A Matiye Sõng 15

No-koɛɛm ne Farizẽ rãmba

1Zerizalɛɛm Farizẽ rãmbã la sẽn karen-ba-n-sikã kolga a Zezi n sok-ba: 2«Bõe yĩng la yãmb karen-biisa sãamd yaab rãmba dog-n-miki? Bãmb pa rengd n pek b nus n yaool n sɩng rɩɩb ye.» 3Dẽ la a Zezi leok-ba: «Bõe tɩ yãmb me tõdgd Wẽnnaam noor ne y rog-n-miki? 4#Ey 20,12; 21,17; Yao 5,16; Man 20,9. Ade, Wẽnd yeelame: ‹Waoog f ba la f ma, la ned ninga sẽn kãabd a ba bɩ a ma wẽnga, bɩ b kʋ a soaba.› 5Yãmb nengẽ lebga ned ning fãa sẽn na n yeel a ba bɩ a ma: ‹Ade, bũmb ning m sẽn da tog n dɩk n sõng foo wã, m dɩkd-a lame n kõt Wẽnde.› 6Woto ba la ma zãab taal wẽneg n doka y zugu. Y pa ne tɩ yãmb dog-n-mik kãng kɩtame tɩ Wẽnd gomd lebg zaalem? 7Pʋlik rãmba! A Izayi n bãng y yelle a sẽn waa n togse:

8‹Nin bãmba waoogda maam ne noore,

la b sũur zãra ne maam.

9 # Iz 29,13. M geta b waoogr wa zaalem;

la zãmsg ning b sẽn zãmsd neb a taaba

yaa ninsaal dẽnd bala.› »

Bũmb ning sẽn dẽgemd ninsaala

10B kɩtame tɩ neba kolge tɩ b yeele: «Kelg-y la y wʋm neere! 11Ka sẽn kẽed ninsaal noorẽ, n dẽgemd ninsaal ye, yaa sẽn yit a noorẽ.»

12Dẽ la karen-biisa kolg n yeel-ba: «Yãmb miime tɩ y sẽn gom woto wã, Farizẽ rãmba yeelame tɩ y gomda gom-yood bɩ?» 13Tɩ b yeele: «Tɩɩg ning m yĩngr Ba wã sẽn ka sele, na n võogame. 14#Lk 6,39. Bas-y-ba tɩ yaa zoeens sẽn tat b zoen-taase! La bãng-y tɩ zoang sã n tat a zon-taaga, b fãa na n naaga taab bokẽ.»

15A Piyɛr goma woto: «Wilg-y tõnd y yelbũnda võore.» 16T'a Zezi yeele: «Yãmb yama ket n ka puk ba bilfu la? 17Y ka mi tɩ sẽn kẽed noorẽ tata pʋgẽ n sãag n yi we-kɛɛng bɩ? 18#Mt 12,34. Sẽn yit noorẽ yita sũurẽ la sẽn yit sũurẽ n dẽgemd ninsaala. 19Yaa sũurẽ la tʋls wẽns yita, n paas nin-kʋʋr, yoobo, yoob nonglem, wagdem, kaset-zirẽ, taab yʋʋr sãoongo. 20Yaa yell kãens n dẽgemd ninsaala. La ka pek nus n yaool n sɩng rɩɩbo, ka tõe n dẽgem ninsaal ye.»

Kanaã pag bi-pugl sãoogre

21A Zezi sẽn yi be, b kẽnga Tir la Sidõ baobgo. 22La ade, Kanaã pag n da yi a tẽngẽ n wa yɛs n moonẽ: «Zoe-y m nimbãaneg wɛ, Soaala, Daviid biiga! Ad-y Sʋtãan n tar m biiga n yaannẽ.» 23A Zezi pa leok-a tɩ bũmb ye. Karen-biisa yẽ kolgame n yeel-ba: «Deeg-y yã a kosg t'a wekda d tʋba.» 24T'a Zezi leoke: «B tʋma maam Israyɛl pe-yãansa yĩng bala.» 25Dẽ tɩ paga taame n wõgemd b taoore n yetẽ: «Soaala, wa-y n sõng-y-ma!» 26Tɩ b leok-a: «Pa tog tɩ b rɩk zaka kamb dɩɩbo n kõ ba-bi ye.» Paga zĩnda tẽngr n yeele: 27«Yaa sɩda, la baasg fãa ba-bi tõe n dɩgsa zeremsã b zu-soaba sẽn basd tɩ rʋʋgd tẽngã.» 28T'a Zezi na n yeel marsã: «Paga, f tẽeb labsa, bɩ yɩ wa f sẽn date.» La wakat kãng bala a bi-pugla paama laafi.

Wẽnd makr dãmb a taaba

29A Zezi yii be n leb Galile mogr noore. B rʋʋ tãng zug n zĩndi. 30Neb wʋsg babs-b lame ne wobse, ne zoeense, ne mugs la koms rãmb buud a taaba, n dɩgl-ba a Zezi taoore la a Zezi sãoog-b lame. 31Neba wẽe siri b sẽn wʋm tɩ mugs gomda la b ne koms rãmba sẽn paam pãnga, tɩ wobs kẽnd tɩrga tɩ zoeens neẽ la neba pẽga Israyɛl Wẽnnaam.

Bur fɩɩr a yiib soaba

32A Zezi boola b karen-biisã n yeel-ba: «Nin-bãmba nimbãaneg tar-m lame, yaa rasem a tãab rũnna la b ka serg mam taoore la b pa tar sẽn na n dɩ ye. M pa rat n kuls-b ne kom ye; kẽer wat n lʋɩɩ sorẽ.» 33Tɩ karen-biisa na n yeele: «La we-raoogẽ ka, d yãeta bur yɛ n kõ zãma a woto t'a rɩ n tɩge?» 34La b sokame: «Bur a wãn la y tara?» Tɩ b leok tɩ yaa bur a yopoe la kʋɩl-zẽ-bõoneg bilf bala. 35A Zezi kõo neba noor tɩ b zĩnd tẽnga. 36B rɩka bur a yopoe wã la kʋɩl-zẽedã, n maan pʋʋsgo, n wes-ba, n dɩk n kɩs tɩ b pʋɩ nebã. 37B fãa rɩɩme n tɩge la b wʋka gɩrsa sẽn kellã n pid pet a yopoe. 38Bãng-y tɩ sẽn dɩ-ba yɩɩ tus a naase, pagb la kamb toog sẽn ka ye. 39A Zezi kulsa nebã n yaool n kẽ koom koglg n wa Magadan tẽnga.

Currently Selected:

A Matiye Sõng 15: SSDC98

Highlight

Copy

Compare