2MAKABE 12
12
A Zɩɩda Makabe rokda a sũuri
1Yẽsga sẽn kʋ n sɛ, a Liziyas lɛɛg n waa dĩma nengẽ. Wakat kãng tɩ Zʋɩf rãmba yii n tʋmda b pʋtẽ. 2Taoor dãmb kẽer sẽn da be be, wala a Timote la a Apoloniyus, a Genewus biiga n le paas a Zerom, n paas a Demofõ, n paas a Nikanor, Sɩpr tãb-biisa sẽn da reegd-b ligd n zabdẽ wã tãnsoaba, bãmb fãa da ka basd Zʋɩf rãmba ne laafi la bãan ye.
3Ad tʋʋm beed ning Zope rãmba sẽn tʋme. B maana wa beem buud ka be bãmb ne Zʋɩf rãmb sʋk ye n bool sẽn da be-b ne bãmba fãa, bãmb ne b pagb la b kamba tɩ b wa kẽ koom kogend, b sẽn da ka b toore. 4Zʋɩf rãmba sakame, tɩ zood sebr la b ra yiis tẽnga pʋga n da kõt kaset tɩ bãmb me baooda laafi. Woto b pa maan gũusg tɩ sek ye, mik bɛɛba tall-b lame n ta ko-sʋka n kiig-b koomẽ wã, bãmb na ta kobsi.
5A Makabe wʋma bɛɛba sẽn tʋm wɩɩbd ninga la a wilga sẽn be-b ne-yẽ wã, b sẽn na n naanega. 6B reng n pʋʋsa bʋʋd tɩrg Naaba-Wẽnd n yaool n yik zabr ne nin-kʋʋdbã. A Makabe kẽna yʋngo n tɩ yõog koom kogendã la neb niyns fãa sẽn da zoe-b n tɩ soond be wã. 7Tẽnga noor sẽn pag yĩnga a loogame la a kãabd a meng t'a na lɛɛg n wa kʋ Zope rãmb fãa. 8A Makabe wʋmame tɩ Zamniya rãmb me ra baood n na n tʋma beed ne Zʋɩf rãmb sẽn be-b ne bãmbã. 9Dẽ la a kaoog zabr yʋngo ne Zamniya rãmba, n yõog b koom-kogendã b sẽn loet-b zĩig ningã. B yõoga tẽnga ne koom-kogendã, la Zerizalɛɛm dãmb zĩnda b tẽngẽ, n yãe Zope bugum. Zerizalɛɛm ne Zope taa daar a ye kẽnde.
Galaad zaba
10A Zɩɩda sẽn yi be n na n tɩ tak zabr ne a Timote, a ka yãe n zãag ye. La Arab rãmb waa ne tãb-biis na ta tus a nu la wed-dʋʋdb kobs-nu. 11Zabra zaba ne rugdu, la ne Wẽnd sõngre a Zɩɩda n tõoge. Bɛɛba kosa a Zɩɩda t'a tud a nug n yõg zoodo tɩ b na kõ-a rũmsi la b na sõng taaba. 12A Zɩɩda gesame tɩ b sɩd tõe n sõng-a lame la a yõga zoodo, n sɛɛs zaba la b leb b rotẽ.
13Vẽkembeoogo a Zɩɩda yika zabr ne tãnsoben-tẽng a ye sẽn tar lal-gũgri la sẽn boond tɩ Kasfo. 14Tẽnga rãmb gesame tɩ b lalsa yaa wogdo la kood pida ne b roto tɩ b na n gom põas-põas ne a Zɩɩda la a poorẽ dãmba. B tol n tʋʋsa Wẽnd tʋɩ yoodo. 15A Zɩɩda ne a neba pʋʋsa bũmb fãa Soaala sẽn lub Zeriko a Zozuwe wakatẽ, tɩ ka tũ ne zab-teed buud sẽn wurd la b tusd lals n lubdẽ ye. Woto a Zɩɩda neba rʋʋ lal-gũbrã wa bõnyẽese. 16Wẽnd sõng-b lame tɩ b reeg tẽngã la yɩɩ tẽn-kũum sẽn ka tõe n bilgi. Kʋɩlg n da pẽ be. A yalem ra taa kãntɩɩs kobs-nii la pisi,#12,16 Kãntɩɩs kobs-nii la pisi: Stade yaa kãntɩɩs kobs-naas la piiga. la yaa waa a ra pidda ne zɩɩma sẽn daagã.
Karniyõ zabre
17A Zɩɩda yii be n kẽn dasma a naas kẽnde n tɩ kẽ Karags. B ra boonda tẽn-kãng Zʋɩf rãmbã tɩ Tobi tẽng rãmba. 18A pa yãend a Timote be ye, t'a ra loogame. Woto a ka yaas n zab ye la a basa a tãb-biisi. 19Yaa a tãnsoaben-dãmb a yi, a Dozite la a Zozipatɛr la Makabe tʋm Karags. B kʋ-la a Timote sẽn bas neb niynsã, b ra taa tus piiga. 20A Makabe weela neba sak-saka, n kõ sak fãa a taoor soaba la b pʋga a Timote. Yẽ ra tara tãb-biis tus koabg la pisi la wed-dʋʋdb tus a yi la kobs-nu. 21A Timote sẽn wʋm t'a Zɩɩda kolgdame, a kẽesa pagba la kamba la teedã Karniyõ pʋgẽ. Karniyõ yaa tãnsoben-doog sẽn tõe n zab n fãag a menga. Tẽnga ra ka bõn-tatg ye, soy wã ra yaa sẽgse, n tar bogd la kuga. 22A Zɩɩda tãb-biisa n lik pipi la bɛɛba riga rabeem. Rabeema waa n lebga zoe-yaare tɩ Soaalã, bũmb sẽn ka tõe n solg a soabã, lika b meng bãmba. Tãb-biisa zoe n teesa b sẽn paamẽ n mi n lɛɛg n pogend taaba, n kõsd taab ne b sʋʋse. 23A Zɩɩda ra wɩngda ne b rigbu, n pʋgd n kɛɛd-b n lubdẽ. Bɛɛba sẽn pa zabrẽ taa tus pis-tã. 24A Timote meng lʋɩ a Dozite la a Sozipatɛr neba nusẽ. A Kos-b-la ne dabaar kãsenga tɩ b bas-a ne yõore. A yeel-b lame tɩ bãmb buuda neb la b saam-biis wʋsg lʋɩ-la a mugẽ la a tõe n kʋʋ bãmb me. 25A Timote sẽn yõk goama n tar goama, la a wẽenẽ t'a na n lebsa nin-bãmba vɩɩse, a Dozite la a Sozipatɛr sẽn dat n fãag b saam-biisa yĩnga, b bas-a lame t'a looge.
26A Zɩɩda kẽe Karniyõ la Atargateyõ la a kʋʋ neb na ta tus pisi la a nu.
Efrõ zaba
27Bɛɛba sẽn sẽege, a Zɩɩda kẽe Efrõ ne a tãb-biisi. Efrõ da yaa tãnsoben-tẽnga, a Liziyas ra bee be. Yɩnga b ra tedga kom-koeemse lal-gũbra sɛɛga tɩ b zabd ne b yãoog pãng tɛka. B ra yalsa loobs bɛd buudu la b sam kuga sẽn tar n lobdã. 28Zʋɩf rãmb pʋʋsa Soaala sẽn tõe n koms bɛɛba la b reega tẽngã la b gãnega neb na ta tus pisi la a nu. 29B sẽn yi be b teesa Sitopolis. F sã n yi be n kẽn wakat a yi, f tata Zerizalɛɛm. 30Zʋɩf niyns sẽn da naag-ba n be be wã kõo kaseto tɩ Sitopolis rãmb da reeg-b-la neere b yell pakra wakato. 31A Zɩɩda pʋʋs-b-la barka la a kos-b lame tɩ nin-daar bɩ b kell n maan boto ne a buudã. B taa Zerizalɛɛm dẽ tɩ dasem pis-nu kibsa yaoome.
Zabr ne a Gorziyas
32Tigsg kibsa poore b taka zabr ne a Gorziyas, Idume tãnsoaba. 33A Gorziyas yii ne tãb-biis tus a tã la wed-dʋʋdb kobs-naase. 34B tãaga taaba tɩ Zʋɩf rãmba wʋsg rʋʋge. 35Tobi tẽng rãmb wed-dʋʋd a ye sẽn boond tɩ Dozite, n ya gãndaoog menga, gãda a Gorziyas fuugu n vuud-a, n na n yi ne-a vɩɩga la Taras wed-dʋʋd a ye wudg n kẽe a Dozite, n kɛ a bãoko n yesg t'a Gorziyas paam n zoe n tɩ soond Marisa. 36Sẽn da be-b ne a Esdras n tar zabrã waa n yaame. A Zɩɩda pʋʋsa Wẽnde n kos tɩ b lʋɩ taoore n yɩ b Sõangda. 37A Zɩɩda tãsa ne a buuda goama Wẽnd pẽgr la zabra sɩngre, t'a Gorziyas neba na n kʋɩ tĩiga.
Wẽnd kosg sẽn ki-ba yĩnga
38A Zɩɩda bʋʋga a tãb-biisã la b tɩ kẽe Odolam. Vʋʋsga daar taame tɩ b yɩlg b menga n pʋʋs b pʋʋsgo. 39Vẽkembeoogo b waa n yãenda a Zɩɩda (la ra segda wʋsgo) la b goma kũuma rɩgsgo la b solgre, ned kam fãa a ba rãmb yaadẽ. 40B yãenda ned kam fãa gɩfẽ teed sẽn ya Zamniya wẽnda waoogr teedo la Zʋɩf rãmb noor ra gɩdga rẽnna. Lebga vẽenega tɩ rẽ n wa ne b kũum. 41B fãa pʋʋsa Wẽnd sẽn ka mi bʋ-golomse la sẽn pukd sẽn solge, 42fãa pʋʋsame n kos tɩ b yĩm yel-wẽnda zãnga. A Zɩɩda kosa nebã tɩ b zãag b meng ne wẽng buud fãa tɩ b nee sẽn ki-ba sẽn maan yell ning tɩ pak-ba. 43B loba ligd n paam waas tus a yi la b tool-a-la Zerizalɛɛm tɩ b ra rũms n kʋ sugr kosg maando. Ad-y b ra zʋʋg n tagsda yĩng vʋʋgr yelle. 44Sɩda a sã n da tẽedẽ tɩ tãb-biisa sẽn ki wã pa na n vʋʋge, pʋʋs b yĩnga yaẽ la zaalem la yalemdo. 45La a sã n tẽed tɩ sẽn ki-b Wẽnd yĩngã rolb kãseng n gũud-ba, a tagsg yaa woko la neere. Yaa rẽ n so t'a kʋ sugr kosg maand sẽn ki-ba yĩnga, b yel-wẽna yẽesg yĩnga.
Currently Selected:
2MAKABE 12: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.