هوشَع 13
13
ربّئن ائسرایئله قضبی
1اِفرایئم دانیشاندا هامی تئتره‌یئردی.
ائسرایئلده اوجالمیشدی،
آمّا بَعَله سیغینیب گوناها باتاندا، محو اولدو.
2ائندی گوناه اوستونه گوناه ادئرلر،
گوموشلرئندن اؤزلرئنه تؤکمه بوتلر،
مهارتله دوزَ‌لمئش بوتلر دوزَ‌لدئرلر.
هامیسی اوستا ائشی‌دئر.
اونلار باره‌ده دیئلئر:
«قوربان گتئرن آداملار، دانالاری اؤپسونلر!»
3بونا گؤره ده سحر دومانی کئمی،
اِرکَن اوچوب گدن شِح کئمی،
خرمنده سوورولان سامان چؤپو کئمی،
باجادان چیخان توستو کئمی اولاجاقلار.
4«آنجاق سنی مئصئردن چیخاردان
تارین رب منم.
سن مندن باشقا تاری تانیمامالی‌سان،
و مندن باشقا خئلاصکار یوخدور.
5من ائدئم کی، سنه چؤلده، قوراق تورپاقلاردا گؤز-قولاق اولموشدوم.
6اونلاری کؤکَلتدئیئمه گؤره دویدولار،
دویاندان سونرا اونلارین اوره‌یی کئبئرلَندی،
بونا گؤره ده منی یاددان چیخارتدیلار.
7بونا گؤره من اونلارا بئر آصلان اولاجاغام،
پلنگ کئمی یول کناریندا کمئنده دوراجاغام.
8بالالاری اوغورلانمیش آیی کئمی
اونلارا هوجوم چکه‌جیم،
اورَکلرئنئن پرده‌سئنی ییرتاجاغام.
دئشی آصلان کئمی اونلاری یِیئب قورتاراجاغام،
وحشی بئر جاناوار اونلاری پارچالایاجاق.
9ای ائسرایئل، منه، کؤمکچئنه ضئدّ چیخماغین
سنی اؤلومه آپاریر.
10ائندی پادشاهین هارادادیر کی،
بوتون شهرلرئنده سنی خئلاص اتسئن؟
حاکئملرئن هارادادیر؟
سن کی اونلار باره‌ده دیئردئن:
”منه بئر پادشاه ور، باشچیلار ور.“
11قضبئم ائچئنده سنه پادشاه وردئم،
قِیضئم ائچئنده اونو گؤتوردوم.
12اِفرایئمئن تقصئری بئربئرئنئن اوستونه قالانیب،
گوناهی آنبارا قویولوب.
13اِفرایئمئن آنادان دوغولما واختینین آغریلاری توتوب؛
لاکئن او، آغیلسیز اوغولدور.
چونکی واختی چاتاندا
بطندن چیخماغا لَنگئیئر.
14آیا اونلاری اؤلولر دئیارینین
اَلئندن قورتاریم؟
اونلاری اؤلومدن خئلاص اِدئم؟
ای اؤلوم، بلالارین هانی؟
ای اؤلولر دئیاری، سانجماغین هانی؟
شَفقَت گؤزومدن گئزلی‌دئر.
15اِفرایئم اؤز قارداشلاری آراسیندا
بارلی-بَهَرلی اولسا دا،
شرق یِلی، صحرادان قالخان
ربّئن کوله‌یی گله‌جک،
اونون بولاغی قورویاجاق،
چِشمه‌سئنئن سویو کَسئله‌جک.
بوتون قئیمتلی شیلر خزئنه‌سی قارت اولوناجاق.
16سامئره خاطاسینین جزاسینی چکه‌جک،
چونکی تاریسینا عاصی اولدو.
اونلار قیلینج آغزینا دوشوب اؤله‌جکلر.
بالالاری یِره چیرپیلیب پارچالاناجاق،
حامئله آروادلارینین قارنی یاریلاجاق.»
Currently Selected:
هوشَع 13: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
