Valoma 12

Shadaka shingumi shinnagwéla Nnungu

1Napavedoni mmanung'unumunu, ninkunnaililila kwashididi shake Nnungu lyumye mili vyenu kumwe Nnungu kenga shadaka shingumi, shakwilimyanga na shinnagwéla Nnungu; aku ni kulipudya kwenu kwaimumu.#12:1 Kwali: …ni kulipudya kwenu kwiu. 2Hamunalilinganiange na shinamidyo shawakati au kanji mubadilike kwaindila yakunonowangigwa muding'anong'ano dyenu kwambangidya mutende nningo mwanalela akwashi malotelo ake Nnungu, ambone, akunagwaleka na ashalowa-uti.

3Mwenu, kwaumonyo wangupatile ninkumwaulila kula munu pakati penu hanalikumbukile jo mwene kupunda amulá muvaikidíle alikumbukilile kanji nae alikumbukile kwabila kupundanianga kulinganananavo shipimo shalikulupililo shanjavidile Nnungu kula munu. 4Doni, kenga mumili umo tunkuvanavo dimbande dyoe na dimbande uti hadivenavo shimadengo shimo, 5nawetu momo ata ikava kenga tuvelé tuvoe, tunkuva mili umo nkati mumwe Klistu na kula munu pakati petu tunkuva dimbande dyunganénge. 6Pakuva tunkuvanavo vyajo vyakuvilingananga kwodananavo umonyo watuukile ndapata, shikapagwa shakulavila, shindivaikila shitumike kwodananavo imbande yake yalikulupililo, 7kwali shakutumika, shitumike mukutumika kwali shakupundisha, mukupundisha, 8kwali shakwing'a ntima shii, mukwing'a ntima shii,#12:8 Kwali: …shakulaililila, mukulaililila. kwali shakujaula, kwantima, kwali shakulangalalela, kwaidukuduku, kwali shakulodya shididi, kwalipuwilo.

Shinamidyo shankwóda wiu

9Linagwaledyo live líkave shinankulaba. Vangedya ashilá shakunyata na kamulila ashilá shambone. 10Nagwaladyania namene kwalinagwaledyo lyashinung'unumunu muuvanavo dukuduku yakwishimana. 11Mwidukuduku, hamunadidimange. Mu Imumu, jaulila. Umu, ntumike. 12Mulilindilililo, puwanga. Mumauvilo, lipililile. Mukushwali, nanopa. 13Kwa avilá vivóva vakwilimyanga, shangila. Kuvapwashalela vajeni, lambela.

14Vaalaliye avalá vampapáta, vaalaliye na hamunavatae dilana. 15Puwanga namu avalá vapuwánga, lila namu avalá valíla. 16Kumbukilanila mumo momo. Hamunalyone kanji ava tayali kulyunganianga namu avalá vailudyangíka. Hamunalyone mwemwe mmene kuva mmalimanyilo.

17Hamunalipe wakunyata kwawakunyata. Lambela kutandedya wambone pamevo pavanu uti. 18Ikaululika na kwaupande wenu mwenu, nama kwaamani na vanu uti. 19Mmakunagwaleka, mwiko hamunalipilile kanji kulipilila lakela shitundi shake Nnungu mwaa indyandikigwa, “Kulipilila ni kwangu nangu; nangu ndalipilila, atangola Umu.”#12:19 Lola Kumbukumbu 32:35. 20Leka apo, “Mmongo wako akavanavo indala, mupe shakulya; ikankola inyota, mupe shakukumbila. Pautenda davo po, unkumpalila makala pamuti pake.”#12:20 Lola Mikong'o 25:21-22.

21Hamunaleke wakunyata untema kanji tema wakunyata kwauwambone.

Currently Selected:

Valoma 12: kde

Highlight

Compare

Copy