Nhiara 106
106
Itmatromlawanni kalwiedni la E rimormiorni
1Ya'uli-yawedi la Imatromlawanni!
Mmiai pia ta'uli-tawedi tsu'ru-tselma E' Makdenreri yoma ralam kalwiedni mai ita.
Sniayanni de nodia pa nodi liarni.
2Hya' maka E Nhi' nana la E mutnu-rahanu re de narehi-nalawan memna!
Tnairia hya' lira pa twahaur nohora E sniayanni totpa Nlernana ya'uli-yawedi mak kaplol meman la genni?
3La'pa he' ed maka katlina-katailla E'a me nhi' hadom de ploi-ple'era de
hota nler nek la unut lawna.
4 Matroma, la'pa Mtiutga O kalwiedmu la O rimormiormu ri de yana Mhuoratdoinia a lio oo,
me la'pa Omumori-mulewna ira, de a' walio oo!
5Totpena a hononami maka Mpualir nian oleka ri mler owa'an la kalwiedni-paitiotni pripanni-fa'anni,
pa agor rewre'wa ir pa amamuki-mahepru.
6Am di de mlernohora up mamni-tgar mamni pa mler oleka do'a-hala.
Am mhi' oleka yatyatni-halalli pa mpoklira-mpah'a waw la O'a.
7La' ler maka up mamni-tgar mamni rdella Mesir de
rtotpa raplinu-raplo' nohora tniulla-kniari mak kamehi-kayona maka Mhi' nana re.
Ir edonna rhoratnana O tniulanmu-sniayanmu maka lawan rehi la' ira.
La' lera rrehgorga Laut Gelagah, de ira rpoklira-rpah'a waw la O' makden la tutullu-lolo'oni.
8La' emkade ho'mana Mumori-mulewan nana re, totpena nan kalwiedmu namtemtemna
me riy rat niohora memna rurmu-laimu.
9La'a O plolmu pa Mhuopna Laut Gelagah pa nkerna-nhau,
pede Muodia rimormiormu pa rala' lola gera wikni la' letgara mneneha,
de emeknekama e rler la tan kierna wawannu.
10Emkade pede Muolin doinia ir la'a arwalli limni ralamni.
11La' noma ger lawna npupun nan momuoga ir arwalli,
de nlumu-ntelan nan momuoga re.
12La' hade pede O rimormiormu rpesiaya nnio'omu
pa rwatunu-rwahniar pa ra'uli-rawedia O'a.
13Mere edon nalo'on wali ne rhortaplinga O hihi'imu-yapyapmu.
Rwatikil la O gaimu ralamni pa edonna ratota-rawaw eti O'a, edonna rahak pa rlernohora O ralma-riormu.
14La'pa rte'ela wo'or kerna-rai mtatanni dewade ralamni re rwakwak nekpa ra'ana ya'ana-yemnu
maka ha rara'ana la' Mesir la' ler ululu.
Yoma riwra rta'aga O'a.
15Ne ya'ana-yemnu maka ha rwaka de, Omuala la ira,
mere Mual walia nnien liawna nma ntai tiemna re.
16La' ler maka rdella wo'or kerna-rai mtatanni de ralamni ramehra la Musa nora Harun pa gaini rpetan rer lia,
la' emkameni ho'mana ir rora de O tniutmu-nhianmu nhieli-liarmu,
me Harun nek de makla' imam mak khima-kre' O'a.#106:16 La' yawala Ibrani riwra: “ir ralamni ramehra la Musa nor Harun, de Itmatromlawanni rimormiorni maka kmou-kwitan de.” Mak katu Puka rwarora: “rimormiorni mak kmou-kwitna” nakot nohora Harun emeknekama imam la Itmatromlawanni.
17Dewade nohmarna nwer wawni pa nlumu-ntella Datan,
me tani namdiar gerun pa npupun nwenna Abiram nora yawokni-yale'enu re.
18Ai mana nmatliair erun pa nram kerkerna riy mak klernohor reri e'a re
pede riy yatyatni-halalli honona re rmat miomuou wua.
19Ne la'a wo'or Sinai#106:19 Sinai Sinai de rwet walia la Horeb. demade rtu'tu-rlewur targho'a leli-maha pa rhi'a la sapi a'na
totpena rhu'ru-rhelam la uplera-upmat die.
20Rala hayori-orpau (sapi) maka nhi'inde ka'ana wewna pa rna'ih'la la uplera-upmati,
na'nama rkola tieru-rawur nehla la pa ra rherun doinia O' mak kla' ir Uplerlawanni-Mempulwatnu
mak kmeh'a kden tar lia hititni-repreparni ralamni de.
21Rhoratdoin memna O'a maka kamori-kalewna ira la' Mesir.
Rhortaplinga O hihi'imu-yapyapmu maka rimormiori edonna rhi' tar lia mai nohkerna wawannu.
22Plola! La'a Mesir#106:22 Mesir Mesir de rwet walia la Ham. me Laut Gelagah de
Omhi' hihi'a-yapyapi mak kamehi-kayona.
23O ralma-riormu de Miwra mpunu-mpuenna O rimormiormu ri yoma rhu'ru-rhelam la uplera-upmati,
mere Musa nodnian ir la O gaimu ralamni.
Musa maka Ompualir nian de ed maka klol lir letgar la O'a
pede ralammu namdiaru.
24Dewade la'awa hohoni noma ir rwayotil targho'a gen miaka samomuou die.
Yoma ir edonna rpesiaya O nnio'omu maka Omukottarga hota Mtiera-mdiem ir la hande.
25Honona re rahankeran nande rlu'uta-retra reranni oratni,
ne rahmen etia ratlina-ratailla O lirmu.
26Dewade Omliokar pa hota Mpuenan nan momuoga ir honona
la'a wo'or kerna wawannu
27ne hota Mhuopliala upni-a'nani re la'a hairi-hairi dom to'a
pa ranie'era-rahniakar la' hande.
28Ne la' wo'or Peor de honona rhu'ru-rhelam la Baal,
me ra'ana-remnia uplera-upmati ya'ana-yemannu korni.
29Nhiolli-lietni re rhi'a O ralammu pa namehra,
pede nnieni-nhien lawna ntai tiemna re de rmattiti'ir nohora.
30Mere Penehas naprir pia nukmua mak khala,
dewade nnien liawan de nmol wua.
31Onnila Penahas hihi'ini-yapyapni pede nwal lia riy mak kden la plol wawannu la'a Uplerlawna yamkekni,
pa hota edonna rhortaplinga pa rhi'a la tui ida.
32La gera tnipu mak kden la Mariba, de ir rhi'a O pa ralammu namehra,
nhi'nande orgahamu Mukmua Musa.
33Yoma la'a ira nhiolli-lietni re pede Musa nawen nande
naltier lia ir de naplin niohora ha nakotkota.
34Omhuopna riy Israel re pa rwenna rimormiori la hairi-hairi mak kden hande,
mak khi'a-kyap nieka dodo'a-halala yatyatni-halalli,
mere riy Israel re rahmena rlernohora O lirmu.
35Pa rora riy yatyata-halala re rhol wiutu,
nhi'nande rlernohor neka hairi-hairi maka kaplin niohor ma'ta O kotmu-nanmu de hihi'ini-yapyapni.
36Dewade rhu'ru-rhelam la mak kden hande uplera-upmatni
pede narieiniande rtuin la do'a-hala ralamni.
37Riy Israel upni-a'nani re nekane rodia pa emeknekama hoihoi-tantiani
pa rala la hegana-kawnu yatni-rha'ani mak ha rpesiay re, de uplera-upmatia Kana'an.
38Makden Israel re rwunu-rwenna riy mak edonna khala,
de ir upni-a'na wamueheni pa rala la makden Kana'an uplerni-upmatni,
pede rhi'a noh de pa nwalia la gen maka kdeha-ktiahli olekwa.
39La'a hihi'ini-yapyapni re pede ir rler olek la rimormior miaka Omuakriarnia (najis).
Ir edon rdenrer (setia) olek la O wa pede emolmolan nekama pat maka kalira-kaliai olekwa pa edon ndenrer lia muanke'eni.
40Dewade orgahamu Mtio'on reria yawenanmu la ir wa.
Me Mumkek la O rimormiormu de Miwra Mumota.
41-42Noma Muala ir la'a hairi-hairi dom to' pa rodi plolli la ira,
ne Muolin doinia ir pa arwalli re rnahora-rnala'a ira
la'pa arwalli re rwatei-rwahapar kalwiedweda ira.
43Mere O' de nhi'inde Muod nian mamainia rimormiormu re pa Mumori-mulewna ira
mere emkade ho'mana ir orgahani ratlinnon keran la O'a
pa narieiniande orgahani rler owa'an la do'a-hala ralamni pede rlernana yatyatni-halalli yatlorni-yatra'ani.
44Mere Omutail rer lia ir polpuollu-wakwakni,
pede la'pa rler la kropanni-krieutnu dewade Omtiulan la re.
45Yoma la' ir rerieini pede O' edonna Mhuoratdoinia nnio'omu,
ne Msiaynia ira yoma la' O' de sniayni onni O'a.
46Omhi' ir pa arwalli maka ktoran nan ir ho'mana rtulan la ira.
47 Matromlawnu ne! A Uplerlawan mamni O'a! Makdenreri O'a! Mtiulan pa Mulewan nan ami!
Ami e manie'era-mahniakar la hairi-hairi lo'mani ralamni mere hota Muwoka-mule'g ami
totpena a ralam mamni nahepuepru pa ma'uli-mawedi mhu'ru-mhelma O nanmu la'a tutulmu-lolo'omu.
Nanmu de nden la mounu-wahrani yoma O' de mak kakleha do'a-hala.
48Ya'uli-yawedi nden rer lia O'a, de riy Israel Uplerlawanni.
Ma'uli-mawedia mhu'ru-mhelma O'a la dodo'ondi pa nodia la tuwu-tuwu pa nodi liarni.
Mmiai pia it hononita makdella noh di wawannu takota “Plola (Amin)”.
Ya'uli-yawedi la'a Itmatromlawanni, Makdenrer die. Haleluya!
Currently Selected:
Nhiara 106: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
