1MAKABE 11
11
A Ptoleme a 6 soaba la a Aleksãndr Balas kũum
1Ezipt dĩma a Ptoleme tigma tãb-biis sẽn ka tɛka wa mogr noorẽ bĩisri, n paas koom kogendo, n tʋlg ne rabaare, n deeg a Aleksãndr soolma n paas a rẽnna. 2A waa Siri ne gom noodo tɩ neba ra pakd b tẽns kʋɩlens t'a kẽedẽ la b segd-a ne waoogre wala a Aleksãndr sẽn da kõ noore, t'a ra yaa a rɛɛmba. 3Mik a Ptoleme sã n da paam n kẽ tẽngẽ fãa, a ningda tãb-biis be. 4A sẽn wa n kolg Azot, b wilg-a-la a Dagõ wẽnd doogã sẽn dɩ bugum, n wilg-a Azot meng ne a tẽn-toos sẽn lebg raboogo, n wilg-a neb sẽn ki n dɩga, tɩ bugum dɩ kẽer n keese. Sɩda rĩma ra tõe n yãeeme, a sẽn tũud sor ning fãa, neb ka tɛka a Zonatã sẽn da kʋ n gãnege. 5B tʋlgame tɩ dĩma sãbs a Zonatã, yaa rẽ la b wilg-a a Zonatã sẽn maan fãa. La dĩma ka yeel tɩ bũmb ye. 6A Zonatã tol n kẽe Zope ne ziiri n bʋʋg dĩma be tɩ b pʋʋs taaba. A tol n gãanda be. 7A tol n yãag-a lame n ta Elewutɛr kʋɩlga n yaool n lɛɛg n wa Zerizalɛɛm.
8Dĩm a Ptoleme tõoga mogra noor tẽnsã n tãag Selesi (yaa Selesi ning sẽn be-a Mogr noore). A ra baoodame n na n tʋm a Aleksãndr beedo. 9A toolame tɩ b yeel a Demetriyus: «Wa tɩ d yẽs tɩ ned kam fãa sũur gãande. M biig ninga sẽn yaa a Aleksãndr pagã, m na reeg-a n kõ-fo la m na n lebs-f-la f ba zaoorẽ. 10M sẽn dɩk m biigã n kõ-a wã pa noom-m marsã ye t'a baoo n na n yãka m yõore.» 11Yaa a Aleksãndr sẽn da rat n fã a soolma la a ra gomd woto. 12A sɩd deega a biigã n kõ a Demetriyus. A yila a Aleksãndr poorẽ la b lebga beem ne taaba. 13A Ptoleme kẽe Antiyos la a teega a rĩir ne makr sẽn wilgd t'a lebga Azi naaba. Yaa makr a yiib la a ra teeg yã: Azi naam makre, Ezipt rẽnna. 14Wakat kãng t'a Aleksãndr meng bee Silisi. Beelẽ dãmba da baood n na n fʋsg n yi-la a soolmẽ. 15A sẽn wa n bãng yɛla nao la a baoo n na n zab ne a Ptoleme. A Ptoleme yii ne tãb-biis ka tɛka la b sega taaba t'a Aleksãndr lɛɛg n zoe. 16A zoe n diga Arabi n paam n põse. A Ptoleme n tõoge. 17Arabi rao sẽn boond t'a Zabdiyɛl fiuuga a Aleksãndr zugu n tool a Ptoleme. 18La rasem sẽn maan a yi a Ptoleme me kiime la tẽnga yik n kʋʋ Ezipt ned fãa sẽn da be b sʋka. 19Grɛk rãmb zamaanẽ, koabg la pisoob la a yope yʋʋmdã, a Demetriyus lebga na-kãsenga.
A Demetriyus ne a Zonatã
20Wẽnd kãnga, a Zonatã tigma Zɩɩda nebã n tak zabr ne Zerizalɛɛm dãmba sẽn da pag b mens zabr kõn-ling-m doogẽ wã. B waa n tedga zab-te-bɛda n na n wã tẽngã. 21Nin-yaals sẽn da kis b buudu kẽng n tɩ togsa dĩma t'a Zonatã wẽe gũbri, a wẽe zabr-kõn-ling-ma gũbri. 22Dẽ puuga dĩma sũuri. A tʋbr sẽn wʋme, tao-tao bala a Demetriyus rɩka Ptolemayis sore. A sẽn ta be la a sẽn gʋls a Zonatã n yeel-a t'a yik tʋʋlg-tʋʋlg n wa tɩ b yẽse. 23A Zonatã wʋma a sẽn togsã la a kell n gũbga tẽngã. A kẽe Israyɛl nin-kẽemsa la maan-kʋʋdba sʋka n yãk a tũud-n-taase la a lʋɩɩ b taoore. A ka zoe a yõor yãkr rabeem ye. 24A yii ne wanzurf, ne sãnem, ne fu neeba la kũun a taaba n dɩk Ptolemayis sore, n ta dĩma nengẽ t'a sũur maage, t'a ka le ges-a kegr-kegr ye. 25Nin-yaals kẽer sẽn ka le tũud rog-n-mika tɩ rõd-a-la dĩma nengẽ. 26Ne rẽ fãa dĩma maana ne a Zonatã wala pĩnd dĩm dãmba, n zẽk a yʋʋr a zo-rãmba faa taoore. 27Yẽ n kell n yɩ maan-kʋʋd kãsenga, a naam pa woog ba bilf ye la a sõd-a-la a zo-rãmb kãsens sʋka. 28A Zonatã kosame tɩ dĩma yiis yõor yaoodẽ Zɩɩda tẽng rãmba la Samari tẽnsa sẽn da rɩk n fãoog ne Zɩɩda wã. A kãabame tɩ yʋʋmd fãa a na kɩs dĩma wanzurf sẽn ta neb kobs-naas zɩɩbo. 29Dĩma sakame la a yiisa sebre dẽ yĩnga, la ad bũmb ning sẽn da gʋls sebra zugu:
30«Dĩm a Demetriyus n pʋʋsd a yao a Zonatã la Zʋɩf rãmb fãa. 31M toola sebr yãmb poorẽ d saam-biig a Lastɛn. Yaa seb kãng me la d toond yãmb tɩ y bãng sẽn be a pʋgẽ. 32Dĩm a Demetriyus n pʋʋsd a saamb a Lastɛn. 33D yeelame tɩ d na n maana neere ne Zʋɩf rãmbã tɩ b yaa zood ne tõndo. B yaa nin-tɩrse la b pa rat tõnd ne wẽng ye. 34M wilgd-b lame tɩ b soo Zɩɩda tẽnga n paas tẽns a tã sẽn dɩk n fãoogã: Aferema, Lida la Ramatayim. Tẽn-kãens ne b tẽn-toosa boka Samari soolmẽ, n na n paas Zɩɩda rẽnna, n na n sõng sẽn kʋʋd-b maanda Zerizalɛɛm. Kõn le yɩ modgr ne bãmba tɩ b kɩs rĩma a sẽn da reegd yʋʋmd-yʋʋmd fãa wã ye. 35Dũnna tɛka d basd-b-la taale ne yaood buud fãa sẽn da tog n deeg b nengẽ wala kood rẽemse bɩ yamsem, bɩ bũmb a to. 36D sẽn yals bũmb ning ka wã kõn teem dũnna bɩ beoog ye. 37Modg-y n gʋls m sebra sẽn wilg fãa n tool a Zonatã t'a reeg-a n ka tãn-sõnga zugu, zĩig ninga neb fãa sẽn tõe n karem-a.»
A Zonatã sõngda a Demetriyus
38Dĩm a Demetriyus yãeeme tɩ tẽnga da tara laafi a nugẽ la ned ba a ye da pa zẽkd a zug ye. Dẽ la a bas a tãb-biisã tɩ ned kam fãa leb a zakẽ. Sãamb kẽer bal la a kell yã. B tẽnga yaa tẽn-bõones sẽn puk koom sʋka, bu-zẽmb dãmb zamaanẽ. Yaa rẽ la tãb-biisa sẽn ya-b tẽnga kamba yik n maand beem ne a Demetriyus, a sẽn bas-ba yĩnga. 39A Trifõ da kẽeda a Aleksãndr. A sẽn mik tɩ tãb-biisa fãa da guglumda ne a Demetriyus, a tɩ yãenda Arabi dao a Iamlekos sẽn da gʋʋnd a Aleksãndr bi-bilf a Antiyokus. 40A wɩnga a Iamlekos t'a bas t'a loog ne biigã n tɩ kõ-a a ba naam. A wilga a Demetriyus sẽn maan fãa, a wilga tãb-biisa sẽn da rɩt beem ning ne-a. A paa be n kaoose.
41A Zonatã tʋma wakat kãng tɩ b tɩ yeel a Demetriyus t'a yiis tãb-biis sẽn da ket n bob zabre n be Zerizalɛɛm do-lug-lugã la dot a taab pʋgẽ. 42A Demetriyus leoka a Zonatã: «Ka rẽ bal la m na n maan foo ne f buuda yĩng ye, m na modg tɩ Wẽnd sẽn kõ-m daare bɩ foo ne f buuda paam waoogre. 43Fo sẽn na n maan tɩ m pẽge, yaa f tʋm tãb-biis sẽn n n wa sõng-ma n tak zabre tɩ m ka le tar tãb-biig ba a ye ye, m neba zoe n bas-m lame.» 44Yɩɩ woto la a Zonatã tees Antiyos tãb-biis tus a tã sẽn mi zabr neere. B sẽn ta dĩma nengẽ, a sũur yɩɩ noogo. 45Bãng-y tɩ wakat kãng tɩ tẽnga neba ra tigma taab bãmb na ta tus koabg la pisi, tẽnga tẽnsʋka, n baood n na n kʋ dĩma. 46Dĩma zoe n tɩ kẽe a zakẽ la tẽnga rãmb yãmba soeyã fãa n sigl zabre. 47Dĩma boola Zʋɩf rãmbã tɩ b wa sõng-a. B reng tigma dĩma sɛɛgẽ n yaool n sẽeg n kẽ tẽngã la b sẽn kʋ baraare taa tus koabga. 48B yõoga tẽnga bugum, b wʋka laog sẽn ka tɛka la b fãaga dĩma. 49Tẽnga rãmb sẽn wa n mik tɩ b zãng lʋɩɩ Zʋɩf rãmb nugẽ, b basa raoodo la bõsa sugri. 50Ad b sẽn yeele: «Tud nug tɩ d maan zoodo, tɩ Zʋɩf rãmba bas zabr ne-do, ne tẽngã.» 51B sɩd rɩka b zab-teedã n lobe, n bas zabre. Zʋɩf rãmba yʋʋr zẽka dĩma taoore la a soolma rãmb taoore. B yʋʋr sẽn yi woto, b lɛɛg n waa Zerizalɛɛm ne laog kãsenga. 52A Demetriyus naam paama pãnga la a maasmẽ tẽnga paama laafi. 53A waa n yik n lebsa a zelemde t'a moor yõsg ne a Zonatã. A yĩma a Zonatã sẽn sõng-a to-to n tar a yaoolg beoog sẽn vẽeg fãa.
A Zonatã ne a Demetriyus zabre
54Dẽ sẽn looge, a Trifõ lɛɛg n waa ne a Antiyokus. Ne a sẽn da ket n ya bilfã b fõgneg-a-la naam pugla t'a sɩng naam dɩɩbo. 55A Demetriyus sẽn dasʋk n bas tãb-biis niynsã, lɛɛg n kẽe a Antiyokus. B sẽn zab ne a Demetriyus b tõog-a lame la a zoeeme. 56A Trifõ kẽnga ne wobdo n zab n deeg Antiyos.
57Yaa woto la dĩm bila a Antiyokus gʋls a Zonatã: «M ket n basda maan-kʋʋr naam ne foo; soog tẽns a tã la Akrabatɛn sẽn dik n fãoog ne Zɩɩda tẽngã la pa m zo-rãmb sʋka.» 58A kɩtame tɩ b tool a sãnem laase la rɩɩb lagdo, n kõ-a sor t'a yũ ne sãnem wamde la a yeelg nufa la a sog sãnem mambre a kokorẽ. 59A kõ-la a yao a Simo tãnsobendo t'a na n gũ Tir tẽn-peelem n tãag Ezipt toaaga. 60A Zonatã sɩnga Efrat dʋund tẽn-bɛda la tẽn-bõonega saagre. Siri tẽng tãb-biig fãa tɩ kẽe a tãpo, n lebg a sõangda. B taa Askalõ tɩ tẽnga rãmb deeg-b ne waoogre. 61A yii be n ta Gaza; Gaza ka pak a tẽng noor t'a kẽ ye, la a gũbg-a lame n yõog-a la a zɛ a tẽn-toosã. 62B waa n yõka a Zonatã sɛɛga la a bas-b-la laafi. Nanamsa kamb la a sʋgs yã, goam na n wa be beoog yĩnga, n tʋm b Zerizalɛɛm. A saaga tẽnsã n ta Damas. 63A Zonatã wʋmame t'a Demetriyus tãnsoaben-dãmba waa Kedes, Galile tẽn-peelmẽ, ne tãb-biis ka tɛka la b raaba yaa b modg a Zonatã t'a tar n leb poorẽ. 64A Zonatã basa a yao a Simo tẽnga pʋga n yaool n yi n tɩ seg-ba. 65A Simo gũbga Bɛtsur; zabra kaoosame la tẽnga rãmb sẽn mik tɩ b pa na n põse, 66b kosame n na n gom laafi goama. A Simo basame n pa le zab ye. A kɩtame tɩ b pak b tẽngã t'a kẽ ne a tãb-biis n deeg-a n yãmbe. 67A Zonatã me ra tɩ wẽe sik ne a Tãb-biisã Zenesar noorẽ, n vẽeg beoog n ta Asor. 68Nin-zẽmba tãb-biisã welga taab sags a yi tɩ kẽer na n seg a Zonatã tẽn-nabrẽ, kẽer na n lill tãmsẽ tɩ b na soos n ling-ba. B sẽn waa n babsd Zʋɩf rãmba tẽn-nabrẽ, 69sẽn da be-b tãnga zugã yi-la b pẽgsẽ n na n sɩng zabre. 70A Zonatã tãb-biisa zoeeme. Ba a ye ka pa ye sã n ka a Absalom biiga a Matatiyas la a Kalfi biig a Zɩɩda. Bãmb b yiiba fãa da yaa tãnsoaben-dãmba. 71A Zonatã kẽesa a futu n wʋk tõm n yugl a zugu n sɩng pʋʋsgo. 72A sẽn lɛɛg n wa tak zabre, bɛɛba zoeeme. 73A neba da sɩnga zoeese la b sẽn yãend rẽ b lɛɛg n wa sõng-a lame la b riga b bɛɛbã n ta Kedɛs, b sika zĩigẽ. B tol n paa be n gãande. 74Bɛɛba sẽn ki baraar taa tus a tã. A Zonatã leba Zerizalɛɛm.
Currently Selected:
1MAKABE 11: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.