Lom 13

Misiilɛa busu gbãadeɔnɛ

1Gbɛ̃pii lí misiilɛ busu gbãadeɔnɛ, asa ikoe ku Lua lɛ́ saio. Lua mɛ́ gbãade pɔ kuɔ dìlɛ pii. 2Ayãmɛto gbɛ̃́ pɔ bɔ̀ gbãade yã kpɛ, ade bɔ̀ yã pɔ Lua dìlɛ kpɛɛ. Gbɛ̃́ pɔ bɔ̀ ń kpɛɔ ńzĩa dà yãuɛ. 3I kɛ maakɛnaɔ mɛ́ lí vĩakɛ kpalablenaɔnɛo, sema vãikɛnaɔ. Tó ń ye ǹ vĩakɛ gbãadeɛo, niliɔ maakɛ, i n saaukpa. 4Gbãadeá Lua zĩkɛnaɛ n aafia yãi. Tó n vãikɛ̀ sɔ̃, vĩakɛɛ̀, asa a fɛ̃nda looa pã no. Lua zĩkɛnaɛ, ì tɔsiɛ̀ vãikɛnawaɛ. 5A yãi tò a maa àli misiilɛnɛ́. I kɛ ĩadama yãi ado no, á laasoo yãiɛ lɔ. 6Bee yãi i wɛ̃̀'ɔ̃a kpai sɔ̃, asa gbãadeɔá Lua zĩkɛnaɔnɛ, aalɛ zĩpi kɛɛ̀ɛ. 7Àli fĩabonɛ́ pii. Àli wɛ̃̀'ɔ̃a kpa a sinawa, íli á pɔɔ lá sí lɔ. Àli misiilɛ gbɛ̃́ pɔ dɛ à misiilɛɛ̀. Àli gbɛ̃́ pɔ dɛ à aà yãda yãda.#Mat 22.21

Gɔɔ kà kãi, wàɔ yekɔ̃i

8Ásuli gbɛ̃e fĩa sɛo, sema yeakɔ̃i baasio. Gbɛ̃́ pɔ ye a gbɛ̃deezi, Lua ikoyã pɛ̀ɛwàɛ. 9Wà mɛ̀ nsuli wulɛ ń gbɛ̃pãle nɔoo, nsuli gbɛ̃́ dɛo, nsuli kpãi'oo, nsuli pɔ bĩikɛo.#Bɔa 20.13-17 Yãpiɔ ń yãdilɛa pãle pɔ kuɔ pii ku yãɛ bee guuɛ wà mɛ̀: Ǹyɔ̃ ye gbɛ̃́i lá nzĩa wɛ̃niwa.#Lev 19.18 10Tó gbɛ̃́ ye a gbɛ̃deezi, ìli vãikɛɛ̀o. Yeakɔ̃i mɛ́ Lua ikoyãpapaa ũ.

11Àli kɛ màa, asa á gɔɔ pɔ wá kuwàɛ dɔ̃. Á vua iu gɔɔ kà, asa wá suabaa kãi tia dɛ gɔɔ pɔ wa Yesu naaikɛ̀la. 12Gwãasĩna kà zã̀, gudɔa mɛ́ kãi. Wà gusia yã kɔlɛ, wí gupua gɔ̃kɛbɔɔ sɛlɛ. 13Wàɔ ku wá dɔɔwa fãanɛ gbɛ̃́ɔ ũ lalasi kɔ̃̀ɔ ń wɛ̃dɛkɛao sai, nɔdãakpaa ń wisaiyão sai, lɛkpaa ń zaakɔ̃uo sai. 14À Dii Yesu Kilisi ɔlɛsɛ. Ásu to á dàa zi lí dɔaaɛ́ à dɔɛ'ĩikɛo.

Currently Selected:

Lom 13: Boo2024

Highlight

Copy

Compare