1MAKABE 14
14
A Simo pẽgre
1Koabg la pisopoe la a yiib yʋʋmde, dĩm a Demetriyus tigma a tãb-biis n dɩk Mɛd tẽng sore. A tɩ baoo sõngre, n na n wa lɛɛg n zab ne a Trifõ. 2A Arsas, Pɛrs la Mɛd dãmb dĩm, wʋmame t'a Demetriyus kẽe a soolmẽ la a tʋma a tãnsoab a ye t'a tɩ yõk-a vɩɩga. 3Tãnsoaba sɩd boba zabre ne a Demetriyus la a sẽn yõk-a, a tall-a lame n wa kõ a Arsas tɩ b pag-a roogo. 4A Simo sẽn dʋ zaoor tɛka a ka le wʋm zabr bʋʋr ye.
5A baoo a neba neerem, la a vɩɩma fãa pʋgẽ b pẽga a naama rɩɩbo, b kilsa a ziiri.
A sẽn maan tɩ b pẽgd n yɩɩda, yaa a sẽn tõog Zope, n maan a koom-kogend yalsg zĩiga. Be la b ra yit n saagd tẽnsã sẽn be mogra sʋka.
6A yalga a soolma toaaga la a kell n tõog n zãa neba fãa.
7A baoo zĩig n tigim yem-daadã; a tõoga Gezɛr, Bɛtsur la tãnsoben-tẽngã n yɩlg a ne rẽgd buud fãa. Ned ba a ye ka zẽk a zug a Simo taoor ye.
8Neba ra kooda b pʋtã ne laafi la kooda ra sakdame, tɩɩsa me da womdame.
9Nin-kẽemsã sẽn zĩ tẽnga sʋk ra gomda tẽnga arzɛka yell bala. Kombɩɩba ra yera fu neeba la b bobd zab-teed sẽn yãgd nini.
10A Simo modgame tɩ rɩɩb sek tẽnsa fãa; a le yika tẽnsa lalse la woto a yʋʋr saaga mooga tõre.
11Laafi zĩnda a soolma fãa pʋgẽ la a Israyɛl sũur pidsa ne sũ-noogo.
12Ned kam fãa tɩga a sãbg la a kankang maasem; bũmb ba a ye ka wa kius a sũur ye. 13A zabd-n-taasa fãa menemame, a tõoga dĩm dãmba fãa.
14Nin-koam ka le zĩnd ye. A menesa nin-yoog la nin-wẽng buud fãa. A tũu Wẽnd noore. 15A lebsa wẽnd doogã a pĩnd neerem n pidsa ne te-neeb sẽn ka tõe n sõde.
Zood ne Spart la Rom dãmba
16A Zonatã kũuma ra taa Rom la Spart tẽnga n kẽes-b sũ-sãang kãsenga. 17La be rãmb sẽn wa n bãng tɩ yaa a yao a Simo n deeg maan-kʋʋr naam la tẽnga soolem, 18b kɩtame tɩ b le gʋls kut zugu pĩnd zooda sẽn da kaool to-to ne a Zɩɩda, ne a Zonatã la a yaopa. 19B karma-a-la Zerizalɛɛm tɩ neba fãa kelge.
20Ad sebrã b sẽn toolã: «Spart bʋ-kaoodba n pʋʋsd maan-kʋʋd kãseng a Simo n naag nin-kẽemsã la tẽnga rãmb fãa.
21Yãmb sẽn tʋm b rãmba waa n wilg-d-la y ziir la y pãnga sẽn ta zĩig ninga la b waoonga nooga d sũur wʋsgo. 22D gesame tɩ b sẽn wa ne koɛɛg ninga taa tẽnga rãmb yam la yaa woto la d gʋls d tẽnga sɛbẽ: A Antiyokus biig a Numeniyus la a Zasõ biig a Antipatɛr waa d nengẽ n na n le maneg n yõg zood ne-do. 23Yɩɩ d fãa sũ-noogo tɩ d reeg-b ne waoogre la d deega b sebrã n bĩng tõnd sɛba bĩngr zĩigẽ. Woto Spart dãmb kõn waa n tõog n yeele tɩ b pa tẽr ye. D pʋs n toola maan-kʋʋd a Simo menga sebr kãng tẽegr yĩnga.» 24Sẽn yɩ bilfu a Simo le tʋma a Numeniyus Rom tẽng ne sãnem gãongo, zood kaset yĩnga, gãonga da kuda ne sãnem la a zɩslem taa neb a yiib sẽn tõe n tʋke. 25Neba sẽn bãng rẽ la b sẽn yeele: «Bõe la d na n yãe n kõ a Simo ne a nebã n wilg d sõm? 26A me maana sũ-keelem wala a kẽem dãmba, a zaba ne bɛɛba tɩ b lak zãnga tɩ lebg soog-m-menga.» B baoo kutu n gʋls a sẽn maan fãa la b lugl-a-la Siõ tãnga zugu. 27Ya woto la b ra gʋls kuta zugu:
«Koabg la pisopoe la a yiib yʋʋmde, Elul kiuug piig la a nii raare, a Simo naam yʋʋmd a tãab soaba, Wẽnd kom nongdsã sɩmannẽ, 28maan-kʋʋdba, buuda taoore, buuda kãsem-dãmba taoore, buuda nin-kẽemsa taoore ad b sẽn togs-do: 29Zaba sẽn waa n pʋgd taab n pa sɛtẽ, a Matatiyas biiga a Simo, a Zoarib yagenga ne a saam-biisa ka zoe kũum ye, b yik n teega ne bɛɛbã tɩ b ra wa lub wẽnd do-sõnga ye la Wẽnd noora ra yãe kɩɩsd ye. Woto b sõngame tɩ buuda paam ziir kãsenga. 30A Zonatã tigsa buudã la yẽ n lebg b maan-kʋʋd kãsenga n yaool n lagem ne a saam-dãmba. 31Zʋɩf rãmba bɛɛb tʋlgame n kẽ b tẽngẽ n sãam-a zãnga, n wãa a wẽnd doogã, 32t'a Simo yik n zab a buuda yĩnga. A yiisa a meng ligd zembala; n na n da zab teed la a yao tãb-biisi. 33A modg n paasa Zɩɩda pãnga, n paas Bɛtsur pãnga, tẽng sẽn be a toaagẽ la sẽn da ya bɛɛba tãnsoben-doogo. A meng tãb-biis la a tũus n ning be. 34Mogra noore a maneg n mee Zope tẽnga. A maana botome ne Gezɛr, Azot toaagẽ. Bɛɛb n da kẽed be pĩnda. A tɩ ninga Zʋɩf rãmb be ne kood sẽn na n dɩlg-ba. 35Buuda yãenda a sẽn Wẽnd ne sũur ninga la a sẽn d a rat a buuda ne ziir ninga. Dẽ la b yãk-a t'a lebg b maan-kʋʋd kãsenga n lebg b na-kãsenga a tʋʋma fãa yĩnga, a sẽn zã buuda ne tẽeb la zemsgo, a sẽn da baood buuda zu-zẽkre wakat buud fãa yĩnga. 36A Simo wẽnnẽ la a Simo maasem yĩnga, b tõog n diga bu-zẽmba fãa n yiis a tẽn-peelmẽ, n yiis sẽn da be-b a Daviid sakẽ, sẽn da be-b Zerizalɛɛm pʋga, sẽn da rɩk-a n maan b tãnsoben-doogo, tɩ b be be n yit n zabdẽ la b rẽgemd wẽnd doogã la b woogd a barka. 37A ninga b zĩigẽ, tãb-biis sẽn ya Zʋɩf rãmba la a sẽn tʋlg tɩ Zerizalɛɛm la tẽnga lebg laafi tẽnga, a zẽka a lalsã.
38Yaa rẽnd fãa yĩnga la dĩm a Demetriyus kõ-a maan-kʋʋr naam. 39A maan-a-la a zoa n waoog-a ne waoogr kãsenga. 40Dĩma wʋma Rom dãmb sẽn boond Zɩɩda rãmb tɩ b zo-rãmba, b saam-biisi la b sõangdba la b reega a Simo sẽn tʋm b rãmba b tẽngẽ wã ne waoogre. 41A wʋmame tɩ Zʋɩf rãmb ne maan-kʋʋdba ra yet t'a Simo n tog n dɩ maan-kʋʋr naam n ta wakat ning Wẽnd sẽn na n tʋm-b bãngd a to, 42tɩ la segdame tɩ b kõ-a tãnsobendo, la wẽnd dooga yelle gesgo, t'a baood neb niyns sẽn na n ges tʋʋma; n ges nebã, n gũ zab-teedã la zab-teeda roto, 43tɩ segdame t'a ges te-sõma wã yelle, tɩ neba me kelgd-a la b sakd a noore, tɩ la woto wã Noor sẽn yiis fãa, tẽnga yĩng, yi a nengẽ, tɩ segdame t'a fut yɩ nufa, t'a fan-teed yɩ sãnem. 44Ned ba a ye, maan-kʋʋd ba a ye, ka tar sor n na n yeel tɩ ka segd ye. Ned ba a ye ka tõe n kɩɩs a noor ye. Neb ka tõe n tigim taab tẽnga pʋga t'a zɩ tiir ye; ned ka ka tõe n yeelg nufa la a fam a meng ne sãnem ye. 45Ned ninga fãa sẽn na n maana tɩ pa zems b sẽn wilg ka wã, sẽn zãgsa t'a kõn deege, yẽ soab na paam sɩbgre. 46Neba fãa yãeeme tɩ segdame t'a Simo paam b sẽn sõd bũmb ning ka wã fãa. 47A Simo sakame, n tʋm maan-kʋʋr tʋʋmde: n sak tãnsobendo, n dɩ naam Zʋɩf rãmba ne b maan-kʋʋdba zugu, n lʋɩ buuda fãa taoore.
48B kõo noore tɩ b gʋls woto kut zugu la b ning b wẽnd dooga pʋga tɩ neb fãa tõog n karem. 49B kɩtame tɩ b gʋls sẽn togsã sɛb a taab zugu n bĩng arzɛka doogẽ, a Simo ne a kamb yĩnga.»
Currently Selected:
1MAKABE 14: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.