Rano'a 5
5
Olie'tu la yalira-yaliai
1Ame, mutlin la ammu a'u!
Mhue'du nana la'a hya' maka a'ukota ri.
Mtia'wa reria tlinmu la'a lira nnio'a-wawa niatu maka agala wuatutga o'a ri.
2Totpena omuat niohora la emkameni la orgahamu muodia inonmu
me multieri-multian de mliernohora kirkira-ralma rior samomuou.
3Yoma patke' yatyata re raltier die nurnu re mi'nani emeknekama gani turnu
me lirni nerun de o ralammu nakwali amhuakru.
4Mere la'pa hohoni dewade mermueru-kapkiapli maka tmadodo'or nohora.
5Hota o' mana e ni'it targ ole'ku la'a matmiati-molmuolu ralamni.
6E' edonna nlol oleka talan maka klola mormiori-dardiari.
Nler oleka la talan mak edon kaplola, mere naplin niana.
7La' hade pede am e! Mutlina!
Yana mpuayotlia a li'ru-tu'nu ri.
8Olie'tu la patke' mak emkade!
Rerehnianama romni gaini nek de yana memmemna mhuapar la.
9Yoma la'pa omtiam la, de hota riy edonna ratota-rawaw o'owa.
Ne hota patke' de hawni nahankern nande nwunu-nwen o'a la lerni la omtuwarwiar mia'ta.
10O re'emu-tniarmu hota riy meheni ra' nan to'a,
me liwatmu-odapmu wniahlani ho'mana lupmu-rommu edonna rlernana.
11Hota la'awa hohoni de muhe'lia lewu ko'oni
pa muhe'i kniahi la kermu-ga'armu pa polpuol inmu-wakwak ammu.
12Demade lirmu niwra: “Inee! Hya' nariei pia uhmena-upraiya lira-tunu la a i'nu-a'mu?!
Nihya'pa uhmen utlin la lira pniolliohora?!
13Uhmena utlin la riy maka kwatutu-kwaye' a'u re,
14pede hota alier la tututu-wawuau ralamni.
Yoma o'ta-mata leta riwra ra'ursia a ha'lu.
Leta mniotni rat niohor olek a wua pede rakleh oleka yatota-yawap mai a'u.”
15La' hade pede, am ee! Yan olie'tu la hapmu ne ralammu nod rer lia hapmu
pa emeknekama muemun ger wamuehemu me yana muemun riy meheni gerni.
16La'pa o ralammu nod lia patke'a doma de nakleh et miemna untu kuku'a.
Hade emeknekama mhuopliala kotmu la leta ralamni.
17Ha samounu de omuor to'a o patke'emu
me edon riwra patke'a dom pali.
18La' hade pede omuora patke'emu maka muora mmiehlima la'a lerni mimdien ma'ta la tuwari-harara lewatni.
Enmemeh'a ed mak khi' ralammu pa nahepru.
Yana muora patke'a dom to'a.
19Ndella pa lera-ler nekpa mpi'u-mga' niohora hapmu to'a.
E' de nsayn reri o'a.
Ndella pa e nmeh'a ed mak khi' ralammu pa nahepru me namtemtemna.
20Hya'a nrei pia mga'ga' niohora patke' yatyata?!
Hya'a nrei piede muora muanke' dom hawni pa mila' wutu?!
21Am ee! Hare honona de Orgahi Orha'a e Nlin reri-nmat reri hare honona.
La' meni-meni to'pa rimormiori rden la, de Itmatromlawanni mana e Namkek reria re.
22Do'a-hal maka riy yatyatni rhi'a-ryapia de emeknekama toktokla la inon wamueheni.
Ne hota ta'enniana ral doinia la inonni.
23Onnila podaknu re pede rwir dioin la talan mak kaplollola nhi'nande rler la do'a-hala ralamni.
Raplinu rodi inonni pede la' hohoni de rler la matmiati-molmuolu ralamni.
Currently Selected:
Rano'a 5: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
