وحی 2
2
اِفِسوسداکی کئلئسایا
1افسوسداکی کئلئسانین مله‌یئنه یاز: یدّی اولدوزو صاغ الئنده توتان، یدّی قیزیل چیراقدان آراسیندا یرئیَن بله دیئر: 2”سنئن ائشله‌رئندن، سنئن زحمتئندن و سنئن تحمّول ادن صبرئندن خبرئم وار و بوندان دا کی، شرور آداملارا تاب گتئره بئلمئرسن و حواری اولمادیقلاری حالدا، اؤزلرئنی حواری چاغیرانلاری ائمتاحانا چکدئن و اونلارین یالانچی اولدوغونو بئلدئن. 3و سنئن تحمّولون وار و آدیمین خاطئری اوچون تاب گتئرئبسن و یورولماییبسان. 4لاکئن سنئن ضئدّئنه بو واریم کی، باشلانیشداکی محبّتئندن اوزاقلاشیبسان. 5بونا گؤره هارادان دوشدویونو خاطیرلا، تؤوبه ات و اوّلجه اتدئکلرئنه عمل ات؛ اگر تؤوبه اتمه‌یه‌سن، سنئن یانینا گلئب، چیراقدانینی یرئندن گؤتوره‌رم. 6لاکئن گئنه سن ده بو دا وار کی، نئکولاچی‌لارین عمللرئندن نئفرت ادئرسن کی، من ده نئفرت ادئرم. 7قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلنه بونو عطا اده‌جه‌یم کی، تارینین جنّتئنده اولان حیات آغاجیندان یسئن.“
اسمئرناداکی کئلئسایا
8اسمئرنادا اولان کئلئسانین مله‌یئنه یاز: بئرئنجی و آخیرینجی اولان، اؤلوب و تزه‌دن دئرئلن بله دیئر: 9”سنئن چکدئیئن عذاب و یوخسوللوغوندان خبرئم وار. لاکئن سن دؤولتلی‌سن! یهودی اولدوقلارینی ائدّئعا ادنلرئن کوفروندن ده خبرئم وار کی، یهودی یوخ، شیطانین بئر کنئسه‌سی‌دئرلر. 10چکه‌جه‌یئن عذابلاردان قورخما. باخ، ائبلئس عنقرئب سئزلردن بعضئلرئنی زئندانا آتاجاق، اِله کی، سئز ائمتاحانا دوشه‌سئنئز و اون گون عذاب آلتیندا اولاجاقسینیز. اؤلومه‌جک وفالی قالین و من سئزه حیات تاجینی وره‌رم. 11قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلن ائکئنجی اؤلومدن هچ ضرر گؤرمه‌یه‌جک.“
پرقامومداکی کئلئسایا
12پرقامومداکی کئلئسانین مله‌یئنه یاز: ائکی آغیزلی ائتی قیلینجی اولان بله دیئر: 13”ساکئن اولدوغون یردن، شیطانین تختئنئن هارادا اولدوغوندان خبرئم وار، بوندان دا کی، منئم آدیمی برک ساخلادین و آرانیزدا، شیطانین ساکئن اولدوغو یرده، اؤلدورولن وفالی شاهئدئم آنتئپاسین گونلرئنده بله منه اولان ائمانی ائنکار اتمه‌دئن. 14لاکئن سنئن ضئدّئنه بئر نچه شیئم وار، چونکی سنئن یانیندا بعضئلر وار کی، بلعامین تعلئمئنی توتوبلار. او، بالاغا اؤیرتدی کی، ائسرایئل اوغوللارینین قاباغینا بئر بودره‌مه داشی قویسون کی، بوتلره تقدئم اولونان شیلردن یسئنلر و عئفّتسئز عمللر اتسئنلر. 15یانیندا بعضئلر ده وار کی، همن شکئلده نئکولاچی‌لارین تعلئمئنی توتوبلار. 16بونا گؤره، تؤوبه ات. یوخسا سنئن یانینا تزلئکله گلئب، آغزیمین قیلینجی ائله اونلارلا موحارئبه اده‌جه‌یم. 17قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلنه، من گئزلی ساخلانان مانّادان وره‌جه‌یم. اونا آغ بئر داش و اونون اوستونده یازیلمیش تزه بئر آد دا وره‌جه‌یم کی، اونو آلان آدامدان باشقا هچ کس اونو بئلمئر.“
تئیاتئراداکی کئلئسایا
18تئیاتئراداکی کئلئسانین مله‌یئنه یاز: تارینین اوغلو، گؤزلری اود آلووو کئمی اولان، آیاقلاری دا پارلاق بورونجه بنزه‌ین بله دیئر: 19”سنئن عمللرئندن، محبّتئندن، ائمانیندان، خئدمتئندن و تحمّولوندن خبرئم وار و بوندان دا کی، آخیر عمللرئن ائلک عمللرئندن داها بؤیوکدور. 20لاکئن سنئن ضئدّئنه بو واریم کی، سن اؤزونو نبئیه چاغیران او ائزِبِل آروادی تحمّول ادئرسن و او تعلئم ورئب، اؤزلرئنی منئم قوللوغوما ورنلری یولدان آزدیریر، اِله کی، اونلار عئفّتسئز عمللر ادئب بوتلره تقدئم اولونموش شیلری ییئرلر. 21اونا مؤهلت وردئم کی، تؤوبه اتسئن، آمّا اؤز عئفّتسئزلئیئندن تؤوبه اتمه‌یی ائسته‌مئر. 22باخ، من اونو ناخوشلوق دؤشه‌یئنه آتاجاغام، اونونلا زئنا ادنلری ده بؤیوک بئر عذابا سالاجاغام، مگر اونون عمللرئندن تؤوبه اده‌لر. 23اونون اؤولادلارینی وبا ائله اؤلدوره‌جه‌یم و بوتون کئلئسالار بئله‌جکلر کی، فئکئرلری و اورَکلری آراشدیران منم و سئزلردن هر بئرئنئزه عمل‌لرئنئزه گؤره عوض وره‌جه‌یم. 24آمّا سئزه، تئیاتئرادا اولان قالانلارا کی، بو تعلئمی توتمورلار و شیطانین درئن شیلرئنی بئلمه‌یئبلر، نجه کی، دیئرلر، سئزه داها بئر یوک قویمورام. 25آنجاق من گلنه کئمی، نه‌یئن وارسا، برک توت. 26قالئب گلنه، منئم عمللرئمی آخیراجاق ساخلایانا عطا اده‌جه‌یم کی، مئلّتلر اوستونه حاکئمئیّتلری اولسون. 27و او، کوزه‌گرئن قابلاری قیریلیب تئکه-تئکه اولان کئمی، اونلارا دمئر عصا ائله حؤکمرانلیق اده‌جک، نجه کی، من اؤزوم ده حاکئمئیّتی آتامدان آلمیشام.#2:27 مزمور ۲:۹ 28و اونا سحر اولدوزونو وره‌جه‌یم. 29قولاغی اولان، قوی اشئتسئن کی، موقدّس روح کئلئسالارا نه دیئر.“
Currently Selected:
وحی 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
