1KORẼNT RÃMBA 15
15
Yĩns vʋʋgr yelle; Krista vʋʋgre
1M le tẽegda yãmba, m saam-biisi, Koe-noogã m sẽn moon yãmbã; y reeg-a lame la y ket n tar-a-la sõmbo. 2Yẽ n na n fãag yã, y sã n kell n tall-a neere wala m sẽn wilg-a yãmbã, ka rẽ y tẽeba wat n yɩɩ zaalem.
3 #
Iz 53,5-12. Yaa mam meng sẽn da reng n wʋm la m togs yã, tɩ Krista kii d yel-wẽna yĩnga, wa Sebr sõng sẽn togse, 4#Yɩ 16,8-10; Mt 12,40; Tv 2,24-32. tɩ b solg-b yaoogẽ, la rasem a tãab raare, b vʋʋgame, wala sẽn le gʋls yɛsa; 5#Mt 28,16-17; Mk 16,14; Lk 24,34, 36; Zã 20,19. tɩ b lika b meng a Kefas la piig la a yiibã; 6dẽ poore yaa saam-biis sẽn ta kobs-nu la b lik yã — bãmb wʋsg keta ne yõore, kẽer bal n ki — 7tɩ b lika a Zak la tʋʋm-tʋmdba fãa. 8#Tv 9,3-6. Dẽ poor marsã la b yaool n lik maam me, maam b bõn-mɛdga.
9 #
Tv 8,3. Sɩda, maam la tʋʋm-tʋmdba fãa yao-zʋʋga; m da pa tog meng ne tʋʋm-tʋmd yʋʋr ye, tɩ m namsa Wẽnd Tigengu. 10La Wẽnd bark kɩtame tɩ m ya m sẽn ya-lã la b barkã ka pa n ka wom a biis ye. M ka tõe n ka ges m meng wa tʋʋm-tʋmd ye, tɩ m tʋmame n yɩɩg b fãa; la yaool n ka maam n tʋm ye, yɩ Wẽnd kũuna b sẽn kõ-ma n tʋm b tʋʋmde.
11Yaa bãmb woo, yaa maam woo, yaa woto la d moonda. La yaa rẽ me la y reeg yã.
12La sã n moond tɩ Krista vʋʋga kɩɩms sʋka, maana a wãn tɩ yãmb neb kẽer yik n yet tɩ kũum ka vʋʋgde? 13Kɩɩms sã n pa vʋʋgdẽ, dẽn Krista me ka vʋʋg ye. 14La Krista sã n ka vʋʋge, tõnd zãmsga yaa zaalem la yãmb me tẽeba zãng lebga zaalem. 15La tõnd n lebg Wẽnd kaset zirẽ-dãmba, d sã n wẽennẽ tɩ b vʋʋga Krista, tɩ b yaool n ka vʋʋg-ba, sã n ya sɩd tɩ kũum ka vʋʋgd ye. 16Kɩɩmsa sã n ka vʋʋgde, dẽn Krista me ka vʋʋg ye. 17La Krista sã n ka vʋʋge, y tẽeba yaa zaalem; y ka yi yel-wẽndẽ ye, 18la sẽn ki-b Krista yĩngã, bãmb me yell sɛɛme. 19Sã n ya tẽng zug vɩɩma yĩng bal la d del Krista, tõnd la dũni wã fãa zu-bʋk rãmba.
20La ayoo! Krista vʋʋga kɩɩms sʋka, la bãmb n deng kɩɩmsa fãa. 21Wala kũuma sẽn tũ nin-yend n wa dũni wã, kɩɩmsa vʋʋgra me na n tũu ne nin-yend maasem. 22Wala d fãa sẽn tũud a Adem n bãng kũuma, woto me d fãa tũuda Krista n le vɩɩnde, 23ned kam fãa ne a wakato: Krista n so taoore, tɩ bãmb la Bi-rẽenga. Bãmb poor marsã neb niyns sẽn ket n be bãmb soolmẽ, b waoonga raare. 24Dẽ poore bũmb fãa na n yãe-la a baasgo la yaa Wẽnnaam Ba la Krista na n lebs b naama, b sẽn wat n lub na-rɩtba, la soaalba la pãn-dãmb buud fãa. 25#Yɩ 110,1. Y mi tɩ yaa tɩlɛ tɩ Krista rɩ naam n tãag wakat ning b naoã sẽn wat n palg b bɛɛba zãnga. 26B yaoolem na-rɩta b sẽn na n lubi, yaa Kũum. 27#Yɩ 8,7. Yẽ lubr poore b sɩd na n paamame tɩ bũmb fãa yaa b soolem.
Bãng-y tɩ sã n gʋls tɩ bũmb fãa sura b taoore, ka naag ne ned ninga sẽn sulg bũmb fãa b taoora ye. 28La bũmb fãa sã n wa lebg bãmb soolem n sɛ, dẽ marsã la Wẽnd Biiga me na n lebg bũmb-fãa-Soaala-soolem, la woto la Wẽnd na n lebg fãa-fãa ned kam yĩnga.
29Sã n dag n kaẽ boto, bõe la neb niyns sẽn sood-b kɩɩmsa yʋʋr yĩnga na n paamẽ? Kɩɩmsa sã n ka na n vʋʋg lɛ-lɛ, bõe tɩ b sood kɩɩms yĩnga? 30Bõe me yĩng la tõnd meng ka na n baoẽ yĩn-maasem n zãag d mens ne yɛl tooda sẽn lʋɩt d zug wakat buud fãa? 31M bee kũum nugẽ beoog sẽn vẽeg fãa la rẽ yaa sɩda, m saam-biisi, sɩd wa y sẽn ya m zu-zẽkre d Soaala Zezi Krista taoore. 32#Iz 22,13. Sã n da yaẽ la ninsaal geels la m geel yã n zab ne Efɛɛz rãmba, b wẽn-naandsa poorẽ, m yõoda la bʋgo? Sẽn ki-ba sã n ka na n vʋʋge, bɩ d rɩ la d yũ tɩ beoogo d na n kiime. 33Da belg-y y mens ye: Tũud-n-ta wẽnse n wat ne vɩɩma sãoongo. 34M kos tɩ y wɩsg y meng tɩ rẽ n toge la y zãag y meng ne wẽnga. Wʋsg bee yãmb sʋka n ket n ka mi Wẽnd, la rẽ ka yãnd sɩda?
Yĩns vʋʋgr sẽn na n yɩ-la
35La f sã n soke: Sẽn ki-ba na n vʋʋga wãn wãna? Yĩin bʋgo la b na n le wa ne? 36Ges wɛ, yalma, fo meng sẽn bʋtã ka lebgd bõn-vɩɩla t'a ka reng n ki ye. 37Fo sẽn bʋta ka bũmb la f võogd n sel ye, yaa bõn-beelle, ka-beelle, bɩ bũmb a to. 38Wẽnd n kõt yako wala b sẽn date, bõn-buud fãa ne a rẽnna.
39Yĩnsa fãa ka a yembr ye: ninsaal yĩng toore, rũng yĩng toore, luiil rẽnd toore, kʋɩl-zẽoog me rẽnd toore. 40Saag zug tara a bõn-yood, tɩ saag tẽngr me tar a rẽnna. Yĩngr teeda yãgbo ne tẽng zug rẽnna ka a ye ye. 41Wĩntoog yãgb toore, kiuug me rẽnd toore, ãdsa me rẽnd toore. Ãdg a ye meng peelem bakda ne ãdg a to rẽnna. 42Yĩnsa vʋʋgr me na n yɩɩ boto. Yaa bõn-põosg la b bʋta la yaa sẽn ka tõe n le põog n vʋʋgde. 43Yaa bũmb sẽn ka tar waoor la b bʋta, la bũmb sẽn pid ne ziir n na n vʋʋge; faoor la b bʋta, la pãng n na n vʋʋge; 44tẽng zug bũmb la b bʋta, la yĩngr dẽn n na n yi.
Yĩng sẽn tõe n deeg tẽng zug vɩɩma sã n beẽ, yĩng sẽn tõe n deeg yĩngr vɩɩma me beemẽ. 45#Bs 2,7. Yaa rẽ la b gʋlsyã: Pipi Adma naaname t'a ya vɩɩm deegda, Adma a yiib soaba yaa vɩɩma kõata. 46Ka sẽn kõt-a vɩɩma la pipi ye, sẽn deeg-a vɩɩma n deng taoore tɩ yẽ yaool n pʋge. 47Pipi soaba yaa tẽng tom, tɩ tẽng tomẽ la a yita; a yiib soaba yita yĩngri. 48Tẽng zug raoã sẽn yɩ a soaba, a kamb me boto, yĩngr daoã sẽn yɩ a soaba, a neba me boto. 49Wala d sẽn wẽneg tẽng zug soabã, lebga pakre tɩ d wẽneg yĩngr soaba me.
50Maam n yet-y, m saam-biisi, ka yĩn-kãnga sẽn ya neong la zɩɩma n na n kẽ Wẽnd Rĩungẽ ye, ka bõn-põosgã n na dɩ sẽn zɩ a põogra faad ye. 51M na n wilga yãmb koɛɛg sẽn yɩɩd ninsaal bãngre: Kũuma, ad-y ka d fãa n na n ki ye; la d fãa yẽ sẽ, d na n tedgame. 52#1Te 4,15-17. Vugr bala, nif kamsg pʋgẽ, baorga sã n tãse, la sɩda baorg n na n peebe, kɩɩmsa fãa na n vʋʋgame n ka le bãng põogr lɛ-lɛ, la tõnd me, tõnd me na n tedgame. 53Bala yaa tɩ-lɛ tɩ yĩn-kãnga sẽn ya bõn-põosgã tɩlg põogr zãnga la yĩn-kiidga tɩlg ne kũum zãnga.
Wẽnd pẽgr yĩnsa vʋʋgr poorẽ
54 #
Iz 25,8. Dɩlla mam yĩn-kãnga sẽn na n põogã sã n wa tɩlg põogr zãnga, la m yĩn-kãnga sẽn na n ki wã sã n wa tɩlg kũum zãnga, dẽ marsã la sebr sõng gomda na n taase: «Pãn-tõog tʋʋmd n tʋʋme n loog ne kũum zãnga. 55#Oz 13,14. Kũum, fo sẽn tʋm daood la bɛɛ? Kũum, fo zab-teed bɛɛ?» 56Mik kũum zab-teed yaa yel-wẽnde la Noorã n kõt yel-wẽnda pãngã. 57La Wẽnd paam bark tɩ bãmb n kɩt tɩ d lub yel-wẽnde, d Soaala Zezi Krista maasem yĩnga.
58Dɩlla, m saam-biisi, modg-y tɩ y raooda ra woog ye la y rabs Soaala tʋʋmna taoore n miẽ t'a kõn yɩ zaalem ye.
Currently Selected:
1KORẼNT RÃMBA 15: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.
