Kañaam 49
49
Ñaaŋ akeţle aanji ya na nin uko uloŋ
1Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki babuk Kore.
2An bañaaŋ bŧi, naŧiinkan !
An bŧi nanfëţuŋ ţi mboş, nawatan ibaţ !
3An bampoţi na baweek, naŧiinkan !
An bayok na bajuuk bŧi !
4Mntum mi naan manţup ŋţup ŋi ñaaŋ nanŧuŋa ;
uhaaş naan uţup iko inţëpuŋ ţi bgah.
5Dwat kabaţ kaŧiink uhoñ ;
dkob bnŧuni kapibanaan uhoñ wi naan.
6We ukaaŋ kë nwo kalënk wal wi nwooŋ ţi unoor,
wi ŋţilan ŋi başoorad naan ŋafooynuŋ ?
7Bahaţ ţi bka bweek bi baka ;
baji banahna pyok pweek pi baka.
8Kë ñaaŋ najën aşë wo aanhil pbuuran aŧënţul ;
aanhil pluk Naşibaţi preeş pi ubida wi nul.
9Preeş plukni ubida wi ñaaŋ patam maakan,
paankëş nin 10ahilna aka ubida wi mnţo
awut kaneej du bhër.
11Uwinana bnuura kë bañaaŋ banwooŋ na uşal unŧuŋa baji bakeţ,
kë bañaaŋ bapën uko na bamënaţaan bakak aji bakeţ
kadukar baloŋ bka bi baka.
12Ihër yi baka iwooŋ itoh yi baka te mnţo,
iwooŋ ŋfëţ ŋi baka ŋwal bŧi,
te badoo ţu mboş mloŋ itim yi baka.
13Kë ñaaŋ najën na mndëm mi nul bŧi aşë wo aanji jon,
aluŋ kakeţ jibi ŋlimariya ŋajaaŋ ŋakeţ.
14Uko wi uwooŋ unkdooŋ banhaţuŋ maakan ţi ŋleef ŋi baka ;
kë banjaaŋ baţaş baka baji balilan ţi ŋţup ŋi baka.
Pnaţ ntiinku
15Bawo wo ji batani bi baŧoofuŋ du mnkeţ ;
kë pkeţ pakyafan baka.
Na nfa bañaaŋ baŧool baloŋ kapoş poşan baka ;
kanuura ki baka kafaawi ;
mnkeţ manwooŋ ufëţ wi baka.
16Kë Naşibaţi aşë luŋ kabuuranaan du mnkeţ ;
aa, aluŋ kajejën.
Pnaţ ntiinku
17Wutan kañoŋar woli ñaaŋ ayoki,
woli mndëm mi katohul manyaha ya kadun.
18Woli akeţi aankñooţ nin uko uloŋ ;
pyok pi nul paankţaşa du bhër.
19Wi awooŋ najeb, aji şal kë awo ţi bnuura ;
iko iţëp bnuura pa a, ukaaŋ kë bañaaŋ baji badëmana.
20Kë işë ya du bateemu,
bukal banwooŋ baankak awin bjeehi.
21Ñaaŋ najën i badëmanuŋ kë aşë waaŋ uşal
anaam ji ulimariya unkkeţuŋ.
Currently Selected:
Kañaam 49: knf
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
