چیخیش 38
38
یاندیرما قوربانی اوچون قوربانگاهین قورولماسی
1یاندیرما قوربانی اوچون، قورولان قوربانگاهی اَقاقئیا آغاجیندان دوزَلتدی: اوزونلوغو بش قول‌آچ#38:1 تقرئبن ۳/۲ متر، اِنی ده بش قول‌آچ، موربّع شکلئنده، بویو دا اوچ قول‌آچ#38:1 تقرئبن ۴/۱ متر ائدی. 2قوربانگاهین دؤرد کونجونده اونونلا بئر حئصّه‌دن اولان دؤرد بوینوز دوزَلتدی، اوستونو بورونجله اؤرتدو. 3قوربانگاهین لوازئماتینی، یاغ و کول قابلارینی، کورَکلری، لَیَنچه‌لری، چَنگل‌لری و خَکَندازلاری، هر شیی بورونجدن دوزَلتدی. 4قوربانگاه اوچون بورونجدن تور شبکه دوزَلتدی کی، کناریندان آشاغی‌یا، اونون یاریسینا قدر یتئشئردی. 5بورونج تورون دؤرد بوجاغیندا دئرَکلرئن کچدئیی دؤرد حالقانی تؤکدو. 6اَقاقئیا آغاجیندان دئرَکلر دوزَ‌لدئب، اوستونو بورونجله اؤرتدو. 7قوربانگاهی آپارماق اوچون دئرَکلری اونون هر ائکی یانینداکی حالقالارا تاخدی. قوربانگاهین ائچی بوش ائدی و اونو تاختادان دوزَلتدی.
8بؤیوک لَیه‌نی و اونون بورونج آلتلیغینی حوضور چادیرینین گئرئشئنده خئدمت ادن آروادلارین گوزگولرئندن دوزَلتدی.
ربّئن خیمه‌سئنئن حیطئنئن دوزَ‌لدئلمه‌سی
9ربّئن خیمه‌سئنئن حیطئنی دوزَلتدی. حیطئن جنوب طرفئنده، بئر طرف اوچون، اوزونلوغو یوز قول‌آچ#38:9 تقرئبن ۴۵ متر اولان پرده‌لر وار ائدی کی، نازئک کتاندان نفئس توخونموشدو. 10اونلارین ائیئرمی دئره‌یی و ائیئرمی آلتلیغی بورونجدن ائدی، دئرَکلرئن قولّابلاری و بندلری ده گوموشدن ائدی. 11شئمال طرفی اوچون، اوزونلوغو یوز قول‌آچ اولان پرده‌لر وار ائدی، پرده‌لرئن ائیئرمی دئره‌یی و ائیئرمی آلتلیغی بورونجدن ائدی، دئرَکلرئن قولّابلاری و بندلری ده گوموشدن ائدی. 12قرب طرفئنده اَلّی قول‌آچ#38:12 تقرئبن ۵/۲۲ متر پرده وار ائدی؛ اونون اون دئره‌یی و اون آلتلیغی وار ائدی. دئرَکلرئن قولّابلاری و بندلری ده گوموشدن ائدی. 13شرق طرفئنده ده حیطئن اِنی اَلّی قول‌آچ ائدی. 14دروازانین بئر طرفی اوچون اوزونلوغو اون بش قول‌آچ#38:14 تقرئبن ۸/۶ متر پرده‌لر وار ائدی؛ و اونلارین اوچ دئره‌یی و اوچ آلتلیغی وار ائدی؛ 15دروازانین او بئری طرفی ده بله ائدی. حیطئن دروازاسینین هر ائکی طرفی اوچون اوزونلوغو اون بش قول‌آچ پرده‌لر وار ائدی کی، اونلارین اوچ دئره‌یی و اوچ آلتلیغی وار ائدی. 16حیطئن بوتون اطراف پرده‌لری نفئس توخونموش نازئک کتاندان، 17دئرَکلرئن آلتلیقلاری بورونجدن، دئرَکلرئن قولّابلاری و بندلری گوموشدن، باشلیقلارین اؤرتویو ده گوموشدن ائدی؛ حیطئن بوتون دئرَکلری گوموشله بندلَندئلر. 18حیطئن دروازاسینین ناخیش تئکمه‌لی آراکَسمه‌سی لاجورد، ارغوانی و قیرمیزی پارچادان و نفئس توخونموش نازئک کتاندان ائدی؛ اوزونلوغو ائیئرمی قول‌آچ#38:18 تقرئبن ۹ متر، بویو دا حَیَطئن پرده‌لری کئمی بش قول‌آچ#38:18 تقرئبن ۳/۲ متر ائدی. 19اونون دؤرد دئره‌یی و دؤرد آلتلیغی بورونجدن، قولّابلاری گوموشدن، باشلیقلارینین اؤرتویو و بندلری ده گوموشدن ائدی. 20خیمه‌نئن و حیطئن بوتون اطراف میخلاری بورونجدن ائدی.
حوضور چادیری اوچون ائشله‌نن شیلر
21بودور شهادت خیمه‌سئنئن لوازئماتینین حسابی کی، لاوئلی‌لر موسانین امری ائله کاهئن هارونون اوغلو ائتامارین باشچیلیغی آلتیندا خئدمت اوچون اونلارا مشغول ائدئلر. 22یهودا قبئله‌سئندن خور اوغلو اوری اوغلو بِصه‌لِل ربّئن موسایا نه امر اتدئیئنی دوزَلتدی. 23اونونلا چالیشان اَخئساماک اوغلو اوهولئیاب کی، دان قبئله‌سئندن ائدی، اویماچیلیق و ناخیشچیلیق ائشئنی باجاریردی؛ هم ده لاجورد، ارغوانی و قیرمیزی پارچادا و نازئک کتاندا ناخیش تئکمه‌سی ائشئنی.
24موقدّس یِرئن بوتون بئناسی اوچون ائشله‌نن قیزیلین، یعنی یِللَتمه تقدئمی اولاراق هدئیّه ورئلن قیزیلین چکئسی موقدّس مکانین شِکِلئنه گؤره ائیئرمی دوقّوز تالانت یدّی یوز اوتوز شِکِل#38:24 تقرئبن ۸۸۰ کئلو ائدی. 25او گوموشون چکئسی کی، جاماعات سئیاهی‌یا آلینان زامان وردئلر، موقدّس مکانین شِکِلئنه گؤره یوز تالانت و مئن یدّی یوز یتمئش بش شِکِل#38:25 تقرئبن ۳/۲ تون ائدی. 26یعنی آدامباشی بئر بِکا کی، موقدّس مکانین شِکِلی اؤلچوسونه گؤره یاریم شِکِل ائدی. ساییلمیش آداملارین سایی کی، ائیئرمی یاشیندا و اوندان یوخاری اولان آداملار ائدئلر، جمی ۶۰۳۵۵۰ کئشی ائدی. 27موقدّس یِرئن آلتلیقلارینی و پرده‌نئن آلتلیقلارینی تؤکمَک ائشئنه یوز تالانت#38:27 تقرئبن ۳ تون گوموش: یوز آلتلیق اوچون یوز تالانت، یعنی هر آلتلیق اوچون بئر تالانت گوموش ائشلَندی. 28مئن یدّی یوز یتمئش بش شِکِل#38:28 تقرئبن ۸/۱۷ کئلو گوموش ده سوتونلار اوچون قارماقلار دوزَلتمَک، باشلیقلارینی اؤرتمَک و اونلاری بندلَمَک اوچون ائشلَندی. 29یِللَتمه تقدئمی اولاراق هدئیّه ورئلَن بورونجون چکئسی یتمئش تالانت و ائکی مئن دؤرد یوز شِکِل#38:29 تقرئبن ۱/۲ تون ائدی. 30اوندان حوضور چادیری گئرئشئنئن آلتلیقلاری، بورونج قوربانگاه، اوستونده‌کی بورونج تور، قوربانگاهین بوتون لوازئماتی، 31حیطئن اطراف آلتلیقلاری، حیطئن دروازاسینین آلتلیقلاری، خیمه‌نئن بوتون پایالاری و حیطئن بوتون اطراف میخلاری دوزَلتدی.
Currently Selected:
چیخیش 38: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
