Galat Rãmba 4
4
Tõnd yaa Wẽnnaam kamba
1M gomda võor la woto: ku-bi-kẽeng sã n ket n ya yãaga, ad-y ne a sẽn so a ba laoga fãa, bũmb ka welg-a nanda ne yamb ye. 2A tara gũuda la koagenda, n tãag a ba sẽn yals wakat ningã. 3Tõnd me, d sẽn da waa n ya yãase d da yaa yem-daado, zamaana pãn-dãmba yem-daado. 4La wakat sẽn waa n ta, Wẽnd tʋma b Biiga sẽn yɩ pag biiga la noora rɛɛgda, 5sẽn na n yɩlẽ n tõog n fãag noora yemse, la a kɩt tɩ d lebg Wẽnd kom-wubdsi. 6La kaset ning y sẽn tare n mi tɩ y lebga Wẽnd kamba, yaa Wẽnd sẽn ning yãmb sũurẽ bãmb Biiga Vʋʋsem sẽn tãsde: Aba! (M Ba!) 7#Rm 8,15-17. Woto fo ka le ya yem-daoog ye, f yaa zak biiga, la f sẽn lebg Wẽnd biiga, f lebga Wẽnd yõod dɩta.
8Pĩnda, y sẽn waa n nan ka mi Wẽnnaama, yaa bõn-yaals sẽn ka wẽnde la yãmb da nok yã wala y wẽnde. 9Marsã, yãmb sẽn bãng-ba, yɩɩd rẽ, bãmb sẽn bãng yãmbã, yãmb na n maana a wãn n leb y bõn-yaalsa nengẽ n tɩ soond bãmb wala pĩndã? 10Yãmb ket n sõta dasma, kiisi, zĩ likri ne yʋʋma! 11Ad-y y maandame tɩ m zoet-m na n wa nams zaalem bal y yĩnga.
A Pol le tẽegda yɛl kẽere
12M saam-biisi, m yõkda y sɛɛga, modg-y n wẽneg maam tɩ m maoome n na n wẽneg yãmba. Da tẽ-y tɩ y beeg-m lame ye. 13Y mi tɩ bãag n wa ne m ka tɩ m paam n sɩng Koe-nooga mooneg y sʋka. 14La ne m bãaga sẽn kɩt tɩ m lebg y zɩɩbo, y pa paoog-m ye, y pa sãbs-m ye; y kell n deega maam wala Wẽnd malɛka, wala Krista a Zezi menga. 15Yãmb zoe n yĩma y sẽn da kilsd maam ne sũ-noog ninga laa? M meng tõe n kõo kaseto tɩ wakat kãnga, y sã n da tõee lame, y na kɩɩdẽ y nin-bɛɛl n kõ-ma. 16La marsã m sẽn togs yãmb sɩda la m lebg y bɛya? 17Neb kẽer zooda ne yãmb ka segd ye. B ratame bal n welg yãmb ne maam tɩ yãmb tabend bãmba. 18Tʋlg-y neer maanego tɩ yaa sõmbo, la togame tɩ yɩ daar fãa, la ra yɩ m sẽn pẽ yãmba wakat bal ye. 19M kom-bõonego, m sẽn le rogd ne waasgo, ad-y na n kell n yɩɩ boto n tãag y sẽn wat n dɩk Krista wẽnego. 20M da paam n pẽẽ yãmba m na modgẽ tɩ d wʋm taaba tɩ marsã wã m ka mi m sẽn na m gom to-to ne y ye.
Zooda buud ya a yiibu
21Aya! Yãmb sẽn yet tɩ y yaa Noora tũudbã, y tẽra sẽn togs noora sebrẽ bɩ? 22#Bs 16,15; 21,2. Ad-y gʋlsame t'a Abraam doga kamb a yiibu: a ye yaa yem-poak biiga t'a to wã ya tom pag biiga. 23Pʋg rɩkra biig doga wa kamb a taaba; tom paga biig rogma tũu ne kãabgo. 24Ad-y yaa yelbũndi: pagb a yiiba makda zood buud a yiibu. Pipi zooda yõga Sinayi tãng zugu; zood kãng kamb yaa yem-daado, la b ma la a Agar. 25(Sinayi tãnga bee Arabi soolmẽ) Yẽ makda dũnna Zerizalɛɛma, yẽ me yaa yem-poaka la a kamba me yaa yemse. 26Zerizalɛɛm a to wã, sẽn yita Wẽnnaam nengẽ soaba, yẽ la tom paga la yẽ la tõnd ma. 27#Iz 54,1. Yaa woto la b gʋlsyã: «Bɩ f kɩdem, pʋg-kiiri sẽn pa rogde, kils sõmbo la f lang ne sũ-noogo fo sẽn zɩ n bãng rogem toogo; ad pʋg-beooga kamba sõor yɩɩda rʋmda rẽnna.» 28M saam-biisi, bɩ y baad tɩ yãmb la zooda kamba wala a Izaak. 29#Bs 21,9. Biig ninga sẽn doga wa kamb a taabã da namsda biig ning rogem sẽn tũ ne kãabgã. Boto me n ket n maand marsã. 30#Bs 21,10. Yaa bõe la Sebr sõng togsda?
«Bɩ f rig yem-poaka ne a biigã
tɩ yem-poaka biig ka tog n naag tom paga biiga,
a ba raboogẽ ye.»
31Bɩ d bãnge, m saam-biisi, tɩ tõnd ka yem-poaka kamba, d yaa tom paga kamba.
Currently Selected:
Galat Rãmba 4: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.
