Daniyɛl 6
6
1Mɛd dao a Dariyus n deeg naam, la rẽ t'a zoe n tara yʋʋm pisoob la a yiibu.
B gãnegda a Daniyɛl bẽdgo
2Zemsa a Dariyus daabo t'a bao kug-zĩidb koabg la pisi, a soolma zãab yĩnga, neb sẽn dɩt naama a zĩigẽ, a soolma tẽnsẽ. 3Neb a tãab me la a yãk yã, la a Daniyɛl da bee sʋka tɩ kug-zĩidba da wat n wilgd bãmba bũmb ning sẽn be fãa. La woto b kõn zĩnd b tẽnsẽ wã n tak beed dĩma zug ye. 4A Daniyɛl yam kãsenga yĩnga dĩma yãk-a lame t'a na n yɩ neb a tãaba nin-yende. A yiiba yam da pa kolg-a ye. Dĩma me yãeeme t'a Daniyɛl da tara yẽesem wʋsgo t'a wa tʋlg n paas a naam a soolma gesg pʋgẽ. 5Dẽ me yĩnga kug-zĩidba la taoor dãmba yikame n na n bao yell n dogl a Daniyɛl zugu tɩ dĩma raab da tõog n pids ye. B pa tõog n yãe fɩ t'a Daniyɛl ra tʋmda ne gũusgu, la wɩdg ra ka be a zug ye. 6Dẽ la b yeel b mense. D ka yãe fɩ a Daniyɛl tʋʋmda sẽn kedb zĩig ning ye la wa-y tɩ d bao bũmb a Wẽnda tũudmẽ. 7Taoor dãmb a yiibã la kug-zĩidba sɩd bʋʋga dĩma n yeel-a: «Dĩm a Dariyus, Wẽnd na kogl y yõore! 8Y soolma taoor dãmba, a kug-zĩidba, a kombɛɛmba, a bʋ-kaoodba la sẽn paam b kãseng buud fãa, d fãa gesame tɩ segda wʋsgo tɩ y yiis noore n wilg woto. B sẽn yãend ned ning fãa, ka ne rasem pis-tã pʋgẽ, t'a pʋʋsd wẽnd bɩ ninsaal a to, sã n ka yãmba, dĩm sõngo, bɩ b lob-a bõnyẽes loangẽ. 9Dĩm sõngo, paas-y noorã toolem n tik sebrã ne yãmb meng nugu, tɩ bũmb da wa tõog n tek be ye, wala Mɛd la Pɛrs rãmb noor sẽn dat to-to: sẽn yals ka le tõe n teem ye.» 10La woto wã dĩma a Dariyus sɩd tɩka sebrã.
A Daniyɛl pʋʋsgo
11A Daniyɛl bãngame tɩ noora sẽn yi wã ka le be sugr ye t'a leb a yiri. Yĩngr dooga ra wurga vẽya n tees Zerizalɛɛm, la naoor a tã, daar a ye pʋgẽ, a yĩgimdedame n pʋʋse la a wilgd Wẽnd a tẽebo. Yaa woto la a ra sɩng n maanẽ. 12Taoor dãmba tigma taaba n wa a Daniyɛl nengẽ la b mikame t'a pʋʋsda la a bõsd Wẽnde. 13B lɛɛg n bʋʋga dĩma n yeel-a: «Ka yãmb meng nug n tik sebr ninga sẽn wilgd tɩ b sẽn yãend ned ning fãa, ka ne rasem pis-tã, t'a pʋʋsd wẽnd bɩ ninsaala, sã n ka yãmba, bɩ b lob a soab bõnyẽes loaangẽ bi?» Tɩ dĩma leok tɩ noora kõo wala Mɛd la Pɛrs rãmb dog-n-mik sẽn date, la a ka tõe n ka yals ye. 14Tɩ b na n yeel dĩma: «A Daniyɛl, b sẽn wʋk b rãmb Zɩɩda n wa ka wã nin-yende, toog ka be ne yãmba, dĩm sõngo, la a toog ka be ne yãmb sẽn gɩdg bũmb ninga ye. Beoog sẽn vẽeg fãa a pʋʋsda naoor a tãabo.» 15Dĩma sẽn wʋm dẽ, zab-a-la wʋsgo la a baas n tʋlgame t'a Daniyɛl põse. A pa leok yella nif ye al tɩ wĩntoog lʋɩ. A ra zĩi n pademdame. 16Neba le lɛɛg n wa dɩdga dĩma la b yeel-a: «Tẽeg yã, dĩma, tɩ Mɛd la Pɛrs rãmba nengẽ dĩm ka kõt noore n le tõog n tar ye.»
Bõnyẽes loanga
17Dĩma kɩtame tɩ b wa ne a Daniyɛl la b lob-a-la bõnyẽes loangẽ. Dĩma yeela a Daniyɛl: «Yaa Wẽnd ninga fo sẽn pʋg n ka tol n vʋʋsã n na n fãag fo marsã.» 18B waa ne kugri n pag loanga noor tɩ dĩma ne a poorẽ dãmba ning kaseto, noora sɩd paga neera kaseto, la woto b sẽn sed bũmb ninga, a Daniyɛl poorẽ, ka le tõog n viig ye. 19Dĩma leba a zakẽ, n sɩng no-loeere la a pa bas t'a pagba kolg-a ye. A pa tõog n zuk gõeem ye. 20Zĩig sẽn wa n yẽegdẽ, sõora sẽn waa n pukdẽ, dĩma yii ne yãgbo n dig bõnyẽesa loangẽ. 21A kolgame t'a sũur kiuusdẽ n yeele: «Daniyɛl, Vɩɩm Naaba-Wẽnd sõgne, Wẽnd ninga fo sẽn pʋgd beoog-beoog fãa wã tõogame tɩ f põs bõnyẽesa bɩ?» 22T'a Daniyɛl leok dĩma: «Dĩm sõngo, Wẽnd na wogl y yõore! 23M Wẽnnaama tʋma b Malɛka, t'a wa pag bõnyẽesa noore tɩ b ka maan-m bũmb ye. M Wẽnda pa yãend yell m zug ye. La sã n ya ne yãmb me, dĩm sõngo, m ka tẽed tɩ m maana bũmb n paoog-y ye.»
24Dĩma sũur yɩɩ noog wʋsgo la a kɩtame tɩ b yiis a Daniyɛl loangẽ wã. A Daniyɛl yiime la b mikame tɩ bũmb pa sɩɩs-a ye, a sẽn da teeg Wẽnda yĩnga. 25Dĩma kɩtame tɩ b wa ne neb niyns sẽn da luk a Daniyɛl, bãongã, bãmba, b pagba la b kamba. La b pa yãe n ta loanga pʋga tɩ bõnyẽesa kok-ba la b wer b kõab ye.
Dĩma tẽebo
26Dĩm a Dariyus gʋlsa woto tẽnsa toor-toor nebã, buud toor-toor dãmba, zelemd toor-toor dãmba sẽn sẽeg moogã:
«Zĩnd-y ne laafi sẽn pid laafi!
27Ad m noore: ‹M soolma, m rĩunga fãa pʋgẽ bɩ Adem biig fãa maan dabeem a Daniyɛl Wẽnda taoore. Yaa bãmb la Wẽnd Vɩɩga, bãmb bee zamaan woo zamaana. B naam ka be sɛɛb ye. B rĩung ka mi wãab ye. 28Bãmb la fãagd la koagenda, bãmb n maand makr dãmba la bõn-bãna, yĩngri la tẽng zugu. Bãmb n fãaga a Daniyɛl bõnyẽes noorẽ.› »
29Sẽn waa n beẽ, a Daniyɛl paama kãsengo Mɛd dãmb dĩm a Dariyus nengẽ n le wa paam kãsengo Pɛrs rãmba dĩm a Sirus nengẽ.
Currently Selected:
Daniyɛl 6: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.