2MAKABE 13
13
A Menelas kũum
1Koabg la pis-naas la a wɛ yʋʋmde, a Makabe wʋmame t'a Antiyokus Ewupator dɩka Zɩɩda tẽng sor ne tãb-biis ka tɛka. 2A kug-zĩid la a wubda a Liziyas tũ-a lame ne tãb-biis sẽn ya Grɛk rãmba la sẽn ta tus koabg la piiga, n paas wed-dʋʋdb tus a nu la kobs-tã, la wobd pisi la a yi, la zabr bilim-bilm kobs-tã ne goe wogdo.
3A Menelas tɩ paam-b lame la a sɩng n na n tudga a Antiyokus ne a sɩlem baafã. Yaool n ka buuda manegr la a ra baood ye, a baood n na n kell n dɩ a naama. 4Naaba-Wẽnd kɩtame t'a Antiyokus sũur yik ne a Menelas. A Liziyas tõog n wilga dĩma tɩ yel-beeda fãa yita a Menelas nengẽ. A Antiyokus yeelame tɩ b tall-a n kẽng Bere, n tɩ kʋ-a wala be rãmb sẽn maande. 5B ra mee ro-lug-lug gilg a ye be. A zãndlma ya kãntɩɩs pis-nu. B ra pidsd-a-la ne tompɛglem. Bũmb n da be a noorẽ wã n bilimdẽ la a vikd tompɛglma pugẽ. 6Ned sã n da zu wẽnd doog teedo bɩ a maana yɛl bɛd a taaba, b ra kʋʋd-a-la ne bõn-kãnga. 7Yɩɩ woto la nin-wẽng a Menelas ki yã la a pa tol n paam yaoog ye. 8Da segdame, t'a wẽnema yɩɩ wʋsgo. A sãama maan-kugrã. Maan-kugra bugma la tompɛglma ra yaa bõn-sõma. Yaa rẽ la tompɛglma me wɩɩb-a.
Modin zabre
9Dĩma dɩka sore, n bilgd a yamẽ tʋʋm beed ning a sẽn na n tʋm Zʋɩf rãmbã la tʋʋm beedã, b yaab rãmb meng ka yãend a taar ye. 10A Zɩɩda bãngame n kos a nebã tɩ b yõk Wẽnd sɛɛg wĩndg la yʋngo. 11B kosa Wẽnd tɩ b le wa sõng-ba tɩ b rat n wãa b rog-n-mik la b buudu la b wẽnd doogo. B kosame tɩ b ra bas b buuda sẽn paam pemsem bilfã tɩ b le lʋɩ wẽn-tʋʋsdba nugẽ ye. 12B sɩd naaga taaba wa b sẽn kõ-b noorã n pʋʋs Nimbãan-zoeer Soabã. B yãbame; b loe b noor; b kɩ b neng tẽng dasma a tã. A Zɩɩda le sagl-b lame n paas b raoodo la ned kam fãa da bob n dõbame. 13A tigma nin-kẽembã n yẽse la b yeelame tɩ b ka na n yaas tɩ dĩma tag Zɩɩda tẽn-peelem ne a tãb-biisi la a soog Zerizalɛɛm ye. B na n boba zabre n yãk yella neng ne Wẽnd sõngre. 14A Zɩɩda rɩka fãa n bas ne Dũni Soaala la a yeela a tũud-n-taase tɩ b zab ne sũ-keelem n tãag b kũum, b rog-n-mikã, b wẽnd doogã, b tẽngã, b buudã, b noya yĩnga. A tɩ yalsa a tãb-biisa Modin noorẽ. 15B yãka b zab yʋʋre «Wẽnd la raoodo,» tɩ bɛɛb tõogr bee ne Wẽnde. B basame tɩ zĩig sobg la kom-bɩɩb sẽn tar-b sũura tɩ wẽe dĩma sika. B kʋʋ neb na ta tus a yi, la b kʋʋ wobg kẽeng a ye n paas wobda legendba. 16B zũndga b sikã n bas n loog ne sũ-noogo. 17Ne Wẽnd sõngre, b tʋma b tʋʋma n loog tɩ zĩig yaool n yẽeg.
A Antiyokus zoodo
18Dĩma bãngame tɩ Zʋɩf rãmba ka bõn-tats ye, t'a na n bao dabaar a to n paam n deeg b tẽnsã. 19A kolga Bɛtsur, Zʋɩf rãmb tãnsoben-tẽng a ye, la a lɛɛga ne yãnde.
20A Zɩɩda toola Bɛtsur dãmb bũmb ning fãa b sẽn da tar a soab tʋʋmde. 21A Rodokus yaool n da bee be n wilgd bɛɛba Zʋɩf rãmba sẽn segle tɩ b na n yõk-a n kʋ. 22Dĩma sẽn lɛɛg n wa, a le goma zood goama ne Bɛtsur dãmba. B yõka taab nugu t'a lɛɛg n kuli. 23A waa n wʋmame t'a sẽn da bas a Filip t'a ges a soolma yella ra lebga tõata. A Antiyokus le goma noog ne Zʋɩf rãmbã, n wẽenẽ tɩ b na zems taab marsã. Dẽ poore, a sɩd kɩtame tɩ b kʋ maand n wilg tɩ wẽnd dooga tat a yam la a kõo kũuni.
24A reega a Makabe neere la a basa a Ezemonid t'a yɩ tãnsoaba al Ptolemayis n ta Gera. 25A waa Ptolemayis la be rãmb sũur pa yɩ noog ne a sẽn kaool bũmb ningã tɩ b baood n na n sãam a yelle. 26A Liziyas kong n goma ne-ba n wilg b kaoola võore, tɩ b na n bas zabre, tɩ b sũur na n maage, t'a loog Antiyos.
Dĩma zaba takre la a sẽn waa n kong n bas raooda kibar yɩɩ woto.
Currently Selected:
2MAKABE 13: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.