Nhiara 111
111
Mmiai pia ta'uli-tawedi Itmatromlawanni!
1 Matromlawnu ne! Makdenreri O'a! Agala a ihru ralmu tetema pa a'u'uli-uwedi O'a
mai woka-le'u muaka O rimormiormu e rhopun tar di.
2Plola la O hihi'imu-yapyapmu mak kamehi-kayona,
pa nhi'nande riy rahu mak sukni ramkeka re me rahaka kirkira-ralma rior la.
3 Matromlawnu ne! O hihi'imu-yapyapmu mak kamehi-kayona re de rmemeh'a ragengen lia genni me nodi ya'uli-yawedi la O'a.
Omtiut rer nieka kalwiedni-paitiotni la rimormiori pa nodi liarni. 4Itmatromni Makdenrer die, sniayni ononni inhatte.
Enhi'a-nyapia tulanni-kniarni re de riy rta'u-rta'g o'tani ne hota rhoratreria.
5Enwahi' targa ya'ana-yemnu la riy maka klernohora E'a,
me Nhoratreria hya' maka Enakottaru.
6Ntutg oleka E plolli-mneheni rurni-laini la E rimormiorni
la' ler maka Nal oleka lodna-hairi re nohoni-raini la'a ira.
7 Itmatromlawanni hihi'ini-yapyapni rden rer lia plol wawannu.
E' edonna Naheri-nawalia lirni la'a hya' maka ha Nakot oleka wa.
Deullu-tatarni honona re naplol memna pede it edon tamta'at pa tlernohor reria.
8Riorni-liaini deullu-tatarni er maka ha rnairia pa tuwu-tuwu.
Itmatromlawanni Nhi'a-nyapi la plol wawannu pa Nala deullu-tatarni re.
9E' ed maka Nwe'er doinia E rimormiorni
me Nora re rhi'a nnielu-niau mak kodia pa tuwu-tuwu pa nodi liarni.
E' ed maka rwet nanni la Orgahi-Orha'a Uplerlawna mak kmou-kwitna
me mak kaliwna la hitni-lomarni maka hadom edonna nparan pia nwakriania.
10La' hameni niwra nwalia la riy makatu de, de na'unni-namta'ata Itmatromlawanni Makdenrer die.
E' ed maka kala lira-yatu o'ta-kriahlu la' he' maka katlina-katailla E lirni-tunnu.
Ya'uli-yawedi nden rer lia E' pa nodi liarni.
Currently Selected:
Nhiara 111: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
