Rano'a 1
1
Salomo lirni-tunnu Nnia'eratni
1La' hadi de e nakot nohora Salomo, Ray Daud la Israel a'nani lirni-tunnu mak ha nala na nano'a-na'atu.
2La' Salomo lirni re nnia'eratni
totpena na nwatutu-nwaye'a rimormiori totpena rat niohora nhioli-lieta
me rlernan walia ralma-riora la'a lira nnio'a-wawa niatu.
3La' lira nnio'a-niatu ri ha ra rwatutu-rwaye'a rimormiori totpena ratu rmori-rdari rlernohora ralma-rior mak ksamomuou,
de rwatutu-rwaye'a re totpena nhiolli-lietni re rden rer lia plola-mneha, rhi'a-ryap die rlol talanni me rden rer lia ploini-ple'erni.
4La'pa rimormior mak kakleha ma'ta wniarora-wnialai kirkira-ralma rior samomuou de rwatutu-rwaye'a totpena rlernana kirkira-ralma riora plahwa
de la'pa maka ktuwarwiar mia'ta demade rwatutga totpena ratu rlernohora hya' mak kaplola.
5La' lira nnio'a-wawa niatu ri, de rodia mak ktaru kirkira-ralma rior samomuou pa rlernan owa'ana lira-yatu
me la'a riy maka ralma-riorni plahwa lirni-yatnu yeher to' pa na'itar la.
6La' emkade pede lira kdieldelma (lir marna) e rat niohor nnia'eratni
me mak katu re lirni-tunnu mak kayade'a re mana, e rat niohora lie'erni.
7Ononni de rimormiori ratu ra'unni-ramta'ata me ratlina-ratailla Orgahi-Orha'a totpena rlernana lira-yatu plollolli de.
Mere la'a riy maka kpodku de rahmena ratlina lira nnio'a-wawa niatu
me rparwah'a rira wniatutnu-wniaye'eni la'a ira.
Lira nnio'a-wawa niatu
8A'nu ne! Mtia'wa reria tlinmi la'a inmi-ammi lira nnio'oni-wawa niatnu!
9Yoma hota la'a ira nnio'oni-niatnu la o'a,
de hare er maka ra'itra o nhiolmu-lietmu
pa emekwalima hadeutu samomuou ida maka rayapia emeka wutmu-laimu
me wui miaha maka khi' inonmu pa yamkekni samoga.
10Mliernana riy yatyata-halala pa rnori-rtam o'a,
de yan memmemna mtial nohora re, a'nu nee!
11Emekto'ama riwra: “Ee! Mmiai pia honona it tawok pa tla twuwu riy mak kakleha ruri-lai maka klola la talan letgara.
Itwuran nan it pa tlewria mak kakleha hal la mai ita re pa twenna.
12La' dodo'ondi de rmormiori lia kalwiedni-paitiotni
mere hota rler la kropna-krieutu, de rwaran kmeha-kmeha.
Plinu-plinnianamde noh molu-rai miati nlumu-ntell oleka re.
13Tla ta'ala hyonni-hyanni mak samomuounu
totpena ta tapenga it romni.
14Mmiai pia tla twunu-twenna pa twuri-tgalmu hyonni-hyanni re!
Pena itsakra mneneha re!”
15A'nu nee! Yan memmemna mliernohora re!
La'pa mitlin nan lirni re dewade mihal doinia la wa!
16Hota edonna ramolmuolga la genni yoma edonna rhi' nan ma'ta yatyatni-halalli maka ha rwaror reria.
Riwra pleta-plet pa rla rwahaka wniunnu-wnienanni.
17Ma'nu prowta id nek de edonna nler tar lia dedesu
yoma dedesu de etla ma'nu de matni taranni.
18Mere riy yatyata re hare e raprehen wenna pa rhi' to'a dedes lia ir inon wamueheni,
pa hota la' ir hihi'a-yapyap wuamueheni pede rler meman la matmiati-molmuolu ralamni.
19Plola! La'a riy maka kwahaka re'a-tniaru de nodia wuhurni-tekalli,
mere hota nala aranni na nhernia.
Lira nnio'a-wawa niatu mak kodia la kirkira-ralma rior samomuou!
20Mitlina! Lira nnio'a-wawa niatu mak kodia wniarora-wnialai samomuou
de emolmolan nekama patke' ida maka polpuolu-hawaunia la' loi liawna-talan lawna!
Me nhaunu-nhaunu la ya'olu-yala'a geni.
21Nhaun la leta puohrani gaini,
la'a geni-tien maka rirahu humumra-kakiailia.
22Nhar lirni pa niwra: “Hei! Miy miak kakleha ma'ta wniarora-wnialai kirkira-ralma rior samomuou, hota miy emkade nekpa nodi liarni?!
Mak kahe'i-kamali lira-yatu miy re! Hota mowen nianpena mhiopliala nhiolmi-lietmi mak edon kaplola rena?
Hoi, mak kpodku-kpadku miy re! Hota ler wo'ir owa'ana nhiolmi-lietmi emkade mamaini?!
23La'pa apuolliohor miy die mitlin ma'u
totpena lira-tun kalwiedwed makden la a ihru ralmu de hota a'ukota tiy miy,
me ulgota walia lira-ya'tu mak kayade'a re la' miy.
24Apuol oleka miy wia, mere mpiayotlia
pa edonna mhie'du nohor a li'ru
me edon mitlin la a polpuo'lu.
25A nnio'u-niatu honona, de miy edonna mhie'du nana,
me a pniolliohoru la miy miana edon mitlina.
26-27La' hade pede la'pa mdiunit nanpena a'uhe'i-umal niohora miy.
Mlier tar lia la hadom pena mpiahniort oo!
La'pa mlier la diwdiwra-dada'ala, polpuol ina-wakwak ama, kowlora-pah'a meti
onnila mlier la lir hallawna-tun hallawna,
pena mimkeka hota a'g ed maka kahe'i-kamal miy.
28La'pa emkade hota mpiol ma'u, mere noha nanina pa nhel wioranni.
Hota mihak a lia meni-meni, mere edonna mliernan olek a wua.
29Yoma miy die rimormiori miaka kahmena-kaprai lira nnio'a-wawa niatu
me mihmena mi'unni-mimta'ata mitlina-mitailla Orgahi-Orha'a.
30Nnio'a-nia'tu re honona de mihmen mitlin etia,
me a pniolliohoru la miy mana edonna mliernohor walia.
31La' hade pede hya' maka mtiamnia de hota mrieikia wa.
Hota orgahami mtia' nan memna mehrani mak ha mpiarora-mpialai niana honona.
32Mitlina! Miy miak kakleha ma'ta wniarora-wnialai kirkira-ralma rior samomuou, hota mlier la matmiati-molmuolu
yoma mihmena mitlin mai a'u.
Miy makpodku-kpadku hota mimkoha-mimnanan taru
yoma edonna mhie'du nan a lira nnio'a-wawa nia'tu.
33Mere la'pa he' natlin la a li'ru-tu'nu de hota nler la kalwiedni-paitiotni.
Nler la mormiori-dardiaria mtiertierannu me hota edon namta'ata!”
Currently Selected:
Rano'a 1: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
