هوشَع 14
14
ربّئن ائسرایئلدن تؤوبه ائستمه‌سی
1تارین ربّه دؤن، ای ائسرایئل،
چونکی تقصئرلرئندن اؤتری ییخیلیبسان.
2اؤزونوزله سؤزلر گؤتورون و ربّه طرف دؤنون.
اونا بله دیئن:
«بوتون تقصئرلرئمئزی بئزدن گؤتور،
بئزی یاخشیلیقلا قبول ات.
گامیشلار یرئنه آغزیمیزدان چیخان
شوکورلری تقدئم ادئرئک.#14:2 بورادا عئبرانی متن آیدین دیئل. بو قئسمت «آغزیمیزین ثمره‌سئنی سنه تقدئم ادئرئک.» و یا: «آغزیمیزئن نذر اتدئکلرئنی گامیشلار تقدئمی ائله یرئنه یتئره‌رئک.» ده ترجومه اولونا بئلر.
3آشور بئزی خئلاص اتمیه‌جک،
آتلارین بِلئنه مئنمیه‌جیئک،
آرتیق اَل ائشلرئمئزه ”تاریمیز“ دِمیه‌جیئک.
چونکی یِتئم سندن مرحمت گؤره‌جک.»
4«اونلارین دؤنوکلویونه علاج وره‌‌جیم،
اونلاری اورَکدن سِوه‌جیم،
چونکی قضبئم اونلاردان واز کچئب.
5من ائسرایئله شِح کئمی اولاجاغام،
او، زانباق کئمی چئچک آچاجاق،
لوبنان سئدری کئمی کؤک آتاجاق.
6قوللو-بوداقلی اولاجاق،
زیتون آغاجی کئمی گؤزل اولاجاق،
لوبنان سئدری کئمی عطئر ساچاجاق.
7آداملار گئنه ده کؤلگه‌سی آلتیندا اوتوروب
بوغدا کئمی جوجَره‌جکلر،
مِینه کئمی چئچکلَنه‌جکلر،
شؤهرتلری لوبنان شرابی کئمی اولاجاق.
8اِفرایئم دئیه‌جک:
”آرتیق بوتلر نه‌یئمه گرکدئر؟“
منم کی، سنئن سَسئنی اشئدئب
سنی قورویورام.
من همئشه یاشیل شام آغاجی کئمی‌یَم،
سنئن بار ورمه‌یئن مندن گلئر.
هوشعئن اؤز نصئحتی
9کئم حئکمتلی‌دئر، بو سؤزلری درک اتسئن،
کئم درّاکه‌لی‌دئر، بونلاری باشا دوشسون.
چونکی ربّئن یوللاری دوزدور.
صالحلر او یوللارلا گدئرلر،
لاکئن عاصئلر او یوللاردا بودره‌یئرلر.»
Currently Selected:
هوشَع 14: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
