Nhiara 1
1
Ya'unut lawna plollolli
1Ya'unut lawna la riy mak edonna kwayow nohora nnio'a-niatu yatyata-halala ha rakota,
me edonna rlernohora ir nhiolli-lietni illu-wniehwani.
Edonna rwatamput lia' riy maka kapolu-kaliella maka Itmatromlawanni ha Nakotkota.
2Mere la'pa mak suksukni klernohor reri Itmatromlawanni Makdenrer die#1:2 La'a Puka Rlergot la Mesir (Keluaran 3:13-14) de Uplerlawna Nakota Niwra E Nan wamueheni de YHWH, pede la'a Puk Lawna yawala Ibrani de rtulsi YHWH. Mere onnila makden Yahudi ramta'ata rwet la Uplerlawna nanni de, la'pa rtulsi owa'an Puk Lawna de rnairia yawala Yunani de rtulis nieka: Itmatromlawanni (Tuhan). Pede la la'pa rtutu-rte'ela ler di, Puk Lawna la yawala-yawala la meni-meni to'a de nhi'inde rnair neka Tuhan. Mere la' plollolli de YHWH nnia'eratni ed wal lia, de de “E Ndenrerlia pa nodi liarni”. La' hade pede la'a Puk Lawna Lgona di de la'pa itlernana YHWH la'a yawala Ibrani de it terjemahkan “Itmatromlawanni Makdenrer die” onde “Orgahi-Orha'a Makdenrer die”., ha Nakota
me, la'pa nwaror nohora la lelera-melmela,
3de hota la' riy de, la' hya'a-hya' to' de nler la kalwiedni.
E' emeknekama ora-au mak kden la gerlawna aratni,
mak kawo'ola la' lerni
pa edonna napliau tiaru.
4La'pa rwal dioinia de riy yatyata
emekwalima ha kowu maka anni nten lia-maiya.
5Riy yatyata re, Itmatromlawanni ed maka kukmua re,
me rtaw dioinia la Uplerlawna mutnu.
6Yoma la'a riy mak kden rer lia plol wawannu, de E' ed maka ktera-klahua me katiak reria.
Mere riy maka kyata-khala de rlola talan mak kler la yatyatni-halalli yatlorni-yatra'ani.
Currently Selected:
Nhiara 1: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
