2KORẼNT RÃMBA 3
3
Zood paalga tʋʋm-tʋmdba
1La d le sɩngdame n lʋɩɩsd d meng taoor bɩ bõe? Sãnd ka wẽnd yaa pakre ne-do, wa sẽn ya pakr ne neb kẽere, tɩ d yiis d tʋʋm-sõnga kaset sɛb n wilg yã, bɩ d deeg d tʋʋm-sõnga kaset sɛb yãmb meng nengẽ? 2D tʋʋm-sõnga kaset sebr yaa yãmb mense, yaa sebr sẽn gʋls y sũurẽ, sebr ned fãa sẽn zãad la a karemnẽ. 3#Ey 24,12; Zr 31,33; Ez 11,19; 36,26. Vẽeneg fas, yãmb yaa Krista sebre b sẽn kõ-do. Ka sebr sẽn gʋls wa sɛb a taaba ne gʋlsg ko-sablg ye, gʋlsa ne Wẽnd Vɩɩga Vʋʋsem; pa gʋls kug peesem zug ye, yaa yĩn-gãongẽ, yaa sũurẽ. 4D sũura sẽn ya kɛgeng woto Wẽnd taoorã, yaa Krista yĩnga. 5Tõnd meng ka tõe n yeel tɩ bũmb tol n beeme n yit tõnd nengẽ ye, ayoo! D tõog buud fãa yita Wẽnnaam nengẽ. 6#Zr 31,31. Wẽnd n kɩt tɩ d lebg b Zood paalga tʋʋm-tʋmda. Zooda yaool n ka zood ning sẽn tar-a a kaset sebr zuga ye, zooda yõga ne Wẽnd Vʋʋsem. Sebra waa ne kũum tɩ Vʋʋsma wat ne vɩɩm. 7#Ey 34,29. Zood ning sẽn tar-a a kaset kug peesem zug la sẽn waa ne kũuma, paamame t'a siginda yãend pẽgr kãsenga al tɩ Israyɛl kamba da pa tõe n ges a Moyiiz nenga sẽn da yãgd ne ziir ninga ye. A ziira yaool n da yaa bũmb sẽn ka na n kaoos n sɛ ye. 8Zood ning sẽn yõg ne Wẽnd Vʋʋsma, zood kãng Siginda ziir kõn yɩɩg sɩda? 9Tʋʋmd ning sẽn baas-a ne ninsaalb paalgrã sã n kõ a tʋʋm-tʋmda ziiri, sẽn tũ a soab wilgri tɩ zemsg zamaana yalsã, nin-kãng soab pẽgr kõn yɩɩg sɩda? 10Ayoo! D kõn yals n mak b ziira ne taab ye tɩ pipi ziira pʋs n ka yɩ zɩɩr meng ye. 11Bũmb sẽn ka na n kaoos n loog sã n puk ne ziiri, bũmb ning sẽn pa loogdã ziira kõn yɩɩg sɩda?
12D sẽn paam saagr a woto fãa kɩtame tɩ d zĩi n ka bʋʋd fɩ. 13#Ey 34,33. D ka ya wa a Moyiiz sẽn da kong n bao peend n lud a nengã, n zoet tɩ Israyɛl kamb na n wa yãend sẽn ka tõe n ka sɛ wã sɛɛbo. 14A Israyɛl kamba yama kell n paa lika. Al n tãag rũnda menga, f sã n karemd zood kʋdga sebre, f neeme tɩ peenda ket n ludame. A pa lak ye, tɩ Krista bal n lakd peend kãnga. 15N-ye! Sẽn ta ne rũnna, a Moyiiz sebra kareng wakato, yaa wa peend la b gãnegd b sũurẽ. 16#Ey 34,34. Ya f sã n kẽ Soaala bal la peenda lakda. 17Soaala la Vʋʋsem: tʋʋmd a ye; la Soaala Vʋʋsem sẽn be zĩig ninga, be la burkĩndlem be. 18Tõnd fãa sẽn doog d neng t'a tʋʋsd Soaala pẽgrã wa nin-gɛtgã, tõnd lebga b wẽnego la d wẽnega pãng tara paasgo n dabda, ne Soaala Vʋʋsma.
Currently Selected:
2KORẼNT RÃMBA 3: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.
