عاموس 9
9
ائسرایئلئن وئران اولماسی
1پروردئگاری گؤردوم کی، قوربانگاه یانیندا دورموشدو. او منه ددی:
«سوتون باشلیقلارینی اِله وور کی، آستانالار تئتره‌سئن.
بئنانی هامینین باشینا اوچورت.
صاغ قالانلاری من قیلینجدان کچئرده‌جیم.
اونلاردان هچ کئم قاچیب قورتولا بئلمیه‌جک.
2اگر یری قازیب اؤلولر دئیارینا گئرسه‌لر بِله،
اونلاری اورادان توتاجاغام.
گؤیلره قالخسالار بِله،
اونلاری اورادان اِندئره‌جیم.
3کَرمِل داغینین تپه‌سئنده گئزلَنسه‌لر بِله،
اونلاری آختاریب اورادان گؤتوره‌جیم.
گؤزومدن گئزله‌نئب دهنزئن دئبئنه گئرسه‌لر بِله،
اورادا ائلانا امر اده‌جیم کی، اونلاری سانجسین.
4دوشمن قاباغیندا اسئر آپاریلسالار بِله،
قیلینجا امر اده‌جیم کی، اونلاری قیرسین.
گؤزلرئمی اونلارین اوستونه یاخشیلیق اوچون یوخ،
پئسلئک اوچون دئکه‌جیم.»
5قوشونلار ربّی پروردئگاردیر کی، توخونوب یری اَرئدَر،
اورادا یاشایان هر کس یاسا باتار،
بوتون یِر نئل چایی کئمی قابارار،
مئصئرده‌کی نئل چایی کئمی چکئلر.
6اودور کی، یوخاری اوتاقلارینی گؤیلرده تئکَر،
طاغینی یِرئن اوستونه قورار،
دهنز سولارینی اؤزونه چاغیریب اونلاری یِر اوزونه تؤکَر -
اونون آدی ربدئر.
7رب بویورور: «ای ائسرایئل اؤولادلاری!
مگر سئز منئم اوچون کوشلولار کئمی دیئلسئنئز؟
مگر من ائسرایئلی مئصئر اؤلکه‌سئندن،
فئلئسطلی‌لری کَفتوردان#9:7 یعنی «کرئت»،
اَراملی‌لاری قئردن چیخارتمادیم؟
8باخ، پروردئگار ربّئن گؤزلری بو گوناهکار مملکته دئکئلئر.
اونلاری یر اوزوندن محو اده‌جیم.
آنجاق یعقوب نسلئنی کامئل محو اتمیه‌جیم.»
رب بله بویورور.
9«چونکی، باخ، من بله امر ادئرم:
من ائسرایئل نسلئنی بوتون مئلّتلر آراسیندا خَلبئردن کچئردن کئمی کچئرده‌جیم.
بئر چینقیل بِله، یِره دوشمه‌یه‌جک.
10خالقیمدان بوتون گوناه ائشله‌دنلر قیلینجلا اؤله‌جکلر،
اونلار کی، دیئردئلر: ”بلا بئزه یاخینلاشماز، بئزه راست گلمز.“
مملکتئن تزه‌دن برپا اولماسی
11اِله او گون داوودون ییخیلان چادیرینی برپا اده‌جیم.
اونون دَلمه-دِشئکلرئنی توتوب
وئران یِرلرئنی تئکه‌جیم.
اونو اوّلکی حالینا سالاجاغام. 12اِله کی قالان اِدوملولارا
و منئم آدیملا چاغیریلان بوتون مئلّتلره صاحئب اولسونلار.»
بونو اده‌جک اولان رب بویورور.
13رب بویورور:
«باخ، اِله گونلر گله‌جک کی،
کوتان سورَن، بئچئنچئیه یِتئشه‌جک،
اوزوم سیخان، مِینه توخوم اَکَنله راستلاشاجاق،
داغلاردان شئرئن شراب داماجاق،
بوتون تپه‌لردن ده آخاجاق.
14خالقیم ائسرایئلی اسئرلئکدن قایتاراجاغام،
وئران شهرلری تئکئب اونلاردا یاشایاجاقلار.
اوزوملوکلری اَکئب شرابینی ائچه‌جکلر،
باغلار سالیب میوه‌سئندن یئیه‌جکلر.
15اونلاری اؤز تورپاقلاریندا اَکه‌جیم،
اونلارا وردئیئم تورپاقدان بئر داها قوپاریلمایاجاقلار.» تارین رب بله دیئر.
Currently Selected:
عاموس 9: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
