõe bũmb ningã, ninsaal komslma sẽn mong-a bũmb ningã, n tõog yel-wẽnde ne ninsaal yĩnga. Ad-y b tʋma b meng Biiga sẽn wa ne yĩng sẽn wẽnd tõnd dẽnna n yaool n tar pãng n menesd yel-wẽnde. 4Wẽnd maana rẽnna, tɩ d tõog n deeg Noorã, tõnd sẽn ka le vɩ wala d yĩnga sẽn datã, n vɩ wala a Vʋʋsem Sõng sẽn datã.

5Sɩda neb niyns fãa sẽn tũud-b yĩnga raab baooda sẽn noom b yĩngã la neb niyns sẽn tũud-ba a Vʋʋsem Sõng raab baooda sẽn noom a Vʋʋsem Sõngo. 6Bãng-y tɩ sẽn baood-a a yĩnga sẽn datã, baooda a kũum la sẽn baooda a Vʋʋsem Sõng sẽn datã, baooda a vɩɩm la laafi. 7Yĩnga sẽn data baoob sẽn pak b rãmbã, lebgda Wẽnnaam bɛɛba, n pa rat n le reeg Wẽnnaam noor ye; b pʋs n ka tõe meng ye. 8Yaa rẽ me yĩng la b ka tõe n ta Wẽnnaam yam ye. 9Yãmb ka le ya neb sẽn tũud b yĩnga yamleoog ye, y pʋgda a Vʋʋsem Sõngo sẽn date, tɩ Wẽnd meng kõ yãmb a Vʋʋsem Sõngo. Sẽn ka tar-a Krista Vʋʋsma, Krista ka so yẽ soab ye. 10La Krista sã n be ne yãmba, ba yel-wẽnd sã n da kɩt tɩ y yĩnga tog n ki, Vʋʋsma na n kõ-y-la vɩɩm, Wẽnd sẽn maneg d yell ne bãmba yĩnga. 11#1Ko 3,16. Wẽnd Vʋʋsem ninga sẽn vʋʋga a Zezi Krista kɩɩms sʋka, sã n be ne yãmbã, ad-y b sẽn vʋʋga a Zezi Krista kɩɩms sʋka, b na kõ y yĩn-kiidgã vɩɩm, b Vʋʋsma sẽn be ne yãmba yĩnga.

12M saam-biisi, pakr sã n beẽ me, kõn yɩ pakr bada tɩ d vɩɩnd wala d yĩnga sẽn data ye. 13Yãmb sã n vɩ wala y yĩnga sẽn date, y na n kiime. La y sẽn paam Vʋʋsem ninga sã n kɩt tɩ y lak ne yĩnga raabo, y na n vɩɩndame.

Wẽnd maag a Vʋʋsem Sõngo, d lebga Wẽnd kamba

14Wẽnnaam Vʋʋsma sẽn be ne b rãmb fãa lebga Wẽnnaam kamba. 15#Mk 14,36; Ga 4,6. Vʋʋsem ning y sẽn paama ka bũmb sẽn kɩt tɩ y lebg yem-daado n zĩ ne rabeem ye; y lebga Wẽnd zak kamba al n tõe n bool Wẽnd Aba, dat n yeelame tɩ Ba. 16A Vʋʋsem Sõng meng naaga tõnd n kõt kaset tɩ d lebga Wẽnnaam kamba. 17#Ga 4,5-7. La d sẽn ya Wẽnnaam kamba, d na paam pʋɩɩr ning b sẽn pʋlem b kamba; d na naag Krista n paam pʋɩɩr kãnga; d sẽn naag bãmb n namsã, d na naag bãmba n paam pẽgre.

Wẽnd pʋlma tõnd b ziiri

18M tagsdame tɩ zamaan kãnga namsgo ne rolb ninga sẽn na n yɩ tõnd dẽnd beoog raarã ka tõe n mak taab ye. 19Bõn-naandsa fãa zĩ n gũuda ne yãgbo, Wẽnd kamba pẽgr sẽn na n puk raare. 20#Bs 3,17-19. Ninsaal tʋls yaalsã sã n tiig n kẽes bõn-naandsa fãa yembd pʋgẽ, d bãng tɩ ka tũ ne bãmb daab ye, tũu ne ninsaalb tʋʋmde la bãmb me saagdame 21tɩ b yembdã sɛɛb bee raare, tɩ b yĩnga komsg sɛɛb bee raare, la b gũuda b sẽn na n paam soog-m-menga ne ziir ning Wẽnd sẽn kõt b kamba. 22D mii vẽenega tɩ al n ta marsã bõn-naandsa fãa waasda rogem waasgo; 23#2Ko 5,2-4. la ka bãmb bal ye, yaa tõnd me sẽn zoe n paam lɛng ninga a Vʋʋsem Sõng sẽn lemb tõndã; yaa tõnd fãa n naag n waasd d sũurẽ, n gũud d yĩnga fãagre. 24Tõnd fãagra yaa bũmb d sẽn tõe n saag. La fo sã n ne f sẽn saagda soaba, dẽ ka le ya saagr ye. Fo na n yɩɩ wãn n ne bũmb la f le yet tɩ f saagda a yãeebo? 25Saagr yaa fo sẽn ka ne bũmb ninga tɩ f kʋmb f yam n tar a gẽegre.

26A Vʋʋsem sõng me wata d sõngre, tɩ d ka mi d sẽn na n kos bũmb ning taki tɩ d pʋʋsg yɩ neer ye, la ad-y yĩnsir tara a Vʋʋsem Sõngo tɩ b yõkd sɛɛg d yĩnga la b wiisd wiis toogo. 27Bũmb-kõ-solg-m Wẽndã mi a Vʋʋsem Sõng sẽn dat d yĩnga la bãmb me sẽn yõkd sɛɛg Wẽnd kom-nongdsa yĩnga, zemsa ne Wẽnd meng raabo.

28D miime tɩ Wẽnd sẽn nong b rãmbã, Wẽnd sẽn welg b rãmb toorã ne b raabo, b sõngda bãmb tɩ b yɛla fãa welg neere. 29B sẽn welg b rãmb toor al pĩnd-pĩnda, b tʋlgame tɩ b rɩk b Biiga wẽnego la Biiga na n lebga kãsem sẽn tar yaop ka tɛka. 30B sẽn pʋlem b rãmb neera la b bool yã. B sẽn bool b rãmba yell la b maneg yã, b sẽn maneg b rãmb yell la b pids ne ziiri.

Wẽnd nonglma pẽgre

31Bõe la m na n le paas yɛsa? Wẽnd meng sẽn yaa d sõangdã d zabd-n-taag na n yɩɩ ãnna? 32Wẽnnaam ka zoe b Biiga nimbãaneg ye, b sakame t'a ki d yĩnga; b Biiga yĩnga, bõe la b ka na n kõ-d marsã? 33Wẽnd sẽn welg b rãmb toorã, ãnda n tõe n le kẽes-b bʋʋdo? Yaa Wẽnd n manegd ninsaal yelle. 34Woto wã tõe n le yɩ-la a Zezi Krista sẽn ki tõnd yĩnga, n vʋʋge la b zĩ b Ba rɩtg n pʋʋsd d yĩnga tõe n le yɩɩ bãmb n na n kẽes tõnd bʋʋd bɩ?

35Bõe n na n yiis tõnd a Zezi Krista nonglem pʋgẽ? Far bɩ, sũ-beed bɩ, namsg bɩ, kom la naong bɩ, bũmb sẽn tõe n yak yõor bɩ, sʋʋg bɩ? 36#Yɩ 44,23. Kõn le yɩ wa d sẽn karemd Sebr sõng pʋgẽ ye: Yaa yãmb yĩng la b tar tõnd n koot wa piisi wakat buud fãa, beoog sẽn vẽege. 37Baad-y t'a Zezi nonglem yĩnga, tõnd n maand daoodo.

38N-ye! M sũur kegmame tɩ bũmb ba a ye ka le tõe n zãag d ne Wẽnnaam nonglma, a Zezi Krista sẽn wa ne a soaba ye. Kõn yɩ kũum bɩ vɩɩm ye, kõn yɩ malɛk bɩ dũni soaal ye, 39kõn yɩ rũnna bɩ beoog bũmb ye, kõn yɩ sẽn be sa-gãnẽ bɩ sẽn sud tẽng ye, kõn yɩ naand buud ba a ye.

Currently Selected:

Rom Dãmba 8: SSDC98

Highlight

Copy

Compare