Aroma 12
12
Gũtungatĩra Ngai
1Tondũ ũcio aariũ na aarĩ a Ithe witũ, nĩ ũndũ wa ũrĩa Ngai anatũiguĩra tha, nĩndamũthaitha mwĩrute ta igongoona rĩ muoyo kũrĩ Ngai, rĩamũrĩirwo ũtungati wake na rĩngĩmũkenia. Ĩyo nĩ yo njĩra ĩrĩa ya ma ya gũthaathaiya Ngai. 2Tigagaai gwĩkaga maũndũ marĩa meekagwo nĩ andũ a thĩ; rekeei Ngai agarũre mwĩciirĩrie wanyu nĩ geetha mũhotage kũmenya wendi wake nĩguo mũhotage gũkũũrana maũndũ marĩa meega, marĩa mamũkenagia na makinyanĩru.
3Na rĩĩrĩ, tondũ wa wega wa Ngai ũrĩa aheete, ngũmwĩra inyuothe atĩrĩ: Mũndũ o na ũrĩkũ ndagetuage mũnene gũkĩra ũrĩa atariĩ. Mwagĩrĩirwo nĩgũtuĩka ahooreri kũringana na wĩtĩkio ũrĩa Ngai agaĩire o mũndũ o mũndũ. 4#1Akor 12.12 Amu o ta ũrĩa mwĩrĩ ũkoragwo na ciĩga nyingĩ na ciothe itirutaga wĩra ũmwe, 5noguo o na ithuĩ, o na tũrĩ aingĩ, tũrĩ mwĩrĩ ũmwe thĩinĩ wa Kristũ, na ithuothe nĩtuohanĩĩtio ta ciĩga mwanya mwanya cia mwĩrĩ ũmwe. 6#1Akor 12.4-11 Na rĩĩrĩ, tondũ tũheetwo iheeo itiganĩĩte kũringana na wega wa Ngai ũrĩa atũheete-rĩ, rekeei tũcihũthĩre. Angĩkorwo nĩ ũrathi, nĩũrathwo kũringana na wĩtĩkio witũ; 7angĩkorwo nĩ ũtungati, nĩtũtungate; angĩkorwo nĩ ũrutani nĩtũrutane; 8ũrĩa wĩ na kĩheeo gĩa kũũmanĩrĩria, nĩomanagĩrĩrie; naake ũrĩa ũheanaga, nĩaheanage na ũtaana; ũrĩa ũheetwo ũnene nĩarutage wĩra na kĩyo, na ũrĩa ũiguanagĩra tha nĩekage ũguo akeneete.
9Rekeei wendani wanyu ũtuĩke wa ma. Thũũragaai maũndũ marĩa mooru, namo marĩa meega mũmarũmagie. 10Endanagaai mũndũ na ũrĩa ũngĩ ta andũ a nyina ũmwe, na mũheanage gĩtĩĩo mũndũ na ũrĩa ũngĩ. 11Rutagaai wĩra na kĩyo, na mũtungatagĩre Mwathani na ngoro yothe. 12Ikaragaai mũkeneete nĩ ũndũ wa kĩĩrĩgĩrĩro kĩanyu; kiragĩrĩriai mathĩĩnainĩ na mũhooyage hingo ciothe. 13Teithagiai andũ arĩa angĩ a Ngai mabatainĩ maao, na mwamũkagĩre ageni mĩciĩinĩ yanyu.
14 #
Mat 5.44; Luk 6.28 Raathimagaai arĩa mamwĩkaga ũũru; mahooyagĩreei kĩraathimo no ti kĩrumi. 15Kenagaai na arĩa marakena, na mũrĩrage na arĩa mararĩra. 16#Thim 3.7 Iguanagaai na andũ oothe, na mũtigetũũgagĩrie. Ikaranagiaai na andũ o na arĩa matarĩ igweta, na mũtikeyoonage ta mũrĩ oogĩ.
17Mũndũ angĩgwĩka ũũru, ndũkerĩhĩrie na kũmwĩka ũũru. Geragia gwĩkaga maũndũ marĩa andũ oothe moonaga marĩ meega. 18Wĩrutanagĩrie o ũrĩa ũngĩhota gũikaranagia na thaayũ na andũ oothe. 19#Gũco 32.35 Eendwa aakwa, mũtikerĩhagĩrie; rekeei Ngai amũrĩhagĩrie na maraakara maake. Nĩ gũkorwo maandĩko moigĩĩte atĩrĩ, “Kwĩrĩhĩria nĩ gwakwa, nĩngwĩrĩhĩria, ũguo nĩguo Mwathani oiga.” 20#Thim 25.21-22 Atĩrĩĩrĩ, mũndũ ũrĩa mũrĩ ũthũ naake angĩkorwo ahũtiĩ, mũhe irio na angĩkorwo anyotiĩ mũhe gĩa kũnyua; weka ũguo ũkũhaana ta arĩ makara marakana mwaki ũramũigĩrĩra mũtwe. 21Ndũgeetĩkagĩre kũhootwo nĩ ũũru, no hootaga ũũru na gwĩka wega.
Currently Selected:
Aroma 12: GKNDC
Highlight
Share
Compare
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
