Popular Bible Verses from Aroma 12

Share

Tigagaai gwĩkaga maũndũ marĩa meekagwo nĩ andũ a thĩ; rekeei Ngai agarũre mwĩciirĩrie wanyu nĩ geetha mũhotage kũmenya wendi wake nĩguo mũhotage gũkũũrana maũndũ marĩa meega, marĩa mamũkenagia na makinyanĩru.

Tondũ ũcio aariũ na aarĩ a Ithe witũ, nĩ ũndũ wa ũrĩa Ngai anatũiguĩra tha, nĩndamũthaitha mwĩrute ta igongoona rĩ muoyo kũrĩ Ngai, rĩamũrĩirwo ũtungati wake na rĩngĩmũkenia. Ĩyo nĩ yo njĩra ĩrĩa ya ma ya gũthaathaiya Ngai.

Ikaragaai mũkeneete nĩ ũndũ wa kĩĩrĩgĩrĩro kĩanyu; kiragĩrĩriai mathĩĩnainĩ na mũhooyage hingo ciothe.

Ndũgeetĩkagĩre kũhootwo nĩ ũũru, no hootaga ũũru na gwĩka wega.

Endanagaai mũndũ na ũrĩa ũngĩ ta andũ a nyina ũmwe, na mũheanage gĩtĩĩo mũndũ na ũrĩa ũngĩ.

Rekeei wendani wanyu ũtuĩke wa ma. Thũũragaai maũndũ marĩa mooru, namo marĩa meega mũmarũmagie.

Wĩrutanagĩrie o ũrĩa ũngĩhota gũikaranagia na thaayũ na andũ oothe.

Eendwa aakwa, mũtikerĩhagĩrie; rekeei Ngai amũrĩhagĩrie na maraakara maake. Nĩ gũkorwo maandĩko moigĩĩte atĩrĩ, “Kwĩrĩhĩria nĩ gwakwa, nĩngwĩrĩhĩria, ũguo nĩguo Mwathani oiga.”

Rutagaai wĩra na kĩyo, na mũtungatagĩre Mwathani na ngoro yothe.

Na rĩĩrĩ, tondũ wa wega wa Ngai ũrĩa aheete, ngũmwĩra inyuothe atĩrĩ: Mũndũ o na ũrĩkũ ndagetuage mũnene gũkĩra ũrĩa atariĩ. Mwagĩrĩirwo nĩgũtuĩka ahooreri kũringana na wĩtĩkio ũrĩa Ngai agaĩire o mũndũ o mũndũ.

Mũndũ angĩgwĩka ũũru, ndũkerĩhĩrie na kũmwĩka ũũru. Geragia gwĩkaga maũndũ marĩa andũ oothe moonaga marĩ meega.

Iguanagaai na andũ oothe, na mũtigetũũgagĩrie. Ikaranagiaai na andũ o na arĩa matarĩ igweta, na mũtikeyoonage ta mũrĩ oogĩ.

Atĩrĩĩrĩ, mũndũ ũrĩa mũrĩ ũthũ naake angĩkorwo ahũtiĩ, mũhe irio na angĩkorwo anyotiĩ mũhe gĩa kũnyua; weka ũguo ũkũhaana ta arĩ makara marakana mwaki ũramũigĩrĩra mũtwe.

Raathimagaai arĩa mamwĩkaga ũũru; mahooyagĩreei kĩraathimo no ti kĩrumi. Kenagaai na arĩa marakena, na mũrĩrage na arĩa mararĩra.

Teithagiai andũ arĩa angĩ a Ngai mabatainĩ maao, na mwamũkagĩre ageni mĩciĩinĩ yanyu.

Amu o ta ũrĩa mwĩrĩ ũkoragwo na ciĩga nyingĩ na ciothe itirutaga wĩra ũmwe, noguo o na ithuĩ, o na tũrĩ aingĩ, tũrĩ mwĩrĩ ũmwe thĩinĩ wa Kristũ, na ithuothe nĩtuohanĩĩtio ta ciĩga mwanya mwanya cia mwĩrĩ ũmwe.