1Tesalonik Rãmba 1

Sebra rãmb n pʋʋsde

1 # Tv 17,1. A Pol ne a Silvẽ la a Timote n pʋʋsd Tesalonik Tigeng sẽn vɩ Wẽnd Ba la Soaala Zezi Krista maasmẽ. Bɩ Wẽnd pids-b ne b kũuna la b laafi!

Bark pʋʋsgo la Wẽnd pẽgre

2Yaa wakat fãa la d pʋʋsd Wẽnd bark y yĩnga la d tẽegd y yelle. 3Sɩda, Wẽnd la d Ba taoore, d tẽegdame tɩ y paama Soaal a Zezi Krista nengẽ tẽeba tʋʋmd yamleoogo, n paas nonglem sẽn vɩ, la saagr sẽn ka mi maagre.

4M saam-biisi la Wẽnd zo-rãmba, d miime tɩ Wẽnd n sɩd tũus yãmba n bak toore. 5La woto, ka tũ ne goam bala la Koe-nooga paam n ta yãmb ye, naaga ne bũmb sẽn paas y raoodo, ne a Vʋʋsem Sõng tʋʋm-bãna sẽn ka be sõore. Yãmb mi d sẽn maan bũmb ning yãmb sʋka, y sõngr yĩnga. 6#Tv 17,5-9. Yaa ne zʋg sẽn wẽnd tõnd zʋgo la Soaala me zʋgo la yãmb deeg Koe-noogã. Ba y naong sã n yɩ wʋsgo, a Vʋʋsem Sõng kell n pids-y la ne sũ-noogo. 7Yaa rẽ me yĩng la yãmb nao wã rɩkr yamleoog yõk Masedoan la Akayi tẽedba. 8Soaala Gomda sẽn sɩng moonego yãmb tẽnga ka tek Masedoan la Akayi bal ye. Wẽnd sẽn kõ yãmb tẽeb ninga saaga ziig zãnga ne neerem, al tɩ d ka tar sẽn na n yeel n paas ye. 9Y tẽnga rãmb togsda tõnd waoong beelẽ sẽn yɩ a soaba. B togsda yãmb sẽn kẽ Wẽnd to-to; yãmb sẽn bas wẽn faadã n na n kẽ Wẽnd vɩɩga la Wẽnd menga. 10Y kẽe bãmba n gũud b Biiga waoong raare, b Biig ning b sẽn vʋʋg kɩɩms sʋka, b Biig a Zezi Krista sẽn na n fãag-a tõndo, tɩ b sũura sẽn na n fudg raar yãkame.

Currently Selected:

1Tesalonik Rãmba 1: SSDC98

Highlight

Copy

Compare