मूल 4
4
पत्रुसदेन यूहन्नादा यहूदीगदेला घ्रेन सभारी भोर्बा
1पत्रुसदेन यूहन्ना म्हिगदेदेन छ्याम ताम लबानलमा पूजाहारीगदेदेन मन्दिर च्याबा सिपाहीगदेला कप्तान ओच्छे सदुकीगदे थेनीगदे मुबा ग्लारी खजी। 2थेनीगदेदा बोमो खजी, तिग्दा भिसम पत्रुसदेन यूहन्नासे येशू सिबाग्याम सोबा मुला, थेह्रङ् लसीन स्य्हान्दो सिबा म्हिगदेएनोन थेग्याम सोला भिसी म्हिगदेदा लोप्बान मुबा। 3थेतबासेलमा थेनीगदेसे पत्रुसदेन यूहन्नादा चुङ्जी, ओच्छे थे धुइरी ङ्यसे तसी जिन्बासेलमा न्हङ्गरदाङ्धोना झ्याल्खानरी थान्जी। 4तर पत्रुसदेन यूहन्नासे पाङ्बा समाचार ङ्यन्बा म्हिगदे न्हङ्री ल्हानान म्हिगदेसे विश्वास लजी। विश्वास लबा म्हिगदे न्हङ्री ओस्पन हजार ङ्हा ते ह्रेम्फेबेगदे मुबा।
5ओच्छे न्हङ्गरदाङ यहूदी नेतागदे, यहूदी धर्मगुरुगदेदेन यहूदी गन्बागदे यरूशलेमरी पोप तजी। 6थेरी जम्मान भन्दा घ्रेन पूजाहारी हन्नासदेन छ्याम कैयाफा, यूहन्ना#४:६ चु यूहन्ना चा येशूला चेला यूहन्ना आहिन।, अलेक्जेन्डर ओच्छे जम्मान भन्दा घ्रेन पूजाहारीला स्य्हान्दो ह्राङला म्हिगदेएनोन मुबा। 7जमाहेन्से थेनीगदेसे पत्रुसदेन यूहन्नादा ह्राङला गुङ्री भसी, “एनीगदेसे चु गे खाह्रङ्बा शक्तिदेन खाल्ला मिनग्याम लबा हिन्ना?” भिसी ङ्योइजी।
8जमाहेन्से पवित्र आत्मासे प्लिङ्सी पत्रुससे चुह्रङ् भिसी पाङ्जी, “यहूदी नेतागदेदेन यहूदी गन्बागदे, 9चुदे ह्राङनीसे चु कुज्या म्हिला लागिरी तिनी ङन्से ज्यबा गे लबासेलमा चु म्हिदा खाह्रङ् लसी खम्ना लजी भिसी ङ्योइबा छार्बा लबा हिन्सम, 10चु ताम ह्राङनीदेन इस्राएलला जम्मान म्हिगदेदा था तगै, ह्राङनीसे क्रूसरी टाँगब लसी साइबादेन परमेश्वरसे सिबाग्याम सोना लबा नासरतला येशू ख्रीष्टला मिनरी चु म्हि ह्राङनीला ओन्छाङ्री खम्सी राप्बा मुला। 11चुनोन येशूला बारेरी बचनरी चुह्रङ् भिसी भ्रिबा मुला,
“‘ह्राङनी डकर्मीगदेसे गे आखेल भिसी भ्याङ्बा युङ्बा चुनोन हिन्ना,
तर दन्दे चुनोन युङ्बा सुर युङ्बा दोबा मुला।’#व्हाइ ११८:२२
12“ओच्छे थेसे बाहेक स्य्हान्दो खालैसे य्हाङदा थार्बा पिन्बारी आखम। तिग्दा भिसम जम्बुलिङला म्हिगदेला गुङ्री य्हाङदा सोना लबारी स्य्हान्दो खालैला मिन आरे।”
13ओच्छे ल्हाना पढब आलबादेन तिगै तालिम आकिन्बा सोझो म्हि पत्रुसदेन यूहन्नासे म्हिगदेदा लोप्बा आँट लबा म्राङ्सी यहूदी नेतागदे, यहूदी धर्मगुरुगदेदेन यहूदी गन्बागदेसे उदेक म्हन्जी। जमाहेन्से थेनीगदेसे पत्रुसदेन यूहन्ना येशूदेन छ्याम चिबा म्हि चिम भिसी था याङ्जी। 14थे कुज्या म्हि खम्सी पत्रुस, यूहन्नादेन छ्याम राप्सी चिबा म्राङ्बासेलमा थेनीगदेसे तिगै पाङ्बारी आखम्नी। 15थेतबासेलमा थेनीगदेसे पत्रुसदेन यूहन्नादा घ्रेन सभाग्याम मङ्ग्यार निउ भिसी कुल्जी। ओच्छे थेनीगदे ह्राङ ह्राङ न्हङ्री चुह्रङ् भिसी सल्लाह लबारी छ्याइजी, 16“दाहेन्से य्हाङसे चु न्हीदा तिग लबा? तिग्दा भिसम चु न्हीसे लबा उदेकला गे यरूशलेमरी चिबा जम्मान म्हिगदेसे था याङ्सी जिन्बा मुला। ओच्छे चु ताम य्हाङसेनोन आहिन भिबारी आखम। 17तर चु ताम स्य्हान्दो म्हिगदेसे था आयाङ्गै भिसी ‘दाहेन्से एनीगदेसे चु येशूला बारेरी खालै म्हिदा तिगै आपाङ्गो’ भिसी य्हाङसे चु न्हीदा पाङ्तोःला।”
18जमाहेन्से थेनीगदेसे पत्रुसदेन यूहन्नादा ङ्योइसी चुह्रङ् भिसी कुल्जी, “च्यागो, दाहेन्से एनीगदेसे येशूला बारेरी खालैदा तिगै आपाङ्गो ओच्छे तिगै ताम आलोप्गो।” 19तर पत्रुसदेन यूहन्नासे थेनीगदेदा चुह्रङ् भिसी जोहाब पिन्जी, “परमेश्वरला ताम आङ्यन्ना ह्राङनीला ताम ङ्यन्बारी परमेश्वरला ङाच्छा ठीक हिन्ना कि आहिन ह्राङनीसेन खेन्गो। 20तिग्दा भिसम ङन्से म्राङ्बादेन थेःबा ताम आपाङ्ना ङनी चिनोन आखम।”
21थेनीगदेसे पत्रुसदेन यूहन्नादा सजाय पिन्बारी तिगै ग्याम आम्राङ्माहेन्से पत्रुसदेन यूहन्नादा ल्हानान बङ्सी पुइजी। तिग्दा भिसम थेरी तबा उदेकला गेला लागिरी जम्मान म्हिगदेसे परमेश्वरला जयजयकार लबान मुबा। 22थे उदेकला गेग्याम खम्बा म्हि बोगल न्ही दिङ् भन्दा ल्हाना तबा मुबा।#मूल ३:७-८
येशूदा विश्वास लबा म्हिगदेला प्रार्थना
23थेग्याम पुइमाहेन्से पत्रुसदेन यूहन्ना ह्राङला ह्रोगदे मुबा ग्लारी खजी। ओच्छे मूल पूजाहारीगदेदेन यहूदी गन्बागदेसे पाङ्बा जम्मान ताम ह्रोगदेदा पाङ्सी पिन्जी। 24थेनीगदेसे चु ताम थेःमाहेन्से सेम गिक लसी परमेश्वरदेन छ्याम प्रार्थना लबारी छ्याइजी, “प्रभु, मु, जम्बुलिङदेन समुद्र ओच्छे थेरी मुबा जम्मान स्हे ह्राङसेन स्होबा हिन्ना।#थोन्बा २०:११; नहे ९:६; व्हाइ १४६:६ 25ओच्छे ह्राङला गे लबा ङन्ना आखेम्हेमे दाऊदला सुङ्ग्याम पवित्र आत्मासे चुह्रङ् सुङ्बा मुबा,
“‘अर्गु य्हुल्ला म्हिगदे तिग्दा बोमो खबा,
ओच्छे म्हिगदेसे तिग्दा गेआखेल्बा तामगदे खेन्बा?
26जम्बुलिङला ग्लेगदेदेन शासन लबागदे,
परमप्रभुदेन थेसे धम्बा थार्बा पिन्बा ख्रीष्टला बिरोधरी
लडाइ लबाला लागिरी तयार तजी।’#व्हाइ २:१-२
27“चु सत्य ताम हिन्ना, तिग्दा भिसम ह्राङसे धम्बा तिगै दोष आरेबा ह्राङला गे लबा येशूला बिरोधरी हेरोददेन पन्तियस पिलातस ओच्छे अर्गु य्हुल्ला म्हिगदे, इस्राएलीगदेदेन छ्याम चुनोन सहररी ह्रुप तबा मुबा।#मत्ती २७:१-२; मर्कू १५:१; लूका २३:१; ७-११; यूह १८:२८-२९ 28ङाच्छान ह्राङला सेमसे म्हन्बादेन ह्राङला शक्तिसे तिग लबारी म्हाइमुबा थे पूरा तबा मुला। 29दाहेन्से प्रभु, थेनीगदेसे ङन्दा लोङ्ना लबा ताम ह्राङसे ढन्गो, ओच्छे ह्राङला गे लबा म्हि ङन्दा ह्राङला बचन म्हिगदेदा थेःना लबारी आँट पिन्गो। 30ओच्छे ह्राङला शक्तिग्याम आखम्बा म्हिगदेदा खम्नालमा ह्राङला गे लबा तिगै दोष आरेबा येशूला मिनग्याम उदेकला चिनुदेन गे तगै।”
31चुह्रङ् लसी प्रार्थना लसी जिन्माहेन्से थेनीगदे पोप तबा ग्ला ल्हिकल्हिक तजी, ओच्छे थेनीगदे जम्मान पवित्र आत्मासे प्लिङ्जी।#४:३१ “पवित्र आत्मासे प्लिङ्बा” भिबा चा परमेश्वरला शक्ति याङ्बा हिन्ना। जमाहेन्से थेनीगदे आलोङ्ना परमेश्वरला बचन थेःना लबारी छ्याइजी।
विश्वासीगदेला साझा सम्पत्ति
32चु धुइरी चा प्रभु येशूदा विश्वास लबा म्हिगदे न्हङ्ला खालैसेनोन ह्राङला धन सम्पत्ति चु ङाला हिन्ना भिसी आपाङ्मुबा। थेनीगदे जम्मालान सेम गिकनोन तबासेलमा थेनीगदेदेन छ्याम मुबा जम्मान धन सम्पत्ति य्हाङला भिसी पाङ्मुबा।#मूल २:४४-४५ 33थे मूल चेलागदेसे परमेश्वरला घ्रेन शक्ति याङ्सी प्रभु येशू सिबाग्याम सोबा हिन्ना भिबा तामला साक्षी दोःसी पाङ्मुबा, ओच्छे परमेश्वरसे थेनीगदे जम्मादान ल्हानान मोलम पिन्जी। 34थेनीगदे न्हङ्री खालैदान तिगै स्हेला खाँचो आतमुबा, तिग्दा भिसम भु व्हारा मुबादेन दिम मुबागदेसे थे चूङ्सी खबा टाङ्गा भसी 35मूल चेलागदेदा पिन्मुबा। ओच्छे जुन जुन म्हिदा खाँचो तमुबा थेनीगदेदा भो लसी पिन्मुबा। 36ओच्छे साइप्रस य्हुल्साला लेवी वंशला योसेफ भिबा म्हिदा मूल चेलागदेसे बारनाबास भिसी मिन थान्मुबा। बारनाबासला अर्थ चा आँट पिन्बाला झा हिन्ना। 37थेसे ह्राङला भु व्हारा चूङ्जी, ओच्छे टाङ्गा भसी मूल चेलागदेदा पिन्जी।
© 2026 Eastern Tamang Language Team and Wycliffe Bible Translators, Inc.