रोमी 7
7
ठिमग्याम फेबा
1ज्योज्यो आले नाना आङागदे, चु ताम ङाइ ठिम सेबा घोबा म्हिगदेदा पाङ्बान मुला। म्हि सोदेधोना जे ठिमला तहरी तमुला भिबा ताम एनीगदेदाएनोन थानोन मुला। 2ब्याह लबा म्रिङ्म्हेमे ह्राङला ह्रेम्बो सोदेधोना जे ठिम अन्छार ह्रेम्बोला तहरी तमुला। तर चुदे थेला ह्रेम्बो सिजी भिसम ठिम अन्छार थे म्रिङ्म्हेमे ह्रेम्बोला तहरी आतमुला। 3चुदे ह्राङला ह्रेम्बो मुना मुनान थेसे स्य्हान्दो ह्रेम्फेबेदेन छ्याम ब्याह लजी भिसम थेसे ब्रेल्सी भ्रबा तला। तर थेला ह्रेम्बो सिजी भिसम थे म्रिङ्म्हेमे थे ठिमग्याम फेसी जिन्बा तला, ओच्छे स्य्हान्दो ह्रेम्फेबेदेन छ्याम ब्याह लसैनोन ब्रेल्सी भ्रबा आत।
4थेह्रङ् लसीन ङाला ज्योज्यो आले नाना आङागदे, एनीगदेएनोन ख्रीष्टदेन छ्यामनोन ठिमला लागिरी सिसी जिन्बा मुला। थेतबासेलमा परमेश्वरला लागिरी ज्यबा गे लबारी खम्गै भिसी य्हाङ सिबाग्याम सोबा ख्रीष्टदेन छ्याम गिक तबा मुला। 5य्हाङ ङाच्छा पापी बानीबेहोर अन्छार भ्रमुबा। थे धुइरी ठिमसे य्हाङला पापी सेमदा थीसी य्हाङदा ल्हानान पाप गेगदे लपुङ्जी। थेनोन गेसे य्हाङथोरी काल भजी। 6तर दाहेन्से य्हाङ थेह्रङ्बा ठिमला लागिरी सिसी जिन्जी। चु भिबा चा य्हाङ थे ठिमग्याम फेसी जिन्बा मुला भिबा हिन्ना। थेतबासेलमा दाहेन्से य्हाङ ङाच्छा भ्रिबा ठिमला तहरी चिसी आहिन, तर पवित्र आत्मासे पिन्बा छार जुनीग्याम य्हाङसे परमेश्वरदा तेन्बा मुला।
ठिमदेन पाप
7थेह्रङ् भिसम तिग य्हाङसे ठिमनोन पाप हिन्ना भिसी पाङ्बारी तला? पक्कान आत। तर चुदे ठिम आरेबा हिन्सम पाप भिबा ङादा थानोन आतसेला मुबा। तिग्दा भिसम “एसे लोभ आलउ” भिसी ठिमसे आपाङ्बा हिन्सम लोभ लबा चा पाप हिन्ना भिसी ङाइ था आयाङ्सेला मुबा।#थोन्बा २०:१७; ठिम ५:२१ 8तर पापसे ठिमरी कुल्बा तामग्याम मौका किन्सी ङाला सेमरी ल्हानान थरीला लोभ खना लजी। तिग्दा भिसम ठिम आरेसम पाप चा सिबा तेःबान हिन्ना। 9ङाच्छा ठिम था आरेबा धुइरी ङा सोबा मुबा। तर ठिम था याङ्माहेन्से ङा पापग्याम सिबा तेःबान तजी ओच्छे पाप चा सोजी। 10ओच्छे जुनी पिन्ना भिसी कबुल लबा थे ठिमसे मि ङादा सिना लजी। 11तिग्दा भिसम पापसे थे ठिमसे कुल्बा तामग्यामसेन मौका किन्सी ङादा जाल लसी साइबा ह्रङ्बान हिन्ना।#ठुङ् ३:१३ 12तसैनोन ठिमदेन ठिमसे कुल्बा ताम चा तिगै दोष आरेबादेन ठीक ओच्छे ज्यबा मुला।
13ज्यबा मुला भिबा ठिमसेन ङादा साइबा हिन्ना? पक्कान आहिन। ठिमरी मुबा ज्यबा तामग्याम ङादा साइबा पापनोन हिन्ना। थेतबासेलमा ठिम अन्छार पाप चा गादे नाइबा ताम हिन्ना भिबा य्हाङदा था मुला।
ख्रीष्ट आरेसम य्हाङ पापदेन छ्याम ब्रेला
14ठिम स्वर्गग्याम खबा ज्यबा ताम हिन्ना भिबा य्हाङदा था मुला। तर ङाएनोन पापला तहरी चिबा जम्बुलिङला म्हि हिन्ना। 15ङाइ तिग लबान मुला थे ङादान था आरे। तिग्दा भिसम जुन गे ङाइ लबारी म्हाइला थे आलमुला, तर जुन गे ङादा सेम आनिमुला थेनोन गे ङाइ लमुला।#गला ५:१७ 16चुह्रङ् लसी लबारी आम्हाइबा गे ङाइ लमुला भिसम ठिम ज्यबा मुला भिबा तामरी ङादा विश्वास मुला। 17थेतबासेलमा ङाइ लबा आज्यबा गे ङा ह्राङसेन लबा आहिन, तर ङा न्हङ्री चिबा पापसे लबा हिन्ना। 18तिग्दा भिसम ङा जम्बुलिङलान म्हि तबासेलमा ङा न्हङ्री तिगै ज्यबा ताम आरे, थेह्रङ् तबा चा ङा न्हङ्री मुबा जम्मान पापी बानीबेहोरसे हिन्ना भिसी ङादा था मुला। थेतबासेलमा जुन गे ज्यबा मुला, थे गे ङाइ लबारी म्हाइसैनोन लबारी आखम्मुला। 19जुन गे ज्यबा भिसी ङाइ लबारी म्हाइजी थे लबारी आखम्मुला, तर जुन गे आज्यबा भिसी ङाइ लबारी आम्हाइनी थे गे लमुला। 20जुन गे ङादा सेम आनिमुला थेनोन गे ङाइ लमुला भिसम थे गे लबा ङा ह्राङनोन आहिन, तर ङा न्हङ्री चिबा पाप हिन्ना।
21थेतबासेलमा ज्यबा गे लबारी म्हाइना म्हाइनान ङाग्याम आज्यबा गे जे तमुला। ङाला ल्हुइरी गे लबा चा आज्यबा गे लबा ठिम हिन्ना भिसी ङाइ था याङ्बा मुला। 22तिग्दा भिसम ङाला सेम चा परमेश्वरला ठिमग्यामसेन ताङ्मुला। 23तर ङादा चा ङा न्हङ्री मुबा अर्गुन ठिमसे गे लपुङ्मुला भिसी ङाइ म्राङ्बा मुला। चु शक्तिसे चा परमेश्वरदा ताङ्ना लबारी म्हाइबा ङाला सेमदा बिरोध लमुला। चुसेन ङादा पापला घ्याबा स्होसी ङाथोरी शासन लमुला। 24ङा गादे ल्हाना दुख याङ्बा म्हि, पापदेन कालला शक्तिला तहरी मुबा चु ल्हुइग्याम ङादा खाल्से फेला? 25ङाइ सेमहेन्सेन परमेश्वरला ठिमदा तेन्बारी म्हाइमुला, तर ङाला पापी बानीबेहोरसे चा पापदान तेन्पुङ्मुला। पापदेन कालला शक्तिला तहरी मुबा चु ल्हुइग्याम ङादा खाल्से फेला? परमेश्वरदा धन्यवाद तगै। येशू ख्रीष्ट य्हाङला प्रभुसेन चुग्याम य्हाङदा फेला।
© 2026 Eastern Tamang Language Team and Wycliffe Bible Translators, Inc.