Rano'a 6
6
Yano'a-ya'atu dom to' wali
1Ame! Matialo'onama o' e muno' targa hadom la mutwualmu
miwra hota omhuernia e otanni.
2Mere la'pa mutwualmu de ta'enniana npairia otanni,
me o' nek de ta'enniana mhuernia, de hya' maka omuno' targ olek la e'a,
nwalia toktokal maka ktokal nan o' owa'ana.
3La'pa emkade samomuounu de orgahamu mpue'er doinia toktokla la inonmu.
De ple'tu pa mlia'a riy de.
La' pa mpuaka lilili-mamuau lia totpena e nolin lim la o'a.
4Yan munin matmu la hadi!
5Muolin doinia toktokal de pa emekwalima ma'nu
onde kijang maka rlewan la toktokla pa rawlar wia.
6Riy mak kpamalsa de
nwatutu-nwaye'ela tiehra.
7Tiehra re rakleha ina-ama yanulu-manatu.
8Mere la'a rieiki-wnio'ora plahwani,
de rawoka-rale' reria warehera ya'ana-yemnu pa ra rwei lia rehka-lara lerni.
9Mak kpamalsa miy re!
Hota la moweni mieman la miy yaninmi la inon werweratmi dina?!
Moweni nianpena miy mimata?!
10Mimtatanmi pa mriw limmi
demade miwra: “A'unin oke' owa'an a'u, yoma aghoki tiemn olekwa.”
11Mere la'pa miy kniarmi to' yanina dewade kleha-lara nmai die
emeknekama mak kreyahru rmai die rodi keki-rautu.
12Riy yatyata-halala rod nieka lir halala-tun halala.
Ir rpudi-rakal rira la meni-meni to'a.
13Idma nahe'i matni la ida
totpena rla' rhi' yatyatni-halalli.
14Ralma-rior yatyata de eneknek to'a rwarora yatyatni-halalli ya'ohpa-yalahara
pede nareiniande yahuri-yawo'or la'a meni-meni.
15La'pa emkade, mtatandi nekpa rler la yatyatni-halalli yatlorni-yatra'ani
pa rler la matmiati-molmuolu ralamni.
16Do'a-hala wo'itu maka Orgahi-Orha'a sukni tia'ala
pa Nahmen memna riy rhi' nana:
17de rhi' atulu-apetna inonni,
rputra-rpalka ra'ohpa-ralahara,
rwunu-rwenna riy mak edonna khala,
18rna'ohma-rnakatia totpa rhi' yatyatni,
pleta-plet pa rla' rhi' yatyatni-halalli,
19rodniana riy ohpa-lahara,
me rhi' mutwualli pa idma rahuri-rawo'or nohor ida.
Olie'tu la yalira-yaliai
20Ame! Mhi'a hya' ed maka ammu nakota.
Me yana mhuoratdoinia inmu nnio'oni la o'a.
21Mhuoratreria ir lirni-tunnu la'a ihramu-ralammu.
Mhi'a nnio'oni re emeknekama wui miaha mak kden rer lia tiermu.
22Ira wniatutnu re de rodia o' la'a loi-talla kalwieda-paitiota.
La' melmela de emeknekama e ratiak reri o'a,
ne la'pa omumat la o yaninmu de rtutga talan mak kaplollol tiy o'a.
23Yoma maka inmu-ammu ha rwatutu ri emeknekama wa'du mak kmormiori,
me lira pniolliohorni de ed mak kodi mormiori-dardiari.
24Mliernohora inmu-ammu wniatutnu totpena olie'tu la patke' yatyata,
de rira hawni maka kanur mi'na.
25Yana ralammu ntuin la samounu,
me yana mtiella aparmu,
la'pa nahe'i matni la' o'a mana, yana mumkek la.
26Omuora patke' yatyata mak kakleha hawa de do'a-hala hade, me welli yamanna wra'u ralamni to'a.
Mere ame, la'pa riy or hawa de hota leli-maha rakuri-ratla'a me hota riy o'ta ntuini!
27Hota riy ida nkorreri ai de ai edonna na'ana rayanni?!
Me edonna nhi' amutni-aki'ira inonni?!
28Hota riy ida nhapar nana ai kwiari
ne lakni edonna nmutni?!
29Hade emekwalima it tora rira hawni tala' wutu.
La'pa he' ed maka khi'a-kyapia hade de edonna nawlar lia niukum lawna.
30Ama, mpuaror nohora riy ida mak kaplara pede nkamna'a.
Hota riy edonna rawenan memna yoma rat niohora e naplar rehia.
31Mere la'pa rtoran nana de hota rhopan pa npair de narehi-nalawna
la'pa rti'il nana la wo'itu ralamni la hya' maka ha nkamna'a.
Hota npair doinia re'eni-tniarnu honona.
32Mere hota emkameni wal lia muanke' mak kaliai ida?!
Podaknu ne!
Hota nler la yatyatni-halalli yatlorni-yatra'ani.
33Hota ramuki-rama'ala me rapolu-raliel la.
Nanni nyat wa pa nodi liarni wa.
34Yoma nhiolli-lietni de nariei pia pat de hawni nayah'a e'a, nhi'nande nawenan memna,
me la'pa e niwra nwahla e ralam mehrani de, nakleh oleka ralam samomuou wua.
35Nhi'nande nwayotlia kupna maka riy mak kor patke'eni raliai die nala pa npair dioin halli.
Muanke' kaliai die nal kupanni liawanni ho'mana, pat de hawni nwayotlia.
Currently Selected:
Rano'a 6: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
