یوعِل 1
1
محو اولموش محصول اوچون یاس
1پِتوعِل اوغلو یوعِله نازئل اولان ربّئن سؤزو بودور:
2ای آغساقّاللار، بونو اِشئدئن.
ای بوتون اؤلکه اهالئسی، بونا قولاق آسین،
سئزئن زامانینیزدا،
یا دا آتالارینیزین زامانیندا،
بله بئر شی مگر اولوب؟
3سئز بونو اؤولادلارینیزا دانیشین.
اؤولادلارینیز دا اؤز اؤولادلارینا،
اونلارین اؤولادلاری دا گله‌جک نسله دانیشسینلار.
4کَسئجی چَیئرتکه‌لردن قالانی، قایناشان چَیئرتکه یِیئب،
قایناشان چَیئرتکه‌دن قالانی، توللانان چَیئرتکه یِیئب،
توللانان چَیئرتکه‌دن قالانی، داغیدیجی چَیئرتکه یِیئبدئر.
5آییلین، ای کِفلی‌لر و آغلایین.
ای شراب کِفلی‌لری، هامینیز باغیرین،
اونا گؤره کی، شئرئن شراب آغزینیزدان آلیندی.
6چونکی منئم تورپاغیمین اوستونه
قووّتلی و سایسیز-حسابسیز بئر مئلّت هوجوم ادئب.
اونلارین دئشلری آصلان دئشلری کئمی‌دئر،
اونلاردا دئشی آصلانین ییرتیجی دئشلری وار.
7منئم اوزوم آغاجیمی محو ادئب،
انجئر آغاجیمی تئکه-تئکه ادئر،
قابیقلارینی کامئل سویوب یِره آتیب،
بوداقلاری آغ قالیب.
8جاوانلیقدا نئشانلیسینی ائتئرَن،
تامامن چول گِیئنَن
بئر قیز کئمی باغیرین.
9ربّئن اِوئندن
تاخیل و مایع تقدئملری کَسئلئب،
ربّه خئدمت ادن کاهئنلر یاس توتور.
10زَمی وئران قالیب، تورپاق آغلاییر،
چونکی تاخیل زای اولوب،
تزه شراب قورولوب،
زیتون یاغی قورتاریب.
11بوغدا و آرپایا گؤره
ای اَکئنچئلر، اوتانین!
ای باغبانلار، باغیرین!
چونکی تورپاغین محصوللاری یوخا چیخیب،
12تَنَک قورویوب،
انجئر آغاجی سولوب،
نار، خورما، آلما،
چؤلون بوتون آغاجلاری قورویوب.
دوغرودان دا بشر اؤولادلاری آراسیندان شادلیق یوخ اولوب.
تؤوبه‌یه چاغیرین
13ای کاهئنلر، چول گِیئنئن، یاس توتون!
ای قوربانگاه خئدمتچئلری، باغیرین!
ای تاریما خئدمت ادنلر،
گلئن چولدا گجه‌نی سحر ادئن،
چونکی تارینیزین اِوئندن
تاخیل و مایع تقدئملری دایاندیریلیب.
14اوروج اوچون واخت تعیئن ادئن،
موقدّس بئر ییغین چاغیرین.
آغساقّاللاری، اؤلکه‌نئن بوتون اَهالئسئنی
تارینیز ربّئن اِوئنه ییغین،
ربّه فریاد ادئن.
15وای او گونه!
چونکی، ربّئن او گونو یاخیندیر،
او گون قادئری-موطلق طرفئندن گلن قیرغین کئمی گلئر.
16او یمک گؤزلرئمئزئن قاباغیندان،
سِوئنج و شادلیق تاریمیزین اِوئندن مگر یوخ اولماییب؟
17تورپاق کَسَکلری آلتیندا توخوملار چورویور،
زئرزَمی‌لر بوش قالیب،
آنبارلار آلت-اوست اولوب،
چونکی تاخیللار قورویوب.
18حیوانلار نجه ده ائنئلده‌یئرلر!
مال-حیوان ناخیری گئج قالیب،
چونکی اونلار اوچون هچ اوتلاق یوخدور،
قویون سورولری ده جزا آلتیندادیرلار.
19یارب، سنه فریاد ادئرم،
چونکی چؤلون اوتلاقلارینی آلوو یاندیریب یاخیب،
بوتون زَمئنئن آغاجلاری اوددا قوورولوب.
20حتّا چؤلون حیوانلاری دا سنه حسرت چکئر،
چونکی آخار سولار قورویوب،
چؤلون اوتلاقلارینی آلوو یاندیریب یاخیب.
Currently Selected:
یوعِل 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
