मूल 3
3
कुज्या म्हि गिकदा खम्ना लबा
1तिरेकुनु पत्रुसदेन यूहन्ना धिनना तीन बजेरी परमेश्वरला मन्दिररी निबान मुबा। थे धुइ चा प्रार्थना लबा धुइ मुबा। 2परमेश्वरला मन्दिर न्हङ्री वाङ्बा म्हिगदेदेन छ्याम टाङ्गा ह्रीगै भिसी न्हमाहेन्सेन कुज्या मुबा म्हि गिकदा म्हिगदेसे सदन परमेश्वरला मन्दिररी वाङ्बा म्रापरी भसी थान्मुबा। थे म्रापदा जेःबा म्राप भिसी पाङ्बा। 3थे कुज्या म्हिसे पत्रुसदेन यूहन्ना परमेश्वरला मन्दिर न्हङ्री वाङ्बारी छ्याइबा म्राङ्सी टाङ्गा ह्रीजी। 4जमाहेन्से पत्रुसदेन यूहन्नासे थे म्हिदा ज्यना लसी च्याजी, ओच्छे पत्रुससे थेदा “ङन्दा च्यागो” भिसी पाङ्जी। 5थेतबासेलमा थेनीगदेसे तिगै पिन्ना वा भिसी थे कुज्या म्हिसे थेनीगदेदा सेम लसी च्याजी।
6जमाहेन्से पत्रुससे चुह्रङ् भिसी पाङ्जी, “ङादेन छ्याम म्हारदेन म्हुइ आरे। तर ङादेन छ्याम तिग मुला थे ङाइ एदा पिन्ना। नासरतला येशू ख्रीष्टला मिनरी ए रेःसी भ्रउ!” 7ओच्छे थेसे थे कुज्या म्हिला दाहिने यारी चुङ्सी थीजी, थीमैछ्याम थे कुज्या म्हिला काङदेन काङला जी जीरी भङ् वाङ्जी। 8जमाहेन्से थे कुज्या म्हि ढोङ रेःसी क्यारमार भ्रबारी छ्याइजी। ओच्छे भ्रबान छ्योङ्सी परमेश्वरला जयजयकार लबान थेनीगदेदेन छ्याम परमेश्वरला मन्दिररी वाङ्जी। 9ओच्छे जम्मान म्हिगदेसे थेदा भ्रबान लबादेन परमेश्वरला जयजयकार लबा म्राङ्जी। 10थेनीगदेसे थे म्हिदा परमेश्वरला मन्दिरला जेःबा भिबा म्रापरी ह्रीसी चिबा चुनोन हिन्ना भिसी ङोसेजी। ओच्छे थे खम्बा म्राङ्सी थेनीगदे ल्हानान उदेक तजी।
पत्रुससे परमेश्वरला मन्दिररी लोप्बा
11थे म्हिसे पत्रुसदेन यूहन्नादा चुङ्सी भ्रबा म्राङ्सी म्हिगदे ल्हानान उदेक तसी सोलोमन भिबा दलानरी य्हार्बान थेनीगदे मुबा ग्लारी खजी। 12चु म्राङ्सी पत्रुससे म्हिगदेदा चुह्रङ् भिसी पाङ्जी, “इस्राएलला म्हिगदे, ह्राङनी तिग्दा चु तामरी उदेक म्हन्बा? तिग ङन्से ह्राङलान शक्तिदेन परमेश्वरदा तेन्बासेलमा चु म्हिदा भ्रना लखम्बा ह्रङ् छोर्सी ट्वल्ल तसी ङन्दा च्याबा? 13य्हाङला आखेम्हेमे अब्राहाम, इसहाकदेन याकूबला परमेश्वरसे ह्राङला गे लबा येशूदा घ्रेन मान लजी। तर ह्राङनीसे चा चुङ्सी म्हिला यारी जिम्मा पिन्जी, ओच्छे पिलातससे येशूदा पुइबारी छ्याइमा ह्राङनीसे थेदा पुइबारी आत भिसी पिलातसला ङाच्छापट्टि पाङ्मुबा।#थोन्बा ३:१५ 14तर ह्राङनीसे तिगै दोष आरेबादेन परमेश्वरसे म्हन्बा अन्छार भ्रबा म्हिदा चा पुइबारी आत, बरू म्हि साइबा म्हिदा चा पुइगो भिसी पाङ्जी।#मत्ती २७:१५-२३; मर्कू १५:६-१४; लूका २३:१३-२३; यूह १९:१२-१५ 15ओच्छे ह्राङनीसे जुनी पिन्बादा साइजी। तर थेनोन येशूदा परमेश्वरसे सिबाग्याम सोना लजी, चु ताम म्राङ्बा चा ङनीन हिन्ना। 16येशूलान मिनना शक्तिग्याम चु म्हिसे भङ् याङ्जी। ह्राङनीसे म्राङ्बादेन ङोसेबा चु म्हिसे येशूदा विश्वास लबासेलमा ह्राङनी जम्मालान ङाच्छापट्टि चुदा खम्ना लबा मुला।
17“च्यागो ज्योज्यो आलेगदे, ह्राङनीसे लबा चु जम्मान गे आसेनान लबा हिन्ना भिसी ङादा था मुला। ओच्छे ह्राङनीला नेतागदेसेनोन थेह्रङ्नोन लजी। 18तर थार्बा पिन्बा ख्रीष्टसे दुख नातोःला भिसी परमेश्वरसे ङाच्छान जम्मान अगमवक्तागदेग्याम सुङ्बा अन्छार परमेश्वरसे चु गे पूरा लजी। 19थेतबासेलमा परमेश्वरसे ह्राङनीला पाप माफ लबाला लागिरी ह्राङ ह्राङला पाप ख्लासी परमेश्वरपट्टि दोःगो। 20जमाहेन्से परमेश्वरग्याम ह्राङनीसे सुखला धिन याङ्ला, थेह्रङ् लसीन परमेश्वरसे ह्राङनीला लागिरी ङाच्छान धम्बा थार्बा पिन्बा ख्रीष्ट येशूदा पुइखला। 21ओन्माहेन्सेन परमेश्वरसे ह्राङला अगमवक्तागदेग्याम सुङ्बा जम्मान स्हे दोःसी स्होबा धुइ आततेधोना येशू ख्रीष्ट स्वर्गरी धन्छ्यातोःबा मुला। 22मोशासे चुह्रङ् भिसी पाङ्बा मुला,
“‘एनीगदेला परमप्रभु परमेश्वरसे ङादा पुइखबा ह्रङ् लसी
एनीगदेला ज्योज्यो आलेगदे न्हङ्ग्यामसेन एनीगदेला लागिरी अगमवक्ता गिक पुइखला।
थेसे पाङ्बा जम्मान ताम एनीगदेसे ङ्यन्तोःबा मुला।#ठिम १८:१५,१८
23थे अगमवक्ताला ताम आङ्यन्बा खजिबै म्हिदा चा
परमेश्वरला म्हिगदेग्याम फेसी नाश लला।’#ठिम १८:१९
24“शमूएल अगमवक्ताहेन्से लिच्छा खबा जम्मान अगमवक्तागदेसे चुनोन धिनगदेला#३:२४ “चुनोन धिनगदे” भिबा चा येशू ख्रीष्ट ङाच्छा फेप्खबा धिनहेन्से दोःसी फेप्खबा धिनधोनाला ताम तखम्ला। बारेरी पाङ्बा मुला। 25ह्राङनी थेनोन अगमवक्तागदेदेन परमेश्वरसे लबा थेनोन कबुलला सन्तान हिन्ना। थे कबुल ह्राङनीला म्हेमे अब्राहामदेन छ्याम परमेश्वरसे चुह्रङ् भिसी लबा मुबा, ‘एला सन्तानग्यामनोन जम्बुलिङला जम्मान म्हिगदेसे मोलम याङ्ला।’#ठुङ् २२:१८ 26ह्राङनीदा नाइबा गेग्याम फेसी मोलम पिन्बाला लागिरी परमेश्वरसे ह्राङला झा येशूदा ङाच्छा ह्राङनी मुबा ग्लारी पुइखबा हिन्ना।”
© 2026 Eastern Tamang Language Team and Wycliffe Bible Translators, Inc.