Nhiara 99
99
Itmatromlawanni de Ray miemeha inhatta
1 Itmatromlawanni Makdenreri de Ray inhatta mak kodi plolli, pede rimormiori mak kwatiawua noha-rai honona rdiwdiwra.
Orgahi-Orha'a de Naliwna la Kerub#99:1 La' Uplerlawna roma kreini ralamni, gen id etla maka ha rweta la Genia Momuou-Witwitan Memna. La' gen di ralamni rkenia luwuau nnio'taru maka rken tiarga Uplerlawna riorni-liaini termida rella ralamni. La'a luwuau die wawannu, de e rken tiarga atiehra woru mak knair liwarni maka rtolliohora Uplerlawna hopopanni-lili'irnu, nnia'eratni de Uplerlawna mak kod plolli-mneheni etla hande. Atiehra rora liwarni ranieh'a la luwuau die tutawnu wawannu, de la' gen miaka rwe'er doinia rira do'oni-halli. Atiehra rora ri, de rweta la Kerub. wawannu mak kdella luwuau nnio'taru wawannu, pede nohkerna-raikieran di nlika-nwo'la.
2 Orgahi-Orha'a ed mak kodi plolli la Sion.
Inponni nareh dioini riy mak kwatiawua noha-rai re honona.
3Emkadella wa pede riy ra'uli-rawedi E nanni yoma E' ed mak karehi-kalawna nhi'nande riy ra'unni-ramta'ata E'a.
Miluli-mihona Orgahi-Orha'a yoma Nakleha do'a-hala kuku' eti.
4Ntorna-nrautu de nodi plola-mneha.
Rhi'ina-rella (hya' mak kaplola) nden rer lia E ralamni.
Nala deullu-tatarni nie'era-tniatarni la'a Yakop duratni-waitni re
totpena rden nek la plol wawannu.
5Mi'uli-miwedi Itmatromlawanni la tutullu-lolo'oni,
de Uplerlawna maka itkola tieru-tawur nehla de.
Mtiuk lia la'a mtatangenni gaini ralamni
yoma Nakleh do'a-hal kuku' eti.
6Musa nor Harun de, e rhor nan olek harella la'a Itmatromlawanni Makdenreri de imam-imamni
ne la' Samuel mana, riy mak ksumbaini id hadella la'a Itmatromlawanni.
Hare er mak kpol lia E'a noma Nwahla.
7 Itmatromlawanni Naltier lia ir de lirni nhargot lola kakam lawna ralamni
ne honona re ratlina-ratailla hya' maka
ha Ne'er taru-ntatar taru re.
8 Itmatromlawanni Makdenrer die, E' de Uplerlawna maka irkola tieru-rawur nehla.
Nwahla oleka rimormiorni polpuollu-wakwakni.
Lera dom de Nukum ira totpena Nwatutu-nwaye'a ira
me E' edonna Nto'on reri do'oni-halli re mere Nolin doinia ir la do'oni-halli wawannu.
9Mi'uli-miwedi Itmatromlawanni la tutullu-lolo'oni, de Uplerlawna maka itkola tieru-tawur nehla de.
Mriu'u-mtiowar la E'a, la'a wo'orni maka kmou-kwitna.
Yoma Orgahi-Orha'a Uplerlawna-Mempulwatnu Nakleh do'a-hal kuku' eti.
Currently Selected:
Nhiara 99: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
