دانیال 2
2
نِبوکَدنِصّرئن یوخوسو
1نِبوکَدنِصّر پادشاهلیغینین ائکئنجی ائلئنده بئر یوخو گؤردو، روحو پرئشان اولدو و یوخوسو قاچدی. 2پادشاه امر اتدی کی، اونون یانینا سِحربازلار، اووسونچولار، جادوگرلر و مونجّئملر چاغیریلسین، اِله کی، پادشاهین یوخوسونو اونا دسئنلر. اونلار گلئب پادشاهین حوضوروندا دایاندیلار. 3پادشاه اونلارا ددی: «بئر یوخو گؤرموشم و روحوم پرئشاندیر کی، بئلئم بو یوخونون معناسی نه‌دئر.» 4مونجّئملر اَرامی دئلئنده پادشاها ددئلر: #۲:۴ ۲:۴-۷:۲۸ قدر، متن اَرامی دئلئنده یازیلمیشدیر کی، بابئلده او دؤورون رسمی دئلی ائدی. «پادشاه صاغ اولسون، یوخونو بو قوللارینا دانیش، بئز اونون تعبئرئنی دئیه‌رئک.» 5پادشاه مونجّئملره جاواب وردی: «من بله قرارا گلمئشم: اگر سئز منه هم یوخونو، هم ده اونون تعبئرئنی دِمیه‌سئنئز، پارچا-پارچا ادئله‌جکسئنئز، اِولرئنئز ده وئران ادئله‌جک. 6آمّا اگر یوخونو و اونون تعبئرئنی دئیه‌سئنئز، مندن هدئیّه‌لر، پاداشلار و بؤیوک حؤرمت آلاجاقسینیز. ائندی منه یوخونو و اونون تعبئرئنی بئلدئرئن.» 7اونلار گئنه جاواب وردئلر: «قوی پادشاه یوخونو بو قوللارینا دانیشسین، بئز ده اونون تعبئرئنی دئیه‌رئک.» 8پادشاه جاواب وردی: «یقئن بئلئرم کی، سئز واخت قازانماق ائسته‌یئرسئنئز، چونکی گؤرورسونوز کی، منئم قراریم قطعی‌دئر. 9اگر یوخونو منه دِمیه‌سئنئز، سئزئن اوچون فقط بئر جزا اولاجاق. سئز سؤزله‌شئبسئنئز کی، وضعئیّتئن دَیئشئلمه‌یئنه‌جک منه یالان و اویدورما سؤزلر دئیه‌سئنئز. ائندی منه یوخونو بئلدئرئن. اوندا بئله‌رم کی، سئز اونو یوزا بئلرسئنئز.» 10مونجّئملر پادشاها جاواب وردئلر: «یِر اوزونده اله بئر آدام یوخدور کی، پادشاهین طلبئنی یرئنه یتئره بئلسئن. هچ پادشاه، نه قدر عظمتلی و قودرتلی اولسا دا، بله بئر شیی هچ سِحربازدان، اووسونچودان و یا مونجّئمدن ائستمه‌یئب. 11پادشاهین ائسته‌دئیی شی اِله چتئندئر کی، آللاهلاردان باشقا هچ کس بونو پادشاها آشکار اده بئلمز. اونلارین دا مسکنی ائنسانلار آراسیندا دیئل.» 12پادشاه بو سؤزه گؤره قضبله‌نئب چوخ حئرصلَندی و امر اتدی کی، بابئلئن بوتون حئکمتلی‌لرئنی محو اتسئنلر. 13بله‌جه حئکمتلی‌لری اؤلدورمک باره‌ده امر چیخدی؛ و اونلار دانیال و اونون یولداشلارینی آختاردیلار کی، اؤلدورسونلر.
14او زامان دانیال کشئکچئلر ریئسی اَریوکلا کی، بابئلئن حئکمتلی‌لرئنی اؤلدورمیه گتمئشدی، حئکمت و بصئرتله دانیشدی. 15او، پادشاهین حَربی ریئسی اَریوکدان سوروشدو: «نئیه پادشاه بله بئر عاجئل امر ورئب؟» او واخت اَریوک اَحوالاتی دانیالا دانیشدی. 16دانیال ائچه‌ری گئرئب پادشاهدان خاهئش اتدی کی، یوخونون تعبئرئنی پادشاها بئلدئرمک اوچون اونا واخت ورسئن.
17دانیال اؤز اِوئنه قاییدیب اَحوالاتی دوستلاری خَنَنیا، مئشااِل و عَزَریایا دانیشدی 18و اونلارا ددی کی، بو سئرّ باره‌ده گؤیلرئن تاریسیندان مرحمت ائسته‌سئنلر و دانیاللا اونون یولداشلاری باشقا بابئل حئکمتلی‌لری ائله بئرلئکده محو اولماسینلار. 19او زامان بو سئرّ دانیالا گجه گلن رؤیادا آشکار اولدو. او واخت دانیال گؤیلرئن تاریسینا شوکور اتدی.
20دانیال ددی: «تارینین آدی ابددن ابده‌جک موبارک اولسون! چونکی حئکمت و قودرت اونوندور. 21واختی و دؤورو دَیئشدئرَن اودور. او، پادشاهلاری تختدن سالار و تخته قویار، حئکمتلی‌لره حئکمت، عاقئل‌لره عاغیل وِرَر. 22درئن و گئزلی سئرّلری او آچار، قارانلیقدا قالانی او بئلر. ائشیق اونونلا ساکئندئر. 23ای آتالاریمین تاریسی، سنه شوکور و حمد اولسون کی، منه حئکمت و قودرت وردئن، ائندی سندن ائسته‌دئیئمئز شیی منه آشکار اتدئن. بله‌جه پادشاهین مَسَله‌سئنی بئزه بئلدئردئن.»
دانیالین یوخونو یوزماسی
24بله‌جه دانیال اَریوکون یانینا کی، پادشاه اونو بابئلئن حئکمتلی‌لرئنی اؤلدورمک اوچون تعیئن اتمئشدی، گلئب اونا ددی: «بابئلئن حئکمتلی‌لرئنی اؤلدورمه. منی پادشاهین یانینا آپار، اونا یوخوسونون معناسینی بئلدئره‌رم.» 25او واخت اَریوک دانیالی تَله‌سئک پادشاهین یانینا گتئرئب اونا ددی: «من اسئر اولونموش یهودالی‌لار آراسیندان بئر آدام تاپمیشام کی، پادشاهین یوخوسونو تعبئر اده بئلر.» 26پادشاه، بِلطِشَصّر آدلانان دانیالدان سوروشدو: «آیا قادئرسن کی، گؤردویوم یوخونو و اونون تعبئرئنی منه دئیه‌سن؟» 27دانیال پادشاها جاواب وردی: «پادشاهین سوروشدوغو سئرّی حئکمتلی‌لر، اووسونچولار، سِحربازلار و فالچیلار اونا آچا بئلمزلر. 28آنجاق گؤیلرده سئرّلری آچان بئر تاری وار و گله‌جکده نه اولاجاغینی پادشاه نِبوکَدنِصّره او بئلدئرئب. یاتارکن گؤردویون یوخو و رؤیالار بله‌دئر:
29ای پادشاه، سن اؤز یاتاغیندا اولارکن بو فئکئرلر گلدی کی، بوندان سونرا نه اولاجاق؟ سئرّلری آچان دا نه اولاجاغینی سنه گؤرستدی. 30منه بو سئرّ اونون اوچون آچیلمادی کی، گویا باشقا آداملاردان داها چوخ حئکمتئم وار. آنجاق بونون اوچون کی، یوخو پادشاها بئلدئرئلسئن و سن ده اؤز اوره‌یئنئن دوشونجه‌لرئنی بئله‌سن.
31ای پادشاه، سن یوخودا بؤیوک بئر موجسّمه گؤروبسن. چوخ بؤیوک و چوخ عظمتلی اولان بو موجسّمه، سنئن قاباغیندا دوردو. اونون گؤرونوشو قورخولو ائدی. 32بو موجسّمه‌نئن باشی خالئص قیزیلدان، سئنه‌سی و قول‌لاری گوموشدن، قارنی و بودلاری دا بورونجدن ائدی. 33بالدیرلاری دمئردن، آیاقلارینین بئر حئصّه‌سی دمئردن، بئر حئصّه‌سی ده گئلدن ائدی. 34سن باخارکن، اَل دَیمه‌دن بئر داش یِرئندن قوپاریلدی، موجسّمه‌نئن دمئر و گئل آیاقلاریندان ووروب اونلاری تئکه-تئکه اتدی. 35او زامان دمئر، گئل، بورونج، گوموش و قیزیل بئرلئکده پارچالاندی و یای خرمنلرئنده‌کی سامان چؤپو کئمی سوورولدو. کولَک اونلاری آپاردی و اونلاردان اثر-علامت قالمادی. لاکئن موجسّمه‌نی داغیدان داش، بؤیوک بئر داغ اولدو و بوتون دونیانی توتدو.
36یوخو بو ائدی. ائندی اونون تعبئرئنی پادشاها دئیه‌رئک. 37ای پادشاه، سن شاهَنشاهسان. گؤیلرئن تاریسی پادشاهلیغی، قووّتی، قودرتی و عئزّتی سنه ورئب. 38او هر یرده یاشایان بشر اؤولادلارینی، چؤلون حیوانلارینی و گؤیون قوشلارینی سنئن ائختئیارینا ورمکله، سنی اونلارا حؤکمدار ادئب. قیزیلدان اولان باش سنسن! 39سندن سونرا سندن آشاغی مرتبه‌ده اولان باشقا پادشاهلیق ظوهور اده‌جک. اوندان سونرا دا بورونجدن اولان، بوتون دونیایا حؤکمرانلیق ادن اوچونجو بئر پادشاهلیق اولاجاق. 40دؤردونجو پادشاهلیق دا دمئر کئمی مؤحکم اولاجاق، نجه دمئر هر شیی اَزئب قیرار، او دا بوتون باشقالارینی، هر شیی قیران دمئر کئمی اَزئب قیراجاق. 41آیاقلارین و بارماقلارین بئر حئصّه‌سئنئن کوزه‌گر گئلئندن، بئر حئصّه‌سئنئن ده دمئردن اولدوغونو گؤرمه‌یئنئن معناسی بودور کی، او بؤلونموش پادشاهلیق اولاجاق. اوندا بئر قدر دمئر مؤحکملئیی قالاجاق، نجه کی، سن دمئری کوزه‌گر گئلی ائله قاریشیق گؤروبسن. 42آیاق بارماقلارینین بئر حئصّه‌سی دمئردن، بئر حئصّه‌سی گئلدن اولدوغو کئمی، بو پادشاهلیغینین دا بئر حئصّه‌سی مؤحکم، بئر حئصّه‌سی ضعئف اولاجاق. 43دمئری کوزه‌گر گئلی ائله قاریشیق گؤردویونون معناسی بودور کی، اونلار اِولَنمک واسئطه‌سی‌ائله بئربئرلری ائله قاریشاجاقلار#2:43 حرفی ترجومه «اونلار ائنسان توخومو ائله بئربئرلری ائله قاریشاجاقلار.»، لاکئن دمئر گئل‌له بئرلَشمه‌دئیی کئمی، اونلار دا بئربئرلری ائله بئرلَشمیه‌جکلر.
44او پادشاهلارین دؤورونده گؤیلرئن تاریسی هچ واخت داغیلمایان بئر پادشاهلیق قوراجاق و بو پادشاهلیق باشقا خالقین اَلئنه کچمیه‌جک. او بوتون اوّلکی پادشاهلیقلاری اَزئب داغیداجاق، و اؤزو ابدی قالاجاق. 45سن گؤردون کی، داغدان بئر داش اَل دَیمه‌دن قوپاریلدی، دمئری، بورونجو، گئلی، گوموشو و قیزیلی تئکه-تئکه اتدی. بله‌جه بؤیوک تاری بوندان سونرا نه اولاجاغینی پادشاها بئلدئرئب. بو یوخو دوغرودور و اونون تعبئری ده ائنانمالی‌دیر.»
46او زامان پادشاه نِبوکَدنِصّر اوزو اوسته دوشوب دانیالا سجده اتدی و امر اتدی کی، اونون اوچون تقدئم گتئرئب بوخور یاندیرسینلار. 47پادشاه دانیالا ددی: «ائندی کی، سن بو سئرّی آچا بئلدئن، حقئقتن، سئزئن تارینیز، آللاهلارین تاریسی و پادشاهلارین آغاسی‌دیر، سئرّلری آچان دا اودور.» 48بوندان سونرا پادشاه دانیالی اوجا وظئفه‌یه قویدو و اونا چوخ قئیمتلی هدئیّه‌لر وردی. اونو بابئل وئلایتئنئن باشچیسی و بوتون بابئلئن حئکمتلی‌لرئنئن باش ریئسی تعیئن اتدی. 49دانیال پادشاهدان خاهئش اتدی و او دا شَدرَکی، مِشَکی و عَبِدنِگونو بابئل وئلایتئنه مأمور قویدو. لاکئن دانیال پادشاهین ساراییندا قالدی.
Currently Selected:
دانیال 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
