وحی 1
1
1عئسا مسئحئن وحیی. تاری بونو اونا وردی کی، تزلئکله باش ورمه‌سی واجئب اولان شیلری اؤزلرئنی اونا قول اتمئشلره گؤرسدسئن. او دا اؤز مله‌یی واسئطه‌سئله بونو اؤز قولو یوحنّایا بیان اتدی. 2او دا تارینین کلامینا و عئسا مسئحئن شهادتئنه، یعنی گؤردوکلرئنئن هامیسینا شهادت وردی. 3خوش او آداملارین حالینا کی، بو نبئلئیئن کلامینی اوخویورلار، اشئدئرلر، و اوندا یازیلان شیلره عمل ادئرلر، چونکی واخت یاخیندیر.
4یوحنّادان آسئیا ایالتئنده اولان یدّی کئلئسایا: وار اولان، وار اولموش و گله‌جک اولاندان و اونون تختئنئن حوضوروندا اولان یدّی روحدان سئزه فیض و باریش اولسون. 5هم ده امئن شاهئد، اؤلولردن ائلک دوغولان و یر اوزونون پادشاهلارینین ریئسی عئسا مسئحدن کی، بئزی سِوئر و اؤز قانی واسئطه‌سئله بئزی گوناهدان آزاد اتدی 6و بئزی بئر پادشاهلیق و اونون آتا تاریسی اِوئنه کاهئنلر تعیئن ادئب. اونا ازلدن ابده‌جک شؤوکت و قودرت اولسون. آمئن.
7باخین، او، بولودلارلا گلئر،
و هر گؤز اونو گؤره‌جک،
حتّا اونون بدنئنی دِشَنلر بله؛
دونیانین بوتون قبئله‌لری اونون اوچون یاس توتاجاقلار.
بلی، بله اولاجاق. آمئن.
8رب تاری دیئر: «منم ”اَلئف“ و ”ی“؛ وار اولان، وار اولموش و گله‌جک اولان، او قادئری-موطلق.» 9من، یوحنّا، قارداشینیز و عئسادا اولان سیخینتی‌یا، ملکوتا، و صبره سئزئنله برابر شرئک اولان، تارینین کلامی و عئسانین شهادتی اوچون پطموس دیئلن جزئره‌ده ائدئم. 10ربّئن گونونده روحدا ائدئم، و آرخامدا شیپور سسئنه اوخشار بؤیوک بئر سس اشئتدئم کی، 11دیئر: «گؤردویونو بئر کئتابا یاز و یدّی کئلئسایا گؤندَر: افسوسا، اسمئرنایا، پرقاموما، تئیاتئرایا، ساردئسه، فئلادلفئیایا و لاودئکئیه‌یه.» 12او زامان دؤندوم کی، منئمله دانیشان سسی گؤروم. دؤندوکده یدّی قیزیل چیراقدان گؤردوم 13و چیراقدانلارین آراسیندا ائنسان اوغلونا#1:13 دانیال ۷:۱۳ بنزه‌ین بئرئسئنی گؤردوم کی، آیاقلاریناجاق یتئشن اوزون بئر شئنل گیمئش، سئنه‌سئنه ده قیزیل قورشاق تاخمیشدی. 14اونون باشی و ساچلاری یون و قار کئمی آغ ائدی، گؤزلری ده بئر اود آلووسو کئمی ائدی. 15آیاقلاری کوره‌ده یانان پارلاق بورونج کئمی ائدی، سسی ده بئر چوخ سولارین گورولتوسونه بنزه‌یئردی. 16صاغ الئنده یدّی اولدوز ساخلامیشدی، آغزیندان دا ائکی آغیزلی بئر ائتی قیلینج چیخیردی. اوزو بوتون قودرتئنده پارلایان گون کئمی ائدی.
17اونو گؤردوکده اؤلو کئمی آیاقلارینا دوشدوم. و او، صاغ اَلئنی منئم اوستومه قویوب ددی: «قورخما! منم، بئرئنجی و آخیرینجی اولان، 18همئشه دئری اولان. اؤلموشدوم، و باخ، همئشه‌لئک دئری‌یَم و اؤلوم و اؤلولر دئیارینین آچارلاری منده‌دئر. 19بونا گؤره گؤردوکلرئنی، ائندی اولان شیلری و بونلاردان سونرا باش وره‌جک شیلری یاز. 20صاغ اَلئمده گؤردویون یدّی اولدوز و یدّی قیزیل چیراقدانین سئرّی باره‌ده: یدّی اولدوز، یدّی کئلئسالارین ملکلری‌دئر. یدّی چیراقدان دا یدّی کئلئسالاردیر.
Currently Selected:
وحی 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
