रोमी 8
8
पवित्र आत्माग्याम याङ्बा जुनी
1थेतबासेलमा दाहेन्से ख्रीष्ट येशूदेन छ्याम गिक तबा म्हिगदेदा परमेश्वरसे सजाय आपिन। 2तिग्दा भिसम ख्रीष्ट येशूग्याम जुनी पिन्बा पवित्र आत्माला शक्तिसे य्हाङदा पापदेन सिबाला शक्तिग्याम थार्ना लबा मुला। 3म्हिला ह्राङलान पापी बानीबेहोरसे ठिमदा कमजोर तना लबासेलमा ठिमसे लबारी आखम्बा गे परमेश्वरसे लजी। परमेश्वरसे ह्राङलान झादा पापी म्हिला ह्रङ्बान ल्हुइरी पुइखसी म्हिला पापला लागिरी बलि तपुङ्जी। ओच्छे थेलान ल्हुइग्याम पापला शक्तिदा नाश लजी। 4चुह्रङ् लसी पापी बानीबेहोर अन्छार भ्रबारी आहिन, तर पवित्र आत्मासे कुल्बा अन्छार भ्रबा म्हि य्हाङग्याम परमेश्वरला ठिमसे म्हन्बा ताम पूरा तबा मुला।
5पापी बानीबेहोर अन्छार भ्रबा म्हिगदेला सेम पापी बानीबेहोरदा सेम निबा तामरी तमुला, तर पवित्र आत्मासे कुल्बा अन्छार भ्रबा म्हिगदेला सेम पवित्र आत्मादा सेम निबा तामरी तमुला। 6पापी बानीबेहोर अन्छार जे भ्रबा सेम लबा म्हि चा सिला, तर पवित्र आत्मासे म्हन्बा अन्छार भ्रबा सेम लबा म्हिसे चा शान्तिदेन जुनी याङ्ला। 7पापी सेमला तहरी चिबा म्हिगदे परमेश्वरला शत्रु हिन्ना। तिग्दा भिसम थेनीगदे परमेश्वरला ठिम अन्छार भ्रएनोन आभ्र ओच्छे भ्रबारीएनोन आखम। 8पापी सेमला तहरी चिबा म्हिगदेसे परमेश्वरदा ताङ्ना लबारी आखम।
9चुदे एनीगदे न्हङ्री पवित्र आत्मा धन्छ्याजी भिसम एनीगदे पापी बानीबेहोररी आहिन, तर पवित्र आत्मारी तला। तर खालै म्हिदेन छ्याम ख्रीष्टला आत्मा#८:९ चु पदरी पवित्र आत्मादेन ख्रीष्टला आत्मा भिबा गिकनोन हिन्ना। आरेसम थे ख्रीष्टला म्हि तनोन आखम। 10चुदे ख्रीष्ट एनीगदे न्हङ्री धन्छ्याजी भिसम पापसेलमा एनीगदेला ल्हुइ सिसी निसैनोन एनीगदे परमेश्वरदा सेम निबा म्हि दोबासेलमा एनीगदेला आत्मा चा सोला। 11परमेश्वरसे ह्राङला आत्मासे ख्रीष्ट येशूदा सिबाग्याम दोःसी ल्हुइरीन सोना लजी। थेनोन परमेश्वरला आत्मा एनीगदे न्हङ्री धन्छ्याजी भिसम एनीगदेला सिसी निबा ल्हुइदाएनोन थेसे सोना लला।#१ कोरि ३:१६
12थेतबासेलमा ज्योज्यो आले नाना आङागदे, य्हाङसे लतोःबा गे मि ल्हानान मुला। तर चु गेगदे य्हाङला पापी बानीबेहोरला तहरी चिसी लबा आहिन। 13तिग्दा भिसम एनीगदे ह्राङलान पापी बानीबेहोरला तहरी चिजी भिसम एनीगदे सितोःला। तर चुदे पवित्र आत्माला शक्तिग्याम थे पापी बानीबेहोरदा नाश लजी भिसम एनीगदे सोला। 14परमेश्वरला आत्मासे उन्बा ग्यामरी भ्रबा म्हिगदे जे परमेश्वरला कोलागदे हिन्ना। 15तिग्दा भिसम परमेश्वरसे एनीगदेदा घ्याबा स्होसी लोङ्ना लबा आत्मा पिन्बा आहिन, तर एनीगदेदा परमेश्वरसे ह्राङलान कोलागदे दोबा आत्मा पिन्बा मुला। थे आत्माग्यामसे य्हाङसे थेदा “आबा” भिसी पाङ्मुला।#मर्कू १४:३६; गला ४:५-७ 16य्हाङ परमेश्वरला कोलागदे हिन्ना भिसी पवित्र आत्मासे य्हाङला आत्मादा घोना लबा मुला। 17य्हाङ परमेश्वरला कोलागदे हिन्सम य्हाङ परमेश्वरला हक याङ्बा म्हि हिन्ना। ओच्छे चु हक ख्रीष्टदेन छ्याम गिक तसी याङ्ला। थेह्रङ् लसीन ख्रीष्टसे नाबा दुख य्हाङसेनोन नाजी भिसम ख्रीष्टसे याङ्बा मान य्हाङसेनोन याङ्ला।
लिच्छा याङ्बा मान
18य्हाङसे लिच्छा याङ्बा सुखदेन घ्रेन मान दन्दे य्हाङसे नाबा दुखदेन छ्याम दाँजब लबारी आखम भिबा ताम ङादा था मुला। 19पाङ्नोन तोःमा, परमेश्वरसे ह्राङलान कोलागदे उन्बा धिन च्याबारी परमेश्वरसे स्होबा जम्मान स्हेसे सेम लसी थे धिन भ्रान्सी चिबा मुला। 20तिग्दा भिसम जम्मान स्हे गेआखेल्बा तबा मुला, थेनीगदेसे म्हन्बा अन्छार चुह्रङ् तबा आहिन। तर परमेश्वरसेन थेनीगदेदा थार्ना लबा धिनना आश लसी चुह्रङ् लबा हिन्ना। 21परमेश्वरसे स्होबा स्हेगदेदाएनोन तिरेकुनु नाश तबाला शक्तिग्याम फेला, ओच्छे थेनीगदेसेनोन परमेश्वरला कोलागदेसे याङ्बा ह्रङ्बान घ्रेन थार्बा याङ्ला।
22थेनीगदे जम्मासेन कोला न्हबा बेथा याङ्बा म्रिङ्म्हेमेगदेसे दुख नाबा ह्रङ् लसी दन्देधोना दुख नासी चिबा मुला भिबा ताम य्हाङदा था मुला। 23थेनीगदे जे आहिन, तर परमेश्वरसे पिन्बा ङाच्छा रेमला उपहार पवित्र आत्मा याङ्बा म्हि य्हाङएनोन परमेश्वरला कोलागदे दोबादेन ल्हुइ पूरन पापग्याम फेबाला लागिरी सेमरी दुख नासी परमेश्वरला ग्याम च्यासी चिबा मुला।#२ कोरि ५:२-४ 24तिग्दा भिसम य्हाङ चुनोन आशग्याम थार्बा मुला। आश लबा भिबा चा य्हाङसे तिगै स्हे याङ्बाला लागिरी भ्रान्सी चिबा हिन्ना। ङाच्छा याङ्सी जिन्बा स्हेला लागिरी खालैसेन आश आल। 25तर चुदे य्हाङसे आम्राङ्बा स्हेला लागिरी आश लबा हिन्सम थे आयाङ्देधोना दुख नासी भ्रान्सी चितोःला।
26य्हाङ कमजोर मुला, तर पवित्र आत्मासेन य्हाङदा ह्रो लला। ह्रो लबा भिबा चा खाह्रङ् लसी प्रार्थना लतोःला भिसी आसेबा धुइरी य्हाङसे पाङ्बारीन आखम्बा तामग्याम पवित्र आत्मासे य्हाङला साटोरी प्रार्थना लला। 27ओच्छे पवित्र आत्मासे म्हन्बा ताम जम्मालान सेमला ताम था याङ्बा परमेश्वरदा था मुला। तिग्दा भिसम पवित्र आत्मासे ह्राङला म्हिगदेला साटोरी परमेश्वरसे म्हन्बा अन्छार प्रार्थना लमुला।
28परमेश्वरसे ह्राङसे म्हन्बा अन्छार धम्बा जम्मान म्हिगदेदेन थेदा माया लबा म्हिगदेला लागिरी जम्मान स्हेगदेदा ज्यबा तना लमुला भिबा ताम य्हाङदा था मुला। 29ख्रीष्ट जम्मान ज्योज्यो आले नाना आङागदेला ज्योज्यो दोगै भिसी जम्बुलिङ स्होबा भन्दा ङाच्छाहेन्सेन परमेश्वर ह्राङसेन ङोसेबा म्हिगदेदा धम्जी। ओच्छे थेनीगदेदा ह्राङला झा ह्रङ्बान स्होबारी पक्का लजी। 30जुन जुन म्हिदा परमेश्वरसे ङाच्छान धम्बा मुबा, थेनीगदेदा ह्राङलान सन्तान दोबारी ङ्योइजी। थेह्रङ् लसी ङ्योइमा थेनीगदेदा परमेश्वरदा सेम निबा म्हि स्होजी, परमेश्वरदा सेम निबा म्हि स्होबागदेदा परमेश्वरसे मानदेन य्हाल याङ्बा हकएनोन पिन्जी।
परमेश्वरला माया
31थेह्रङ् भिसम चु तामगदेला बारेरी य्हाङसे तिग पाङ्तोःबा? चुदे परमेश्वरनोन य्हाङपट्टि मुला भिसम य्हाङदा खाल्से ढाखम्ला? 32परमेश्वरसे ह्राङलान झादा मि बाँकी आथान्ना य्हाङला लागिरी पिन्जी भिसम तिग थेसे ह्राङला झादेन छ्यामनोन य्हाङदा जम्मान स्हे आपिन? 33परमेश्वरसे धम्बा म्हिगदेला बिरोधरी खाल्से दोष उन्खम्ला? परमेश्वरसेन थेनीगदेदा ह्राङदा सेम निबा म्हि भिसी सुङ्बा मुला। 34थेतबासेलमा य्हाङदा सजाय पिन्गो भिसी खाल्से पाङ्खम्ला? तिग्दा भिसम य्हाङसे नातोःबा सजाय ख्रीष्ट येशूसेन नासी सिजी। थे सिबाग्याम सोसी दन्दे स्वर्गला मूल ठिरी धन्छ्याबा मुला। ओच्छे य्हाङला लागिरी परमेश्वरदेन छ्याम प्रार्थना लबा मुला। 35दाहेन्से य्हाङदा दुख कष्ट, बिरोध, चआम्याङ्बा, क्वान्आम्याङ्बा, आपत विपत, साइबारी म्हाइबा चु तामगदेसे य्हाङदा ख्रीष्टला मायाग्याम फेबारी खम्ला? 36परमेश्वरला बचनरीनोन चुह्रङ् भिसी भ्रिबा मुला,
“ह्राङला लागिरी ङन्दा धिन धिननोन साइबा मुला,
ओच्छे ङन्दा साइबारी ठीक लबा ग्युदा ह्रङ्नोन लबा मुला।”#व्हाइ ४४:२२
37तर चु जम्मान ताम तसैनोन य्हाङदा माया लबा ख्रीष्टग्यामसेन य्हाङसे चु जम्मानथोरी ढाबा मुला। 38-39तिग्दा भिसम कालला शक्तिगदे मुसै, सिसै, सोसै, स्वर्गदूतगदे मुसै, शासन लबागदे मुसै, दन्देला तामगदे मुसै, लिच्छा तसेला तामगदे मुसै, नर्गला शक्तिगदे मुसै, मुरी मुबा शक्ति मुसै, जम्बुलिङरी मुबा शक्ति मुसै, खजिबै स्हेगदे मुसै ख्रीष्ट येशूग्यामसे य्हाङदा परमेश्वरसे लबा मायाग्याम फेबारी आखम भिबा ताम ङादा था मुला।
© 2026 Eastern Tamang Language Team and Wycliffe Bible Translators, Inc.