۲پطروس 1
1
1اؤزونو عئسا مسئحه قول اتمئش و اونون حوارئسی شمعون پطروسدان؛ او آداملارا کی، تاریمیز و قورتاریجیمیز عئسا مسئحئن صالحلئیی واسئطه‌سئله بئزئم کئمی همن ائمانی آلیبلار: 2تارینین و ربّئمئز عئسانین معرئفتئنده سئزه بول-بول فیض و باریش اولسون.
ائلاهی دعوت
3اونون ائلاهی قودرتی، اونون حقئقی معرئفتی ائله کی، بئزی اؤز عئزّت و فضئلتئنئن واسئطه‌سئله دعوت اتدی، حیات و دئندارلیغا عایید اولان هر شیی بئزه عطا ادئب. 4چونکی بونلارین واسئطه‌سئله او بئزه قئیمتلی و مؤحتشم وعده‌لرئنی عطا ادئب، اِله کی، اونلارین واسئطه‌سئله شهوتدن باش آلان دونیادا اولان فساددان قاچیب، ائلاهی طبئعتئن شرئکی اولاسینیز.
5اِله بونا گؤره ده سئز بوتون سعی‌یئنئزی صرف ادئن و ائمانینیزا اخلاقی فضئلت، اخلاقی فضئلتئنئزه معرئفت، 6معرئفته نفسه حاکئم اولماق، نفسه حاکئم اولماغا تحمّول، تحمّوله دئندارلیق، 7دئندارلیغا قارداش سوگئسی، و قارداش سوگئسئنه ده محبّتی علاوه ادئن. 8چونکی اگر بونلار سئزده اولسا و آرتسا، ربّئمئز عئسا مسئحئن حقئقی معرئفتئنده سئزی ائشسئز و ثمره‌سئز قویمازلار. 9کئمده بونلار یوخدور، او کوردور، بصئرتی یوخدور و قاباقکی گوناهلاریندان تمئزله‌ندئیئنی یاددان چیخاردیب. 10بونا گؤره، قارداشلار، داها چوخ چالیشین کی، دعوت و سچئلدئیئنئزی مؤحکملده‌سئنئز، نه‌قدر کی، بو شیلری ادئرسئنئز، اصلا بودره‌مزسئنئز. 11چونکی بو یوللا ربّئمئز و قورتاریجیمیز عئسا مسئحئن ابدی پادشاهلیغینا گئرمک سئزه بول-بول ورئله‌جک.
12بونون اوچون من همئشه حاضیر قالاجاغام کی، بونلاری سئزه خاطیرلادیم، گرچی سئز اله ائندی ده بونلاری بئلئرسئنئز و یانینیزدا اولان حقئقتده ثابئتقدمسئنئز. 13و صحئح بئلئرم کی، من بو مسکنده ائکن خاطیرلاتماقلا سئزی اویادیم. 14چونکی بئلئرم کی، مسکنئمی تزلئکله بئر یانا قویاجاغام،#1:14 پطروس اؤز اؤلومونه ائشاره اِدئر. نجه کی، ربّئمئز عئسا مسئح ده منه آشکار ادئب. 15بونا گؤره چالیشاجاغام کی، منئم رحلتئمدن سونرا دا بونلاری یادا سالماغا قادئر اولاسینیز. 16چونکی بئز ربّئمئز عئسا مسئحئن قودرتئنی سئزه بئلدئرن زامان، و اونون گئنه گله‌جه‌یئنی سئزه بئلدئرن زامان، اوستالیقلا دوزَ‌لمئش افسانه‌لرئن دالینجا گتمه‌دئک، لاکئن اؤزوموز اونون احتئشامینین شاهئدلری ائدئک. 17اونا گؤره کی، حؤرمت و عئزّتی آتا تاریدان آلان زامان، عظمتلی اولان عئزّتدن بله بئر خئطاب گلدی: «بو منئم سوگئلی اوغلومدور کی، اوندان چوخ راضی‌یام.»#1:17 متّا ۱۷:۵، مرقوس ۹:۷، لوقا ۹:۳۵ 18و بئز اؤزوموز موقدّس داغدا اونونلا اولان زامان، گؤیدن گلن بو خئطابی اشئتدئک. 19و پیغمبرلرئن سؤزلری بئزئم یانیمزدا داها چوخ ثابئت اولدو کی، سئز ده گون دوغانا کئمی و سحر اولدوزو اورَکلرئنئزده طولوع اده‌نه کئمی یاخشی ادئرسئنئز کی، قارانلیق یرده ائشیق سیچیران بئر چیراق کئمی اونا دئقّت ادئرسئنئز. 20لاکئن هر شیدن اوّل بونو بئلئن کی، موقدّس یازیدا اولان هچ بئر نبئلئک شخصئن اؤز تفسئرئندن دیئل. 21چونکی هچ نَبئلئک هچ بئر زامان ائنسان ائراده‌سی ائله اِدئلمه‌یئب، آمّا ائنسانلار موقدّس روح طرفئندن حرکته گلئب تاریدان دانیشدیلار.
Currently Selected:
۲پطروس 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
