Kañaam 50
50
Naşibaţi awo nawayëş naŧool
Kayeeh ki pñaamarën Naşibaţi ki Aŧaf
1 Yawe Nawat Kabuka Naşibaţi Andëmuŋ Maakan aţiini,
adu bañaaŋ biki mboş bŧi du umbaŋ wi umayar unuur te du kayoba.
2Du Ŧiyoŋ ubeeka unnuuriiŋ maakan
di di Naşibaţi apënuŋ na mndëm mi nul awinana.
3Naşibaţi i nja abi, aankluŋ kabi na byompan.
Abi kë bdoo banjeenuŋ bawo ţi kadunul,
ukëk uweek kë ufooya.
4Ahuuran adu baţi na mboş,
adu baţi na mboş ŋawo bamaar kawayëşaan pntaali pi nul.
5Aji : « Nayitrënan banfiyaarnuŋ,
bandoluŋ bhoŋar na nji na bţeŋan. »
6Baţi baţup kë Naşibaţi awooŋ nawayëş, ul awo naŧool.
Naşibaţi awooŋ nawayëş.
Pnaţ ntiinku
7« Iwi pntaali pi naan, ŧiinkaan, dŋal kaţiini ;
Iŧrayel, dŋal kakeeşaaru.
Nji, dwooŋ Naşibaţi, Naşibaţi i nu.
8Mënţ iţeŋan ikaaŋ kë nji kaŋoman na iwi :
ŋnŧaam ŋi itëradaanuŋ ŋii ŋi ţi kadun naan na ŋnuur.
9Mënkyeenk nin uwit ukaş unwoonuŋ du katohu ;
mënkyeenk ŋpi du itani yi nu.
10Ŋko ŋi uţeeh bŧi ŋawo ŋi naan ;
pntuni pweek pi ŋko ŋanwooŋ du inkuŋ pawo pi naan.
11Dme ŋkaŧ bŧi ŋanwooŋ du inkuŋ ;
ŋko bŧi ŋanwooŋ du uţeeh ŋawo ŋi naan.
12Woli ubon ude'ën lah, mënknuma pţupan ;
mboş manwo mi naan na iko bŧi inwooŋ ţi ma.
13Nji, dji kade uyemaţ wi ngit ŋkaş i ?
Nji, dji kadaan pñaak pi ŋpi i ?
14Beebaan nji Naşibaţi, uwooŋ bţeŋan bi nu,
işë ido iko yi ihoŋuŋ nji Naşibaţi Andëmuŋ Maakan.
15Du'aan wal wi iwooŋ ţi unoor ;
dluŋ kabuuranu işë idëmanaan. »
16Kë Naşibaţi aşë ji ji na ñaaŋ nawuţaan :
« We uwooŋ pkakalëş iko yi nţuuŋ pdo
kawo na bhoŋar bi naan ţi mntum ?
17Iwi impokuŋ pjukan pi naan,
adek ŋţup ŋi naan kafeţ.
18Woli iwin nakiij, iji kdo pnoh na a ;
iji kgakandër na bankjubanuŋ pjuban pi piinţ.
19Iji kbi wo wo na buţaan ţi mntum
kawo na kaguuru ţi pndemënt.
20Iji kţo katapar ayiţu bţup ;
iji kkuut ñaaŋ i nabootuŋ.
21Iko mënţ yi yi idoluŋ, kë nyompan mntum.
Işal aji dwo ji iwi,
kë hënkuŋ nşë ŋoman na iwi kaţup iko mënţ bŧi ţi kadunu. »
22« An nanjaaŋ naţilma nji Naşibaţi naţaafaraan
kaţi mbi mpitëşan kë nin aloŋ aankburanan.
23Pbeebën pawooŋ bţeŋan banjaaŋ badëmanaan ;
kë anjaaŋ aţaaf bgah bi naan,
dluŋ kawula mbuur mi njaaŋ kawul. »
Currently Selected:
Kañaam 50: knf
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
