Lom 15

Yeakɔ̃i ń wɛdɔa Luazio

1Wá gbɛ̃́ pɔ wá gbãa ń luanaaikɛaoɔ, sema wà gbɛ̃́ busɛɔ fɔ̃ an gbãasai guu, i kɛ yã pɔ i kawagu no an gbãasai yãi. 2Wá baade lí yã pɔ a ka a gbɛ̃dogu kɛ, kɛ́ aà e maakũ, i zɛdɔ yãi. 3Asa Kilisi i azĩa pɔeã kɛo. Wa kɛ̃̀ wà mɛ̀, Lua sɔ̃sɔ̃a gɔ̃̀ɛ̀.#Soũ 69.10 4Yã pɔ wa kɛ̃̀ yãa pii, wa kɛ̃̀ lɛdaawá yãiɛ. Yãpi ì wá gba mɛna, ì wá gba sɔ̃̀ kɛ́ wàɔ wɛdɔ ziai. 5Lua pɔ ì ń gba mɛna ì ń gba sɔ̃̀ to àɔ nɔsɛdoũ vĩ ń kɔ̃o lá Kilisi Yesu vĩwa, 6í Lua wá Dii Yesu Kilisi Mae tɔbɔ ń nɔsɛmɛndoo ń lɛdoũo.

7À kɔ̃ si lá Kilisi á síwa Lua tɔbɔa yãi. 8Malɛ oɛ́, Kilisi gɔ̃̀ Yudaɔ dɔnlɛde ũ, kɛ́ à lɛ́ pɔ Lua gbɛ̃̀ an deziɔnɛ kɛ, aai dɔ̃ Lua naai vĩ, 9buipãleɔ i Lua tɔbɔ aà suuu yãi, lá wa kɛ̃̀wa wà mɛ̀:

A yãi tò má n saaukpa buipãleɔnɛ,

mí n taasilɛ.#Soũ 18.50

10Wà mɛ̀ lɔ:

Buiɔ, à pɔnakɛ ń Lua gbɛ̃́ɔ.#Iko 32.43

11Wà mɛ̀ lɔ:

Bui pii, à Dii taasilɛ,

busu gbɛ̃pii à aà tɔbɔ gbiagbia.#Soũ 117.1

12Isaia ò lɔ:

Yɛse miɔna a vlãpa,

i fɛlɛ gɔ̃ buipãleɔ kia ũ,

an wɛ́ iɔ dɔaazi.#Isa 11.10

13Lua pɔ gbɛ̃pii wɛ́ dɔi to pɔna ń aafiao pɛɛwá a naai pɔ álɛ kɛ yãi, kɛ́ á wɛdɔaaazi e kãfĩ ń a Nisĩna gbãao.

Pɔlu zĩkɛa Luaɛ

14Ma gbɛ̃́ɔ, má dɔ̃ sãasã kɛ́ maakɛa pɛ̀ɛwá, á yãpii dɔ̃ wasawasa, á fɔ̃ à lɛdakɔ̃wa. 15Ma lápi kɛ̃aɛ́ guu ma yãeɔ kɛ̃̀ ń sɔ̃o dilɛa kɛ́ àɔ dɔágu yãi, asa Lua gbɛ̃kɛkɛ̀mɛɛ, 16ɔ̃ ma gɔ̃ Kilisi Yesu zĩkɛna ũ buipãleɔnɛ. Malɛ bao pɔ bɔ̀ Lua kĩi kpanɛ́, kɛ́ an kua e àɔ adoa ń Lua Nisĩna gbãao. Malɛ bee kɛ Luaɛ aà gbagbaa pɔ ì kaaagu ũɛ. 17Ma naa Kilisi Yesuwa guu má fɔ̃ mà ĩanadã zĩ pɔ malɛ kɛ Luaɛ yãmusu. 18Asa má yãe oa vĩo, mɛ́ i kɛ yã pɔ má kɛ̀ Kilisi sabai baasio. A tò buipãleɔ Lua yãmà ma yã'oa ń ma yãkɛao guu 19ń dabudabuɔ ń yãbɔnsaɛɔ gbãao ń Lua Nisĩna gbãao. Bɔa Yelusalɛũ ma bɛbɛ̀ wɛ̃lɛ ń wɛ̃lɛo e ma gɛ ma pɛɛò Ilili busuu Mɛsi bao kpawakɛa guu. 20Miɔ ye mà baonapi kpa gu pɔ wi Mɛsi yãmau yãaoɛ, kɛ́ masu buba gbɛ̃pãle pɔ gãuo yãi. 21Lá a kɛ̃a wà mɛ̀:

Gbɛ̃́ pɔ wi aà yã'onɛ́ yãaoɔ wɛ́ a kɛ̃́,

gbɛ̃́ pɔ aai aà baoma yãaoɔ dɔ̃.#Isa 52.15

22Yã pɔ ìɔ kpamɛɛ mɔɔmɔɔ mà mɔ á kĩin we.#Lom 1.13 23À kà wɛ̃̀ ũma, kɛ́ miɔ ye mà mɔ á gwai. Tiasa lá yãe ma dɔa busuɛ beeɔ guu lɔo, 24ma wɛ́ dɔi wà wɛsikɔ̃lɛ sa ma gɛa Ɛsipayã busuu guu. Tó ma gɔɔplakɛ̀ánɔ ń pɔnao, í gɛ́ zɛimɛɛ we. 25Tia kɛ́wa sɔ̃ malɛ gɛ́ ń dɔnlɛo Lua gbɛ̃́ɔnɛ Yelusalɛũ,#1 Kln 16.1 26asa gbɛ̃́ pɔ aa ku Masedoni busuu ń Gɛlɛsi busuo zɛ̀ò wà Lua gbɛ̃́ taaside pɔ aa ku Yelusalɛũɔ kamasakaɛ. 27Aa zɛ̀ò, ãma teasiɛ, asa lá Yudaɔ Lua aizɛɛ lì buipãleɔnɛ, a maa buipãleɔ ń dũnia aizɛɛ lí Yudaɔnɛ sɔ̃ɛ.#1 Kln 9.11 28Tó ma gbapi nànɛ́ ń ɔzĩ má làa, ma gɛa Ɛsipayã guu má bɔlɛ á kĩiɛ. 29Má dɔ̃ kɛ́ tó malɛ mɔ́ á kĩi, Kilisi baaa pɛɛaa guu ɔ̃ má mɔ́òwá.

30Ma gbɛ̃́ɔ, ma naɛ́ wá Dii Yesu Kilisizi ń yeakɔ̃i pɔ Lua Nisĩna ì iwɛ̃ɛo, à dɛ̃ɛka àɔ wabikɛmɛɛ Luawa, 31kɛ́ aà ma bɔ Yude luayãdansaiɔ ɔzĩ. À wabikɛɛ̀ kɛ́ dɔnlɛ pɔ malɛ gɛ́ò Yelusalɛũ Lua gbɛ̃́ɔnɛ kɛnɛ́ pɔmaa ũ, 32mí á le ń pɔnao, tó Lua wèi, mí kãmabo á kĩi. 33Lua aafiade aàɔ kuánɔ ápii. Ãmi!

Currently Selected:

Lom 15: Boo2024

Highlight

Copy

Compare