چیخیش 39
39
1هارونون موقدّس پالتارلاری و موقدّس یرده خئدمت اوچون توخونموش پالتارلاری لاجورد، ارغوانی، و قیرمیزی پارچادان حاضیرلادیلار، نجه کی، رب موسایا امر اتمئشدی.
اِفودون دوزَ‌لدئلمه‌سی
2اِفودو قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان دوزَلتدی. 3قیزیل لؤوحه‌لری دؤیدولر و او، اونلاردان ساپلار کَسدی و اونلارلا لاجورد، ارغوانی و قیرمیزی پارچا و نازئک کتانین آراسینا نفئس توخونموش ناخیشلار تئکدئلر. 4ائکی چئیئنلئک دوزَلتدئلر کی، اِفودون هر ائکی اوجونو بئربئرئنه باغلاییردی. 5اونو اوستوندن باغلایان ناخیشلی کمر، هَمَن حئصّه‌دن یعنی او دا قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان ائدی. نجه کی، رب موسایا امر اتمئشدی.
6دامارلی عقئق داشلاری کی، اونلارین اوستونده ائسرایئل اوغوللارینین آدلاری مؤهور اویماسی کئمی حکّ اولونموشدو و حؤرمه قیزیل ساغاناقلارا سالینمیشدی، 7اِفودون چئیئنلئکلرئنه تاخدیلار. بونلار ائسرایئلئن اوغوللارینین خاطئره داشلاری‌دیر. نجه کی، رب موسایا امر اتمئشدی.
دؤشلویون دوزَ‌لدئلمه‌سی
8دؤشلویو ده اِفود کئمی ناخیشلی قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان دوزَلتدی. 9دؤشلوک موربّع شَکلئنده ائکی قات ائدی؛ اوزونلوغونو بئر قاریش، اِنئنی ده بئر قاریش دوزَلتدئلر. 10اوستونه دؤرد سیرا داش تاخدیلار. بئرئنجی سیرا یاقوت، توپاز، زومرود؛ 11ائکئنجی سیرا فئروزه، لاجورد داشی و آغ عقئق؛ 12اوچونجو سیرا سئرکون، عقئق و آمِتئست؛ 13دؤردونجو سیرا زبرجد، دامارلی عقئق و یَشَم داشی ائدی. بو داشلار حؤرمه قیزیل ساغاناقلارا تاخیلدی. 14داشلار ائسرایئلئن اوغوللارینین آدلارینا گؤره اون ائکی و اون ائکی قبئله اوچون نظرده توتولموشدو و هر بئر آدین اویما مؤهورو کئمی ائدی.
15دؤشلوکده خالئص قیزیلدان ائپه بَنزه‌ر بورما زنجئرلر قاییردیلار. 16ائکی حؤرمه قیزیل ساغاناق و ائکی قیزیل حالقا دوزَلتدئلر. ائکی حالقانی دؤشلویون ائکی اوجونا تاخدیلار. 17ائکی قیزیل ائپی دؤشلویون اوجلارینداکی ائکی حالقایا تاخدیلار؛ 18ائپلرئن او بئری اوجلارینی ائکی حؤرمه ساغاناغا تاخیب، اِفودون چئیئنلئکلرئنئن قاباق طرفئنه باغلادیلار. 19گئنه ده ائکی قیزیل حالقا دوزَ‌لدئب، اونلاری دؤشلویون ائکی اوجونا، اِفودلا یاناشی ائچ قاتینا تاخدیلار. 20داها ائکی قیزیل حالقا دوزَلتدئلر و اونلاری اِفودون چئیئنلئکلرئنئن قاباق طرفئنه، آشاغی‌یا، اِفودون ناخیشلی کمری ائله بئرلَشمه اوستونه بَرکئتدئلر. 21دؤشلوک حالقالاری ائله اِفودون حالقالارینی لاجورد قایتانلا باغلاییب، ناخیشلی اِفودون کمرئنئن اوستونه بَرکئتدئلر کی، دؤشلوک اِفوددان ساللانماسین. نجه کی، رب موسایا امر اتمئشدی.
22اِفودون جوبّه‌سئنی تامامن توخونما لاجورد پارچادان تئکدئلر. 23جوبّه‌نئن اورتاسیندا یر تئکدئلر، اونون قیراغیندا جیریلماماق اوچون بئر یاخا توخودولار.
24جوبّه‌نئن اَته‌یئنئن اطرافینا لاجورد، ارغوانی و قیرمیزی پارچادان و نفئس توخونموش کتاندان نارلار دوزدولر. 25خالئص قیزیل زینقیروولار دوزَ‌لدئب، جوبّه‌نئن اَته‌یی بویونجا نارلارین آراسینا تئکدئلر. 26بله‌جه خئدمت جوبّه‌سئنئن اَته‌یی بویونجا اطرافیندا زینقیروو و نار، سیرا ائله دوزولدو. نجه کی، رب موسایا امر اتمئشدی.
27هارون و اوغوللاری اوچون توخونما نازئک کتان خئرقه‌لری، 28نفئس توخونموش نازئک کتاندان عمّامه، نازئک کتان پاپاقلاری، اَیئرمه نازئک کتان آلت پالتاری، 29نفئس توخونموش نازئک کتان و لاجورد، ارغوانی و قیرمیزی پارچادان ناخیش تئکمه‌لی قورشاغی تئکدئلر. نجه کی، رب موسایا امر اتمئشدی.
30خالئص قیزیلدان موقدّس تاج اولان لؤوحه‌جئیی دوزَلتدئلر و اونون اوستونده مؤهور اویماسی اولاراق «ربّه موقدّسدئر» یازیسینی یازدیلار. 31لاجورد قایتان تئکدئلر کی، اونو عمّامه‌نئن اوستونه قویسونلار. نجه کی، رب موسایا امر اتمئشدی.
ائشئن باشا چاتماسی
32بله‌جه خیمه، یعنی حوضور چادیری اوچون بوتون ائشلر باشا چاتدی. رب موسایا نجه امر اتمئشدی، ائسرایئل اؤولادلاری دا بو ائشی اِله‌جه تاماملادیلار. 33خیمه‌نی موسانین یانینا گتئردئلر. چادیرینی و اونون بوتون لوازئماتینی، گئره‌لرئنی، چَرچئوه‌لرئنی، دئرَکلرئنی، سوتونلارینی، آلتلیقلارینی، 34قیرمیزی بویانمیش قوچ دَرئلرئندن اؤرتویو، سو ائتی دَرئلرئندن دوزَ‌لدئلمئش اؤرتویو، آراکَسمه پرده‌سئنی، 35شهادت ساندیغی و اونون دئرَکلرئنی، کفّاره قاپاغینی؛ 36مئزی و اونون لوازئماتینی؛ تقدئس چؤرکلرئنی، 37خالئص قیزیلدان چیراقدانی، اونون دوزولموش چیراقلارینی و ائشیق یاغینی، 38قیزیل قوربانگاهینی، مسح یاغینی، عطئرلی بوخورو، چادیرین گئرئش آراکَسمه‌سئنی، 39بورونج قوربانگاهینی، قوربانگاهین بورونج تورونو، اونون دئرَکلرئنی و بوتون لوازئماتینی، بؤیوک لَیه‌نی و اونون آلتلیغینی، 40حیطئن پرده‌لرئنی، سوتونلارینی و آلتلیقلارینی، حیطئن دروازاسی اوچون آراکَسمه‌نی، اونون ائپلرئنی و میخلارینی، خیمه یعنی حوضور چادیری و خیمه‌نئن عئبادتی اوچون بوتون اشیالاری، 41موقدّس یرده خئدمت اوچون توخونموش پالتارلاری، کاهئن هارونون موقدّس پالتارلاری و اوغوللارینین کاهئنلئک اتمه پالتارلاری اونا گتئردئلر. 42رب موسایا نجه امر اتمئشدی، ائسرایئل اؤولادلاری دا بو ائشی اِله‌جه تاماملادیلار. 43موسا بوتون ائشلری نظردن کچئردئب گؤردو کی، اونلار بو ائشه ربّئن امر اتدئیی کئمی عمل ادئبلر. موسا اونلارا برکت وردی.
Currently Selected:
چیخیش 39: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
