A Matiye Sõng 26

NAMSGO LA VƲƲGR YƐLA

A Zezi namsgo

(Mk 14,1-2; Zã 11,47-49)

1A Zezi sẽn gom woto n sɛ la b sẽn yeel b karen-biisã: 2#Ey 12,1-27. «Y miime tɩ pak keta rasem a yiibu, la b na n yõka Ned Biiga n kɩs tɩ b ka-b pika.»

3Maan-kʋʋdba kãsem dãmba la tẽnga nin-kẽemba tigma taaba maan-kʋʋd kãseng a Kaif zakẽ. 4B yẽsa ne taaba sɩlem ning b sẽn na n sɩlem n paam n yõk a Zezi n kʋ. 5B yalsa woto: «Ka tog tɩ yɩ kibsa pʋgẽ ye tɩ tẽnga na n wa naag n wulumdame.»

Betani pag zɛɛda a Zezi kaam

6A Zezi da bee Betani, wãoor a Simo zakẽ. 7#Lk 7,37-38. La pag n kolg-b ne a yubla, kug peesem yubl neere; yaa kaam sẽn tar yũ-noog wʋsgo la sẽn koosd toogo n da be a pʋgẽ. Paga sudga kaama a Zezi zug. Wakat kãng tɩ b ra rɩtame. 8Karen-biisa yãee rẽ n puug b sũuri n yetẽ: «Yaa bõe tɩ b sãamd bõn-sõng a woto? 9B ra tõe n koosa kaama n paam ligd wʋsgo n kõ naong rãmba.» 10A Zezi wʋmame n yeel-ba: «Bõe tɩ y maan mo-beed ne pʋg kãngã? Yaa tʋʋmd sõng la a tʋm mam yĩnga. 11#Yao 15,11. Y na kell n yãe naong rãmb y sʋka la mam ka na n kell n pa y sʋk ye. 12Paga sẽn daag yũ-noogã m zugã, yaa mam mumb la a sɩɩl n wilgi. 13Sɩd-sɩda m yet-y lame tɩ zĩig ning fãa kibar kãnga sẽn na n taẽ, dũni wã fãa pʋgẽ, b na tẽeg n gom n pẽg paga sẽn maam marsã wã.»

A Zɩɩda zãmbgo

14Yaa wakat kãng la Tʋʋm-tʋmdb piig la a yiiba nin-yend sẽn boond t'a Zɩɩda, Iskariyot tẽng neda, kẽng maan-kʋʋdba kãsem-dãmb nengẽ n tɩ yeel-ba: 15#Zki 11,12. «Bõe la y na n kõ-m tɩ m yõk-ba n kõ yãmba?» B kõ-a-la wakɩ koeems pistã.#26,15 Wakɩ koeems pistã: Zemsa tʋʋm-tʋmd kiuug yaoodo. 16Dẽ tɛka a sɩng n baooda a sẽn na n bẽd bũmb ning n yõk-b n kɩse.

Pak rɩɩb seglgo

17Bur sẽn ka le ningd bɩlla pipi raare, la karen-biisa waa n sok a Zezi: «Y ratame tɩ d segl pak rɩɩb yɛɛlẽ?» 18B leokame: «Kẽng-y tẽnga pʋgẽ, a Zagl nengẽ n yeel-a: ‹Zagla, Soaala tɩ d wilg-fu: Mam wakat taame, la yaa fo zakẽ la m na dɩ pak rɩɩbo ne m karen-biisã.› » 19Karen-biisa kẽngame n maan wa a Zezi sẽn yeele la b segla pakã.

A Zɩɩda zãmbo

20Zaabr taame tɩ b kẽ ne b Tʋʋm-tʋmdbã n na n dɩ. 21Rɩɩba wakato b yeelame: «Sɩd la m togsda, yãmb nin-yend n na n yõk maam n kõ m bɛɛba.» 22Sũ-sãang bondga b Tʋʋm-tʋmdba yam tɩ b na n sok, a yeyn-ye: «Soaala, na n yɩɩ maam bɩ?»

23 # Yɩ 41,10. Tɩ b leoke: «Sẽn naagd-a maam n tʋmd laagẽ wã, yaa yẽ n na n zãmb-ma! 24Ned Biiga lebre na n yɩɩ wa b sẽn gʋlse la yell na pak ned ning sẽn na n zãmba wã. A sẽn ka waẽ moogo n sãoẽ a yĩnga!»

25Sẽn waa n ta a Zɩɩda, ned ning sẽn na n yõk-b n kɩs bɛɛbã, yẽ me sokame: «Wat n yɩɩ maam bɩ, Soaala?» La a Zezi leok-a lame: «Fo togs n sɛɛme.»

Tẽegr Kũun kãsenga

26B sẽn waa n dɩtẽ, a Zezi rɩka buri, n pʋʋs bark pʋʋsgo, n wes burã n kõ b Tʋʋm-tʋmdbã n yetẽ: «Deeg-y n dɩɩ-y, woto yaa mam yĩnga.» 27Dẽ poore yaa laog neer la b rɩk yã la b sẽn pʋʋs barka, b kɩs-a-la b Tʋʋm-tʋmdbã n yetẽ: 28#Ey 24,8; Zr 31,31-34. «Yũ-y, yãmb fãa, tɩ woto yaa m zooda zɩɩm, zood sẽn yõg ne zɩɩma m sẽn daag neb fãa yĩnga, b yel-wẽna sugr yĩnga. 29La sɩd wa m sẽn yetã, m kõn leb n yũ bugsuntung sõng biis rãam n tãag raar ning m sẽn lebd n wa yũ a rã-paalgã ne yãmba, m Ba Rĩunga pʋgẽ.»

A Piyɛr kɩɩsg wilgri

30B sẽn yɩɩl n sɛ, b rɩka Oliviye tãng sore. 31#Zki 13,7. A Zezi yeel-b lame: «Yʋnga bala m na n yɩɩ kugr ninga y fãa sẽn na n lak n lʋɩ. B gʋlsame: ‹M na n wẽe pe-kɩɩma la piisa fãa na n sẽegame.› 32#Mt 28,16. La m vʋʋgr poore, m na reng-y Galile tẽnga.»

33A Piyɛr yeelame: «Ba b fãa gill sã n na n lak yãmb wa kugr n lʋɩ, kõn yɩ maam ye.» 34T'a Zezi na n leok-a: «Sɩd wa m sẽn yetã, yʋnga bala, no-raoog sẽn wat n nan ka kelem dẽ tɩ f yeela naoor a tã tɩ f ka mi maam ye.» 35T'a Piyɛr na n leoke: «Ba m na naag yãmb n ki, m kõn yeel tɩ m ka mi-y ye.» Taaba fãa me yeela boto.

A Zezi pʋʋsgo Zɛtsemani

36B waa n taa zĩig a ye sẽn boond tɩ Zɛtsemani t'a Zezi yeel b karen-biisã: «Yaas-y ka tɩ m ta taoor n pʋʋs.» 37B boola a Piyɛr la a Zebede kamb a yiibã. Wakat kãnga sũ-sãang la yĩnsirg yõk-b lame, 38tɩ b yeele: «Sũ-sãang n na n kʋ-ma, yaas-y ka n pak-ma.» 39B sẽn zãag bilfu, b lʋɩɩ b yãnvabga n sɩng pʋʋsg woto: «M Ba, sã n tõe, bɩ y kɩt tɩ tooga zãag ne maam. La ade, ka mam daab n so taoor ye, yaa yãmb dẽnna.» 40B sẽn leb b karen-biisa nengẽ, b mikame tɩ b gõe, tɩ b yeel a Piyɛr: «Woto yãmb pa tõog n pak maam wakat yɛng menga? 41Bas-y gõeem la y pʋʋs n da lʋɩ ye tɩ ninsaal sũur data la a pãng paooda.» 42B le zãagame yɛsa n na n pʋʋse: «M Ba, tooga sã n ka tõe n zãag tɩ m pa yũ-a bɩ yɩ wa y sẽn date.» 43B le lɛɛg n waame n le mik tɩ karen-biisa gõe: b nina ra zɩsga ne gõeem. 44B bas-b lame n le zãag n na n pʋʋs, naoor a tãab soaba, wala b sẽn da zoe n pʋʋse. 45Dẽ poore b lɛɛgame n wa yeel-ba: «Y tõe n gũsame marsã, n vʋʋse. Ned Biiga sẽn na n lʋɩ yel-wẽn-maandba nusẽ wakat taame. 46Yik-y tɩ d looge tɩ sẽn na n kɩta tɩ b yõk maama waame bala!»

A Zezi yõkre

47A Zezi ka paam n gom n sɛ ye, t'a Zɩɩda, Tʋʋm-tʋmdb piig la a yiiba nin-yende, wẽneg n poog ne neb ka tɛka sẽn zãad sʋʋs la rasaba; yaa maan-kʋʋdba kãsem-dãmb la tẽnga nin-kẽembã n da yiis-b. 48Zãmbda ra kõ-b-la makr kãngã: «M sẽn na n mobg a soab wala m zoa wã, yaa yẽnda, yõk-y yẽe.» 49A sɩd kolga a Zezi n yetẽ: «Soaala, m pʋʋsda!» La a mobg-b lame, 50t'a Zezi yeel-a: «M zoa, maan f tʋʋmde.» Tɩ neba na n kolg marsã n yõk-ba. 51A Zezi tũud-n-taasa nin-yend taka a sʋʋg n wõog, la a kɛɛ maan-kʋʋd kãsma sõgen a ye tʋbre n fiuug. 52T'a Zezi na n yeel-a: «Lebs f sʋʋga a wʋʋgẽ tɩ sẽn zãada sʋʋg fãa, sʋʋg n kʋʋd-a. 53F tẽedame tɩ m ka tõe n yõk m Ba sɛɛga, tɩ b ko maam mars-marsã bala, malɛk rãmb sẽn taẽ tus kobs-yopoe la a yi? 54La sẽn gʋls tɩ kall tɩ yɩ boto wã maandẽ-la a wãn n taase?»

55 # Lk 19,47; 21,37. B lɛɛg n goma ne zãma wã: «Mam yaa so-gɩt laa, tɩ y yi ne sʋʋs la rasaba n na n yõk ma? Beoog sẽn vẽeg fãa m da zĩi wẽnd doogẽ n zãmsd-y la y ka yõk-m ye. 56Yɩɩ woto tɩ sẽn gʋls Sebr pʋgẽ tõog n pidsi.» Wakat kãnga karen-biisa fãa bas-b lame n zoe.

A Zezi tata a Kayif taoore

57Sẽn yõk-ba a Zezi wã tall-b lame n kẽng maan-kʋʋd kãseng a Kayif nengẽ; be, Sɛb-mitba la nin-kẽembã waa n tigma taaba. 58A Piyɛr da pʋgda yɩɩg-yɩɩga n wa ta maan-kʋʋd kãsenga yiri; a tol n kẽe pʋgẽ n zĩnd ne sõgen-kambã n na n ges yella sẽn na n baas to-to.

59Bãng-y tɩ maan-kʋʋdba kãsem-dãmb ne bʋʋda rãmba da baooda rõadga n na n dõd a Zezi n paam n kʋ-ba la ra ka naana ye. 60Sẽn wa-ba yaool n yɩɩ wʋsgo. Baasgo neb a yiibu n ta 61#Zã 2,19. n togs woto: «Nin-kãnga yeelame: ‹M tõeeme n wã wẽnd doogã n lebs n me-a ra-yɩten-daare.› » 62Maan-kʋʋd kãsenga yikame n yeel a Zezi: «Fo ka leokd tɩ bũmbu, bõe la b yet tɩ foo n maane?» 63T'a Zezi sĩnd b noore. Maan-kʋʋd kãsenga yeel-b lame: «M kot-f lame tɩ f togs-do sã n yaa foom la Krista, Wẽnnaam Biigã.» 64#Dn 7,13. A Zezi leok-a lame: «F togs n sɛɛme, la m yet-y lame tɩ y na n yãee Ned Biiga t'a zĩ Wẽnnaam pãng soab rɩtgo, n zao sawadgo n sigd tẽnga.» 65Maan-kʋʋd kãsenga kẽesa a fut n yetẽ: «A tʋʋsa Wẽnde, d le baooda kaset dãmb n na n maan bõe? Yãmb sẽ n ka wʋme, a tʋʋsa Wẽnde. 66#Man 24,16. Y yetame tɩ bõe?» B naaga taab n leoke: «A toga ne kũum.»

67 # Iz 50,6. B sɩngame n tʋbsd b neng kolkoodo la b pãbd-b pegse; kẽer da soosd n pãbd-b lame la b yetẽ: 68«Bãng wɛ, Wẽnd Nedã, ãnda n wẽ foom?»

A Piyɛr kɩɩsgo

69A Piyɛr da zĩi zakẽ tɩ yem-poak a ye kolg n sok-a: «Foo, fo ra ka be ne Galile Zezi wã?» 70A Piyɛr kɩɩsa neba fãa taoore n yetẽ: «Ad mam ka mi fo sẽn dat n yeel tɩ bũmb ning ye.» 71A Piyɛr sẽn serge n lebd dignoorẽ, la yem-poak a to sẽn yãe-a n yeel neb a taaba: «Ad-y nin-kãnga ra bee ne a Zezi, Nazarɛt Raoã.» 72La a Piyɛr le kɩɩsame la a wẽnnẽ: «Mam pa mi nin-kãnga ye.» 73Sẽn yɩ bilfu, zaka noor dãmb kolga a Piyɛr n yeel-a: «Kɩɩsg ka ye, fo ra tũud-a lame, fo goama bal n lukd f bãongo.» 74T'a Piyɛr tar kɩɩsgo la wẽenego: «Mam ka mi nin-kãnga ye.» La no-raoog wẽneg n kelmame. 75A Piyɛr tẽega Krista sẽn da yeelã: «Noaag ne a na n kelem tɩ f yeela naoor a tã tɩ f ka mi maam ye.» La a yiime la a kiigd nintãm.

Currently Selected:

A Matiye Sõng 26: SSDC98

Highlight

Copy

Compare