دانیال 3
3
قیزیل بوت و اودلو کوره
1پادشاه نِبوکَدنِصّر بئر قیزیل موجسّمه دوزَلتدی. اونون بویو آلتمیش قول‌آچ#3:1 تقرئبن ۲۷ متر، اِنی آلتی قول‌آچ#3:1 تقرئبن ۷/۲ متر ائدی. اونو بابئل وئلایتئنده اولان دورا اوواسیندا قویدو. 2سونرا پادشاه نِبوکَدنِصّر خبر گؤندَ‌ردی کی، ساتراپلاری، قاییم‌مقاملاری، والئلری، موشاوئرلری، خزئنه‌دارلاری، حاکئملری، وکئل‌لری، خولاصه، بوتون وئلایتلرئن مأمورلارینی ییغسینلار و قویدوغو موجسّمه‌نئن وقف اتمه مراسئمئنه گلسئنلر. 3او زامان ساتراپلار، قاییم‌مقاملار، والئلر، موشاوئرلر، خزئنه‌دارلار، حاکئملر، وکئللر، خولاصه، بوتون وئلایتلرئن مأمورلاری پادشاه نِبوکَدنِصّرئن قویدوغو موجسّمه‌نئن وقف اتمه مراسئمئنه ییغیلدیلار. اونلار نِبوکَدنِصّرئن قویدوغو موجسّمه‌نئن قاباغیندا دوردولار. 4جارچی اوجادان اعلان اتدی: «ای خالقلار، مئلّتلر و دئل‌لر، سئزه امر اولونور کی، 5بوینوز، نی، طنبور، چنگ، آرفا، بالابان و هر جور موسئقی آلَتلرئنئن سَسئنی اشئدن واخت، یِره اَیئلئب پادشاه نِبوکَدنِصّرئن قویدوغو قیزیل موجسّمه‌یه سجده اده‌سئنئز. 6کئم یِره اَیئلئب سجده اتمه‌سه، او ساعات آلوولانان اود کوره‌سئنه آتیلاجاق.» 7بله‌جه، بوتون خالقلارا، مئلّتلره و دئل‌لره منصوب آداملار بوینوز، نی، طنبور، چنگ، آرفا و هر جور موسئقی آلتلرئنئن سَسئنی اشئدن زامان یِره اَیئلئب پادشاه نِبوکَدنِصّرئن قویدوغو قیزیل موجسّمه‌یه سجده اتدئلر.
8اِله بو واخت بعضی کَلدانئلر یهودئلرئن ضئدّئنه ائتّئهام ووردولار. 9اونلار پادشاه نِبوکَدنِصّره ددئلر: «قوی پادشاه همئشه صاغ اولسون، 10سن امر ادئبسن کی، بوینوز، نی، طنبور، چنگ، آرفا، بالابان و هر جور موسئقی آلَتلرئنئن سَسئنی اشئدن هر کس یِره اَیئلئب قیزیل موجسّمه‌یه سجده اتسئن. 11کئم یِره اَیئلئب سجده اتمه‌سه، آلوولانان اود کوره‌سئنه آتیلاجاق. 12سنئن بابئل وئلایتئنه مأمور قویدوغون شَدرَک، مِشَک و عَبِدنِگو آدلی یهودئلر وار. ای پادشاه، بو آداملار سنی سایماییبلار، سنئن آللاهلارینا خئدمت اتمه‌یئرلر و قویدوغون قیزیل موجسّمه‌یه ده سجده اتمئرلر.»
13او زامان نِبوکَدنِصّر آلوولانان قضبله امر اتدی کی، شَدرَکی، مِشَکی و عَبِدنِگونو گتئرسئنلر. بو آداملار پادشاهین حوضورونا گتئرئلدی. 14نِبوکَدنِصّر اونلارا ددی: «ای شَدرَک، مِشَک و عَبِدنِگو، بو دوغرودور کی، سئز منئم آللاهلاریما قوللوق اتمئرسئنئز؟ منئم قویدوغوم قیزیل موجسّمه‌یه سجده اتمئرسئنئز؟ 15یاخشی اولار کی، ائندی بوینوز، نی، طنبور، چنگ، آرفا، بالابان و هر جور موسئقی آلَتلرئنئن سَسئنی اشئدن زامان یِره اَیئلئب دوزَلتدئیئم موجسّمه‌یه سجده اده‌سئنئز. اگر سجده اتمیه‌سئنئز، او ساعات آلوولانان اود کوره‌سئنه آتیلاجاقسینیز. او زامان سئزی هانسی تاری منئم اَلئمدن قورتارا بئلر؟» 16شَدرَک، مِشَک و عَبِدنِگو پادشاها جاواب وردئلر: «ای نِبوکَدنِصّر، بئزئم احتئیاجیمیز یوخدور کی، بو ائش اوچون سنئن قاباغیندا اؤزوموزدن مودافئعه ادک. 17اگر بله اولسا، قوللوق اتدئیئمئز تاریمیز قادئردئر کی، بئزی آلوولانان اود کوره‌سئندن خئلاص اتسئن و او بئزی سنئن اَلئندن قورتاراجاق، ای پادشاه. 18آمّا اگر اتمه‌سه ده، سنه معلوم اولسون کی، ای پادشاه، بئز سنئن آللاهلارینا قوللوق ادن دیئلئک و سنئن قویدوغون قیزیل موجسّمه‌یه ده سجده اتمیه‌جیئک.»
19او زامان نِبوکَدنِصّر بَرک قضبلَندی و شَدرَکئن، مِشَکئن، و عَبِدنِگونون ضئدّئنه سئماسی دَیئشئلدی. او امر اتدی کی، اود کوره‌سئنی عادتن قیزدیردیقلاریندان یدّی دفه آرتیق قیزدیرسینلار. 20قوشونونون گوجلو عسگرلرئنه امر اتدی کی، شَدرَکئن، مِشَکئن و عَبِدنِگونون اَل-قولونو باغلاییب اونلاری آلوولانان اود کوره‌سئنه آتسینلار. 21او واخت بو آداملارین اَل-قولونو باغلادیلار و اَیئنلرئنده شالوار، جوبّه، عمّامه و باشقا پالتارلاری ائله آلوولانان اود کوره‌سئنه آتدیلار. 22پادشاهین امری عاجئل اولدوغونا گؤره، اود کوره‌سی ده حدّئندن آرتیق قیزدیریلدیغی اوچون، اود آلووسو او آداملاری کی، شَدرَکی، مِشَکی و عَبِدنِگونو اودا آتیردیلار، قاپیب اؤلدوردو. 23بو اوچ نفر-شَدرَک، مِشَک و عَبِدنِگو دا اَل-قوللاری باغلانمیش آلوولانان اود کوره‌سئنئن ائچئنه ییخیلدیلار.
24او زامان پادشاه نِبوکَدنِصّر حیرته گلئب تَله‌سئک آیاغا قالخدی و اؤز موشاوئرلرئنه ددی: «مگر بئز اوچ نفر اَل-قولو باغلانمیش آدامی اودا آتمادیق؟» اونلار جاوابیندا پادشاها ددی: «دوغرودور، ای پادشاه!» 25او ددی: «باخ، من اودون ائچئنده اَل-قولو آچیق دؤرد نفرئن گَزدئیئنی گؤرورَم و اونلارا هچ نه اولمور. اونلاردان دؤردونجوسو آللاهلارین اوغلونا بَنزه‌یئر.» 26او زامان نِبوکَدنِصّر آلوولانان اود کوره‌سئنئن قاپیسینا یاخینلاشدی و سَسله‌یئب ددی: «ای اوجالاردا اولان تارینین قوللاری شَدرَک، مِشَک و عَبِدنِگو! چیخین و بورایا گلئن.» او واخت شَدرَک، مِشَک و عَبِدنِگو اودون ائچئندن چیخدیلار. 27اطرافا ییغیلمیش ساتراپلار، امئرلر، والئلر و پادشاهین موشاوئرلری گؤردولر کی، اود بو آداملارین بدنئنه هچ بئر ضرر وورماییب: نه اونلارین ساچلاری یانمیش، نه ده پالتارلاری دَیئشمئشدی، حتّا اودون حئسی ده اونلارا اوتورمامیشدی.
28او واخت نِبوکَدنِصّر ددی: «شَدرَکئن، مِشَکئن و عَبِدنِگونون تاریسینا شوکور اولسون کی، اؤز مَله‌یئنی گؤندَ‌رئب اونا بِل باغلایان قوللارینی خئلاص اتدی. اونلار پادشاهین امرئنه ضئدّ چیخیب حاضیر اولدولار کی، جانلاریندان کچسئنلر، لاکئن اؤزلرئنئن تاریسیندان باشقا بئر آللاها قوللوق و یا سجده اتمه‌سئنلر. 29بونا گؤره من بله فرمان ورئرم: هر خالقا، مئلّته، و دئله عایید اولان هر کس کی، شَدرَکئن، مِشَکئن و عَبِدنِگونون تاریسینا کوفر دئیه، تئکه-تئکه اولوناجاقدیر و اونلارین اِولری زئبئل‌لئیه چِورئله‌جک. چونکی بو جور خئلاص اتمیه قادئر اولان باشقا بئر تاری یوخدور.» 30او زامان پادشاه بابئل وئلایتئنده شَدرَکئن، مِشَکئن و عَبِدنِگونون منصبلرئنی اوجالتدی.
Currently Selected:
دانیال 3: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
