1Tesalonik Rãmba 2

D waoong yãmb sʋk zĩnda yõodo

1Yãmb miime, m saam-biisi, tɩ d sẽn wa y nengẽ wã pa yɩ zaalem ye.

2 # Tv 16,19-24; 17,1-9. Y bãngame, m saam-biisi, tɩ d deng n namsa Filip tẽnga la d yãee tʋʋre, la Soaala Wẽnd sõng-d lame tɩ ne fara sẽn yɩ far tɛka, d tõog n moona b Koe-noogã ne raoodo. 3D sẽn waa n segend yãmbã, d zãaga d meng ne tudugri, ne kalem-kalem la zãmbo. 4Yɩɩ woto tɩ Wẽnd deng n fɛɛsa tõndo, n yaool n kõ-d Koe-nooga tʋʋmde. Dẽ me la d pa baood n na n noog ninsaal sũuri, d baooda sẽn noom Wẽnde, la bãmb bal n ne sẽn be ninsaal sũurẽ. 5Tõnd zɩ n bao pẽg-faado n pẽg-y ye, d ka gom n yeg n bõs-y bũmb ye. D Wẽnda tara rẽ kaseto. 6D pa gom n bao ninsaal pẽgr ye, yãmb nengẽ bɩ zĩig a to ye. 7D yaool yaa Krista tʋʋm-tʋmda n da tõe n tũ rẽnna n yɩ zɩɩbo y yĩnga.

La ade, d sakame n yɩ nin-kom-kom yãmb sʋka. D wẽnega ma sẽn dɩlgd a kamba n pa rat tɩ bũmb paoog-b ye. 8Tõnd nonglma ne yãmb yɩɩ boto la nonglma keelem yĩnga d tʋlgẽ lame n naagẽ ne Koe-noogã n kõ yãmb d meng vɩɩm. 9M saam-biisi, y ket n tẽra d tʋʋma ne d yaamsã. D sẽn waa n moon Koe-noogã, d naagame n tʋm yʋng wala wĩntoogo sẽn na n yɩlẽ tɩ d dɩlgr da wa lebg yãmb nin-yend zɩɩb ye. 10Y naaga Wẽnd n ya m kaseto tɩ ne tẽedba d manesema yɩɩ sõmbo n yɩ tɩrga, n zãr ne wɩdga. 11Y miime, yãmb ned kam fãa, tɩ wala ba sẽn maand ne a kamba 12d sagl-y lame, d kenga y pelse, d kos-y la Wẽnd yĩnga tɩ y vɩɩnd vɩɩm sẽn tat b yam, tɩ bãmb n boond yãmba b naama la b pẽgra zĩigẽ.

Tesalonik rãmb tẽeb la b sũ-maasem

13Sã n ya ne tõndo, d ka vʋʋsd ne Wẽnd bark pʋʋsg ye. D sẽn taas-y Wẽnd gomd ningã y reeg-a lame; la y pa reeg-a wa ninsaal gomde, y reeg-a la wa Wẽnd dẽnd akɩka. La rẽ me la Gomda wom a biis yãmb tẽedba sũurẽ. 14#Tv 17,5. Y modgame, m saam-biisi tɩ y tũudma ya sõmbo; a yaa sõng wa Wẽnd sẽn vigl Tigeng niynsi a Zezi Krista maasmẽ, Zɩɩde tẽnse. Wala Zɩɩde rãmb sẽn yãe naong Zʋɩf rãmba nengẽ, boto la y saam-biisa me nams yãmba. 15#Tv 9,23, 29; 13,45, 50; 14,2, 5, 19; 17,5, 13; 18,12. Ad-y neb niyns sẽn kʋ-b Soaal a Zezi la bãngdbã, yaa bãmb n le nams tõndo. Bãng-y tɩ b zãra ne Wẽnd zoodo la b rɩta Adem biis fãa beem. 16Bãmb kɩtame tɩ d ka le tõe n moon Koe-noogã bu-zẽmba tɩ b paam n fãag b sɩɩs ye. B lekda b wẽnema sãoogo tɩ Wẽnd sũ-puura me na n baas n dɩ-ba.

A Pol sẽn maand yɩɩre bũmb ning poorẽ

17Ade, m saam-biisi, sẽn seg tɩ d zãag taab bilfu — m gomda d nensa sẽn zãag taabã, m pa gomd sũura ye — d waa n yik n yãgdame n dat tɩ d nensa le togl taaba tao-tao. 18Dẽ la d sed n na n wa y nengẽ. Sã n ya maam a Pol, dẽn yɩɩ naoor yaka. Yaa Nin-wẽngã n ning gɩdgre. 19Sã n ka yãmba, bõe n na n yɩ d saagra pidsgu, d sũ-nooga baasgo, d faonga teedo, d sẽn wat n yɛs Soaal a Zezi Krista taoore b Waoonga raare? 20Yãmb bal la d zu-zẽkre la d sũ-noogo!

Currently Selected:

1Tesalonik Rãmba 2: SSDC98

Highlight

Copy

Compare