Galat Rãmba 3

Tẽeb bal n wat ne sõmblem

1Galat rãmb sẽn ka tar yam, ãnd n lebg y zutu. B wilga yãmb neere, Krista sẽn lebg bũmb ning pika zugu. 2Sokr bala a ye la m na n sok yãmba: Yaa yãmb sẽn sak noora yĩng la y paam Wẽnd Vʋʋsem, bɩ yaa y sẽn tẽ Koe-nooga? 3Yama paoog-y la sẽn ta woto fãa tɩ yãmb sɩng ne Wẽnd Vʋʋsem n na n baas ne y toorẽ pãnga? 4Na n yɩɩ zaalem yĩng la y reeg kũuna woto fãa? Ad-y rẽ fãa na n sɩd yɩɩ zaalem bala! 5Sẽn kõt-a yãmb a Vʋʋsem Sõng la a tʋmd tʋʋm bãna yãmb sʋka, a maanda rẽ y sẽn sakd noora yĩnga, bɩ yaa y sẽn deeg Koe-noogã?

Noora la tẽeba yelle

6 # Bs 15,6; Rm 4,3. Y mi t'a Abraam tẽe Wẽnde tɩ Wẽnd maaneg a yelle. 7#Rm 4,16. Bɩ y bãng tɩ neb niyns sẽn teeg-b tẽeb, yaa bãmb la a Abraam kamba. 8#Bs 12,3. Sebr sõng sẽn pĩnd n mi tɩ Wẽnd na n tũu tẽeb n fãag bu-zẽmbã, b pĩnd n togsa a Abraam kiba-noog kãngã: «Yaa fo maasmẽ la Adem biis na n paam barka.» 9Dẽ n kɩt tɩ neb niyns fãa sẽn teeg-b tẽebo na n tũu tẽeba ba, a Abraam, n paam barka.

10 # Yao 27,26. Neb niyns fãa sẽn yet-b tɩ yaa Noora bal la b tũuda, yaa kãab wẽng la b kãab bãmba, tɩ b gʋlsa woto: «Wẽnd na sãam ned ning fãa sẽn ka modga n deeg la a tũ sẽn gʋls fãa sebr sõng pʋgẽ.» 11#Ab 2,4. — Ad-y yaa vẽenega tɩ noora tũudem ka tõe n maneg ned yelle tɩ nin-sõng teeg-a a tẽebo n na n vɩɩnde. 12#Man 18,5. Ka tẽebẽ wã la Noora yit ye la paka ninsaal t'a reeg sẽn be a pʋgẽ wã fãa n yaool n paam vɩɩm. 13#Yao 21,23. Krista sakame tɩ Noora kãab wẽnga leb bãmba, n kõ-d tɩlgre. Bãmb meng sak n yɩɩ ka bark soaba d fãa yĩnga; tɩ b gʋlsa woto: «Ka bark soab la sẽn yagla pika.» 14La yɩɩ woto la a Abraam kãab nooga leb bu-zẽmbã; d sẽn paam tẽebã, d paama b sẽn da kãab tõnd a soabã: a Vʋʋsem Sõngo.

Noora ka sãam kãabga ye

15M saam-biisi, m na n kõ-y la ninsaal makre: Raboog welgr sebr sã n gʋls n sɛ, b pa le tõe n yẽes bũmb ye, b pa le tõe n paas bũmb ye, ba gʋlsga sẽn yaa ninsaal n gʋlsã. 16#Bs 12,7. Ad-y yaa Abraam ne a buudu la kãabga kãab yã. Sebr sõng pa yeel: a Abraam ne a buud kamb ye, wala yaa kʋʋng yell la b da rat n gom ye; goma nin-yend yelle, buuda nin-yende: Krista. 17#Ey 12,40. M sẽn dat n wilg-y bũmb ninga la woto: Wẽnd da yalsa kãabga yɛl fãa b zĩigẽ, woto noora sẽn wa yʋʋm kobs-naas la pistã kãabga poore, a ka tõe n woog a pãnga t'a lebg fãoog ye. 18#Rm 4,14. Sã n tũuda ne raboog welgr noy la ku-biig dɩt faado, yaa noor la tũuda, pa tũud kãabga ye. Mik a Abraam barka ka yi zĩig a to tɩ ka Wẽnd kãabga pʋgẽ ye.

Noora yõod la bʋgo?

19Noora bee bõe yĩnga? A wa n paasame bala n na n wilg tɩ ninsaal mii kɩɩsgo. Noora ra kõome n gũud a Abraam yagenga waoongo tɩ yaa yẽnda la kãabga kãabyã. Noora yalsa ne malɛk rãmb toagsg la ne nin-yend sẽn lʋɩ sʋka. 20Sã n ya kãabgã, Wẽnd yɩla b ye n kãabe, ned a to ka lʋɩ sʋk ye. 21Noya sãama Wẽnnaam kãabg bɩ bõe? Abada! Tõnd sã n da paamẽ la noor sẽn tõe n kõ vɩɩm la d tõogdẽ n yeel tɩ noor deegr n wat ne manegre. 22Sebr sõng paalga bũmba fãa yel-wẽnd soolmẽ, sẽn na yɩlẽ t'a Zezi Krista tẽedbã dɩ kãabga yõodo.

Tẽeb waoong poore

23Tẽeb sẽn da waa n kaẽ, yaa wa b da rɩka tõnd n gũnug ne noya n gẽegd tẽebã waoongo. 24Dẽ la Noor yɩ karen-saamba n tãag Krista sẽn waa n kɩt tɩ tẽeba wa ne yell manegrã. 25La tẽeb sẽn wa, tõnd ka le baood karen-saamb yɛs ye. 26Yãmb fãa sẽn kẽ Krista a Zezi wã, y lebga Wẽnnaam kamba. 27Yãmb fãa sɩd tũu Krista n so soobo la y yeelg bãmb wa fuugu. 28Tɩ m yaa Zʋɩf bɩ Grɛk, yamba bɩ burkĩna, pag bɩ raoa: rẽ ka le be ye; yãmb fãa lebga bũmb a ye a Zezi Krista pʋgẽ. 29#Rm 4,13. Y sẽn tabend Krista bala, yãmb lebga a Abraam yagense, yãmb bal n so kãabgã.

Currently Selected:

Galat Rãmba 3: SSDC98

Highlight

Copy

Compare