1MAKABE 13
13
A Simo n led a Zonatã
1A Simo wʋmame t'a Trifõ tigsa neb ka tɛka n na n tɩ wã Zɩɩda tẽn-peelem. 2A yãeeme tɩ tẽnga tõr rigda rabeem. 3A tigsa nebã n sagl-ba: «M pa tẽed tɩ ned beeme n pa wʋm maam ne m kẽem dãmba la m yaopa la m buuda sẽn maan bũmb ning ne Wẽnd pʋgb la ne b do-sõngã manegre ye. M pa tẽed tɩ ned beeme n ka wʋm zabã la yel-beed ning sẽn lʋɩ d zuga ye. 4M ba-biisa fãa kii rẽ yĩnga, n-ye, yaa rẽ yĩng la b ki yã, n bas maam m yembre bala! 5Mam pa baood n na ligl m yõor ye. M saka namsg buud fãa tɩ mam ka yɩɩd m saam-biisa ye. 6Dũni wã ninsaalb dɩta beem ne tõndo, n sũ taab n na n kʋ-d zãnga, la m na zab ne-ba n dol wẽng ninga b sẽn maan ne d buudã, ne d do-sõngã, ne d pagba la d kambã.» 7A Goama sẽn lʋɩ neba tʋbrẽ la raood sẽn le wa. 8B naaga taab n moone: «Foo la tõnd koagenda; foo n deeg a Zonatã naam Zɩɩda tẽngẽ. 9Lebg tõnd tãnsoaba la f sẽn na n yeel-d tɩ d maan bũmb ninga, d na maane!» 10A tigma sẽn tõe n zab-ba fãa la b zɛɛga ne Zerizalɛɛm lalsã la a lal-gũbra yikri. 11A tʋma a Absalom biig a Zonatã Zope tẽng ne tãb-biis zembala. A diga bɛɛba, a kẽ b tẽngẽ n soog-a.
12A Trifõ me yii Ptolemayis ne tãb-biis ka tɛka n dɩk Zɩɩda sore. A Zonatã tũume la rẽ tɩ b balg-a-la bãnga. 13A Simo wẽ-la a sik Adida tẽn-nabrẽ. 14A Trifõ bãngame t'a Simo ra segend n na n taka zabr ne yẽnda t'a tʋm tɩ b tɩ yeele: 15«Ad tõnd sẽn balg a Zonatã bãngã, yaa ligd poorẽ, ligdã sẽn da tog n yao dĩma poorẽ, tɩ yẽ n da so yɛlã. 16Dɩlla tʋm tɩ b wa ne wanzurf sẽn ta neb koabg la pis-tã la a nu zɩɩbo la f tũnug a kamb a yiibu tɩ b wa reeg a zĩiga tɩ d zoeta a sã n wa yi roogo bɩ a lebg tõata. Y sã n maan wa m sẽn wilgã a Zonatã na le paam a menga.» 17A Simo bãngame tɩ yaa zirẽ la b yagda, ne rẽ fãa a toola ligdã la kamb a yiibã. 18A ra zoeta neba na n wa rɩ beem ne-a n yetẽ: «Yaa ligda sẽn pa toola yĩng la b kʋ a Zonatã.» 19Ligda ne kamb a yiiba taa a Trifõ la a maana zãmbo n ka bas a Zonatã ye. 20A Trifõ yik n kẽe tẽngã n na n wãa-a. A wẽnemd n tũu Adora. A Simo ne a neba ka kõ-a sor ye. 21Sẽn da be b zabr kõn-ling-m doogẽ wã tʋmame tɩ b tɩ yeel a Trifõ t'a tũ weoogẽ wã n wa sõng-b ne rɩɩbo. 22A Trifõ yii ne a wed-dʋʋdba fãa n na n kẽng b sõngr la badaare sapɩlem dʋʋga wʋsgo t'a pa tõog n zãag zĩig ye. A tɩ wẽe a sik Galaad tẽnga. 23A Trifõ sẽn waa n kolg Baskama a kʋ-la a Zonatã la a mum-a-la be. 24A Trifõ lɛɛg n leba a tẽngẽ.
25A Simo kɩtame tɩ b tɩ wa ne a kẽema yĩnga la a mum-a-la Modin, b yaab rãmb tẽngẽ. 26Israyɛl gill maana a kʋʋre n yãb-a n kaoos. 27A Simo kɩtame tɩ b me a ba la a kẽem dãmba yaad ne kug sẽn pees n ya saalg zĩig zãnga, bũmb sẽn lugi n tõe n yãend al yɩɩga. 28Rot sẽn sɩng yaleng b tẽngr n baasd sɩlemse b yĩngr la a me bãmb b yopoe n yegl taaba: a ba la a ma la a kẽem-dãmb a naasa tẽegr yĩnga. 29A mee lals gils sẽn tão n kul yĩngri. A mee-b lame n gilgi yaadã, a me-b lame n na n paam n tẽegd sẽn ki-ba yell daar fãa, a gesa b zugẽ wã n dõog la a yaglg koom-kogendo. A maan-b lame tɩ sẽn be-b mogra zug tõe n yãend-ba. 30Yaa woto la a Simo me a meebã Modin yaadẽ, la a keta ne rũnna.
A Demetriyus tara a Simo neere
31Dĩma a Antiyokus ra ket n yaa bilfu la a Trifõ zãmb-a lame n kʋ-a. 32A reega a zĩig n fõgneg Azi naam pugla. A tʋma tʋʋm wẽnse. 33A Simo maneg n mee Zɩɩda tẽnga. A ninga ro-wogd la lals bɛd-bɛd n gilgi n ning kʋɩlens sẽn sogd ne kutu. A kẽe zab-teeda bĩngr zĩigẽ n ning koodo. 34A yãka neb n tʋm a Demetriyus nengẽ tɩ b kos-a t'a bas b taal ne yaood buud fãa t'a Trifõ ra pɩɩs-b-la zãng kas. Bũmb da ka le ket b nugẽ ye. 35Dĩm a Demetriyus leok-a-la wala a noor sẽn da yiisi. A gʋls-a-la woto:
36«Dĩm a Demetriyus n pʋʋsd a Simo, dĩm dãmb zoa la maan-kʋʋd kãsenga la a naagd n pʋʋsda tẽnga kãsem-dãmb la Zʋɩf rãmba buudu. 37Yaa ne sũ-noog kãseng la d reeg sãnem gilgã la laoga a taabã y sẽn toolã, la d nong n yẽsa laafi yẽsgo ne yãmba la d gʋlsa fadga rãmb tɩ b woog y samdã. 38D sẽn yals bũmb ning ne yãmbã kõn teem ye, zab-teeda bĩngr dotã y sẽn me wã yaa yãmb n so. 39Y tudgr la y kongr buud fãa paama sugri dũnna. Sãnem gilgu la d da tog n deeg y nengẽ la d basda taale wala bũmb ning fãa d sẽn da tog n deeg Zerizalɛɛm. 40Neb sã n be yãmb sʋka n dat n lebg tãb-biis niyns d sẽn na n yãk n gũnug d mengã, d tõe n gʋls-b-la d tãb-biisa sʋka tɩ laafi kell n zĩnd d sʋka.» 41Yaa Grɛk rãmba zamaanẽ koabg la pisopoe yʋʋmdã la Israyɛl yi bu-zẽmba yembdẽ. Yʋʋmd kãng n waa n lebg b geels yʋʋmde. 42Tẽnga rãmb yɛla toɛ-toɛ, wala b raaga, b koosem, b sɛdg sẽn sede daar ninga tiig n gʋlsda woto marsã: «Woto raare, Maan-kʋʋd kãseng la Zʋɩf rãmb tãnsoab a Simo sẽn lebg naab tɩ rɩẽ bɩ yʋʋm bɩtẽ bɩ a naama pipi yʋʋmde.»
Gezɛr wãabo
43A Simo wa n gũbga Gezɛr ne a tãb-biisi n baood a wãabo. A kaa bũmb sẽn lug n kul yĩngri la sẽn tõe n tus tɩ kẽnge. A tall-a lame n wa rell Gezɛr lal-gũbrã. A wurga võore n paam n kẽ tẽnga pʋga. 44Neb n zĩnd a sẽn da ka bũmb ninga pʋga n yɩk n kẽ tẽngã la neba yɛɛsa wʋsgo. 45Tẽnga pagb la kamb dʋʋ lal-gũbrã n kẽesd b fut la b noonẽ n kot a Simo t'a bas tɩ zabra sɛ. B ra yetame: 46«Da maan ne-do wala d wẽnema sẽn tog ne, maan ne-do wala f nimbãan-zoeer sẽn wilg fu.» 47A Simo zemsa a moor ne bãmba n bas zabre. A rig-b lame bala n yiis tẽngã n yiis a zirẽ-beed wẽnd-dãmbã n yɩlg tẽngã n yaool n na n kẽ ne pẽgr la bark pʋʋsg yɩɩla. 48A sẽn yɩlg tẽnga ne a rẽgd buud fãa, a kẽesa neb sẽn mi Wẽnd waoogre. Tẽnga lals sẽn zẽk n sɛ a mee roog a meng yĩnga.
49Sã n ya sẽn da pag-b mens Zerizalɛɛm zabr kõn-ling-m dooga pʋga b ra ka le tõe n yi n kẽng b pʋtẽ la b lɛɛg n wa ye, b ra ka le tõe n koos bɩ n da bũmb ye. Woto kom zaba ne-ba tɩ wʋsg tol n ki. 50Bãmb me sẽn kos a Simo t'a bas tɩ zab sɛ, a sakame. A yiisa bãmba, n yɩlg zaka zãnga. 51Koabg la pisopoe la a ye yʋʋmde, kiuug a yiib soaba, pisi la a tãab raare, Zʋɩf rãmb kẽ-la a pʋgẽ ne kilsgu, n zãad koms vãado tɩ ruudg la kʋnde la kɛm wẽedẽ, tɩ pẽgr la bark pʋʋsg yɩɩl sãta, tɩ b bɛ kãseng la b lub yã, la b yaa n tus-a lame n yiis Israyɛl tẽn-peelmẽ. 52A Simo kõo noore tɩ yʋʋmd-yʋʋmd fãa bɩ raarã yɩ kibs kãseng raare. A maneg n me zabr kõn-ling-m dooga sɛɛga, wẽnd dooga sẽn zao tãng ning zugã, roogo a ye, yẽ ne a zak rãmb yĩnga. 53A Simo sẽn mik t'a biig a Zã yaa nin-sõngo, a kõ-a-la tãnsobend naam la a kẽes-a-la Gezɛr tẽnga.
Currently Selected:
1MAKABE 13: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.