Nhiara 105
105
Ra'uli-rawedia Itmatromlawanni Makdenrer die, yoma hihi'ini-yapyapni la rimormiorni tuwu la' tuwu
1Ta'uli-tawedi Itmatromlawanni Makdenrer die, me takot nohora E preheni-mkaini plolli-mneheni.
Twahaur nohora hihi'ini-yapyapni la'a hairi-hairi nor wutga noha-rai piatatra mai noha wawannu.
2Tloi-tsek nohora ita ya'ulli-yawedni la' Itmatromlawanni
me twahniar de takot nohora E limni enni mak kamehi-kayona.
3E' de Itmatromlawanni mak kden la momuounu-witwitanni, pa tahepur nohora.
La'pa hononmi mak nhi'inde mmiai pia mkiola tieru-miawur nehla la E'a, de mmiai pia tamuki-tahepur nohora.
4Lera-lera nekpa mmiai pia tkola tieru-tawur nehla la E'a.
Mmiai pia twaka ruri-lai la.
5-6Miy miak kla' Abrahama, mak khima-kre'a Itmatromlawanni, me upni Yakopa de duratni-waitni miy.
Miy er maka Itmatromlawanni Nwalir niana oleka.
Mmiai pia mhioratreria Itmatromlawanni hihi'ini-yapyapni mak kamehi-kayona,
me yana mhiortaplinga la'a niukum maka ha Nala re la arwalmi re wawannu.
7 Orgahi-Orha'a de it Uplerlawanni inhatte,
ne la'a hya' maka ha Net tiaru de lir de nwewar momuou lia' nohkeran di wawannu.
8La'a hya' maka ha Nano'taru re, de id mana edonna Nhoratdoinia la.
Mak Ha Nano'taru re de hota edonna rherun doin oke' et pia nodi liarni.
9Ne hadi de, Itmatromlawanni nnio'oni maka Enakottarga la Abraham
nhoru nioma Nakottarg owa'an la Isaka.
10Dewade Nkohlim owa'ana Yakopa
totpena Nhi'a nnio'a id la'a hairi Israel pa nodi liarni.
11De lirni Niwra: “Noha-rai Kana'ana hota A gala la' miy,
totpena mhiapar rer lia iktan mierni me mihlor rer lia hlor wewnihini. (mhi'a la' gah wamuehemi).”
12La' ululu ma'ta de Itmatromlawanni rimormiorni emeknekama do'ona-dakna la Kana'ana.
La' ler de ir mutnu edonna rpeh ma'ta.
13La'pa rlaun la geni ida demade rahulti-rahamar la'a geni dom to'a.
Rwatiaga noha-rai id pa rma rahniu'ru la noha-rai ida.
14Mere Itmatromlawanni edonna Nolin doin riy id pa nma nnahora-nnala'a ira,
mere Nhoktemna ray-ray miaka kteran nihini la ira
15totpena yana rtota E rimormiorni maka Enwalir nian oleka wa la klieratni.
Yana rhi' yatyatni la E rimormiorni mak kodi E lirni.
16 Orgahi-Orha'a Nala lehka-lar lawna pa ntuin tar lia noha-rai Kana'an de,
ne Na' momuou lia ya'ana-yemun maka rdudan taru re.
17Mere Enhopan pa riy ida nala'ulga ir pa nla'awa Mesir,
de Yusup maka amni-hyalli ra'olga pa nwal lia ata-wa'ara.
18Wutwutu-kokuohu lol limni-lakni
me ranti mnotna na niohol lia tiernu.
19La' Mesir nampena Yusup nakwiet nana mi'a-lo'a maka ray Mesir nmi' nana re nnia'eratni.
Ne plol toto'a pa hya' maka Yusup nakwiet nana de ntutu-nte'ewa.
Hota la talan emkade pede hya' maka Itmatromlawanni Makdenrer die, Nakot targa de,
ntutga de Yusup ndella plola wawannu.
20Dewade ray Mesir mak kodi plolli la luwu-a'na riwnu-rahanu
ed maka kolin doinia e la'a roma nhio'la ralamni.
21Na'nama ray nala pa nodi plolli la ray istanni.
La'pa re'a-tniaru re me Mesir nohoni-raini honona de, e' ed maka ktorna-ka' momuoga.
22Ntutmuata-nkewra' e' pa nwatutga okarni la ray tniutnu-nhianni nhielli-liarni
me nhi' o'tani la nih tutiuini-mort hammamra re honona totpa ntutga talan la' ira.
23Noma amni Yakopa mak ha rwet wal lia Israel nmai pia nden nek la Mesir,
de Ham duratni-waitni genni, pa nado'ona-nadakna la hande.
24Noma Itmatromlawanni Nhi'a rimormiorni pa npeha-nlawna,
hade pede rurni-laini nrehi targho'ola ornoha.
25Nhor diewade Itmatromlawanni Nawiru-nawal lia riy Mesir ihranu ralamni
pa rahankeran rer lia E rimormiorni mak khu'ru-khelam la E'a,
ne rputra-rpalka re.
26Dewade Enhopan doinia Musa mak kodia E lirni,
me Harun maka Enwalir niana.
27Pa rhi'a hihi'a-yapyapi mak kamehi-kayona pa riy Mesir,
de Ham duratni-waitni re, ramkek nana, yoma Itmatromlawanni ed maka khopna re.
28Mere rahmena ratlina-ratailla Itmatromlawanni lirni-tunnu maka Musa nora Harun rakot nohora re.
Pede Orgahi-Orha'a Nala mel'uta-maliena pa na nkaduw nana noh Mesir.
29Nhi'a pa gerlawna Mesir rwal lia rar mermera,
nhi'nande i'na-ya'ana no'a gerlawan de rmat pia rpohra-rgehpa.
30Ne la'a kakhargera ho' de raniutni-ramdieran lola etnu-liolli
pa nodi liarni la ray romni ralamni.
31 Itmatromlawanni Nhopan pa laran mota nora mi'na potpota rma
rtawrurnhiala noh Mesir uhunu-ewatni-lahwani.
32Nhopan pa otna es ema rhuriernia, de emeknekama otan lawna nturu.
Ne hita-tlena nor neka layera rwadawar malwiru-malganna.
33Au kar lalawna nor wut nieka lokrahi ona Nweyata-nwaniaga.
Ora-au re honona tutnu-akni pala patia la pa rtuin la tani wawannu.
34Noma Itmatromlawanni Nhopan kongoha niutni riwnu-halli
pa riw niana pa rnem pa rmai die makden Mesira takeni rho'a-rhai niana la irannu-matni.
35Kongoha re rwarehi-rwatal niohora yawrotanni la yawuli-yatniamin no'a Mesir pa rawrotan kerkerna ora-au,
la'pa wewan mota-wewan kerna la'pa ortawi-au tiawi oke' to' mana edonna nayamkek la noha wawannu.
36Nhor nia'nama riy Mesir a'na muan yanullu, de a'nani maka ha rlililia re,
honona de Orgahi-Orha'a Nwunu-nwenan momuoga, de edonna nkatet etia riy ida.
37Dewade Itmatromlawanni orgahani Nodgiota riy Israel re de rlola kalwieda-paitiota.
Rla'awa de rodi re'a-tniaru leli-maha honona maka rlernana la' Mesir.
38Mak kden la Mesir la' ornoha re rler la yamta'at lawna onnila ira,
pede honona re sukni wal pia riy Israel plet pa rwaran lakni la Mesir.
39 Itmatromlawanni Neh'a targa kakam lawna pa na npupun nana rimormiorni re.
Me Nal ai pa nalera riy Israel rella' melmela.
40La'pa rwak pa ra'ana noma Itmatromlawanni Nala ma'nu hamra (puyuh) pa ra'ana
me roti mak kwatiaga Ilyamou-Watyatoha pa rpeher nohora.
41La' wa'ura wat muetma mana ema rweta
pa gera nwau lia tan kierna wawannu.
42Yoma Itmatromlawanni Nhoratreria E nnio'oni
la'a E mutnu Abrahama, mak klernohor reria E lirni.
43La' hade pede Nodgiota mutnu re de ralamni re rahepuepur nohora.
De maka Ha Nwalir niana re rlergot la Mesir de rwahniara pa riarni-riarin nohora yamukni-yaheparnu.
44La'pa hairi-hairi re nohananni-taniaratni mana, Nhakra la' luwu-a'na Israel termida wehrani woru re
pa rlernan momuoga ror wut nieka yawulli-yatniamni mak kden la arwalli re nhyi'ini ralamni.
45Totpena Itmatromlawanni mutnu-rahanu re ratlina-ratailla deulu-tatra
maka E Ne'er targ oleka wa.
Ya'uli-yawedi la'a Itmatromlawanni, Makdenrer die. Haleluya!
Currently Selected:
Nhiara 105: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
