Nhiara 116
116
Nlewan la matmiati ralamni
1A ralmu napal niana Itmatromlawanni Makdenrer die, me u'uli-uwedi lilili-mamuau E'a!
Yoma apuol olek la E' pa giwra: “Matrome! Mtiulan-msiayn nan a'g eee!”
Noma la' a polpuo'lu-wakwa'ku de Nwahla nana.
2Yoma la'pa apuol lia de, Nheri tlinni mai a'u,
pede hota la a mormio'ru mai nohkeran di de hota la' E' nampena ed mak apuolpuolu-wuakwak rer lia.
3Alier olek la yatlorni-yatra'ani
maka khi' a' pua trema-trema amuati
pa emekanekama i'n maka kler tar lia dari.
4Pede a nu'ru ema rwe'era pa apuol lia giwra:
“Matromlawnu ne! Yan Muolin limmu mai a'g e!”
5Plola! Itmatromlawanni Makdenrer die Nden rer lia plola-mneha wawannu.
Uplerlawna maka itkola tieru-tawur nehla de Entut rer nieka E ralam kalwiedni me sniayanni mai ita onnila E' de sniayni onni E'a.
6Entera-ndem reria riy mak kakleha ruri-lai.
La' ler maka tah'i lola a tieru de Enamori-nalewan nan a'u.
Ukleha ruri-lai wia dewade Nhedga a lia gera tlinni-ai aratni.
7Aghi'a a ih'ru ralmu pa nawtentenna
yoma la Itmatromlawanni kalwiedni de mai a'u.
8Yoma Itmatromlawanni ed mak kamori-kalewna a lia'a matmiati ralamni.
E Nhi' olek a pua yana a ralmu nmawal doinia.
Ntulla-nsayni a' pua a'g edon lier la tutiuini-dadiayi.
9La' hade pede la a mormio'ru-dardia'ru mai nohkeran di de
hota aliernohor reri Itmatromlawanni ralma-riorni.
10La' ler maka alier la polpuol ina-wakwak ama de giwra: “Ine! alier olek la kropna-krieutu yatlorni-yatra'ani!”
A li'ru-tu'nu emkade ho'mana apuesiay toto'ola Itmatromlawanni.
11Mere la' ler de a'g edonna puesiaya rimormior nohkerna wawannu
yoma rsuksukni pudi-akla ohpa-lahara.
12Hota agala hya'a ga wuahla Itmatromlawanni kalwiedni mai a'u?
13Hota aghi' emkadi: agodia lokrahi turnu pa gala la Itmatromlawanni
totpena a'u'uli-uwedi E' nanni onnila hihi'ini-yapyapni mai a'u.
14Hya'a maka uno' targa olek la E'a, de hota a'g edonna ghoratdoinia.
De nhiurliwtu-wnialodwa maka uno' taru de agala la E' la Krei mutnu-rahanu gaini ralamni.
15La'pa Itmatromlawanni rimormiorni rler la matmiati ralamni de,
Ensayn wen ira ne ralamni nmawal doin la.
16 Matroma! O limmu-lakmu a'u.
Akola tieru-gawur nehla la O'a emekwalia a i'nu la' ler ululu de.
O' ed maka kolin doinia a lia la'a wutwutu-kokuohu ralamni.
17Hota agodia nhiurliwtu-wnialodaw la O'a
totpena asiumbain pa u'uli-uwedi O'a.
18Pede hya' maka a'g e uno'targ oleka la tiy O' de,
hota agala, la'a gen miaka rimormiormu rkola tieru-rawur nehla tiy O'a.
19De hota aghi' emkade la'a Yerusalema letni letgara-mnenehenni,
la'a O rommu-kreimu herni-gaini.
Mmiai pia ta'uli-tawedi Itmatromlawanni Makdenrer die! Haleluya!
Currently Selected:
Nhiara 116: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
