Zĩn 9

Sɔlu nɔsɛlilɛa

1Gɔɔ bee sɔ̃ Sɔlu fɛ̃̀, àlɛ pɔbɔ a níu, àlɛ yãpãsĩ o Dii iwaɔ dɛdɛa yãmusu. À gɛ̀ sa'onkia kĩi, 2a gbɛ̀awà aà lakɛ̃ Damasi luasisikpɛdeɔnɛ aà kpawa, kɛ́ tó asu zɛ́pideɔ è we, gɔ̃ɛɔ ń nɔɛɔ pii, a ń kũkũ à suńnɔ Yelusalɛũ. 3Kɛ́ à dà zɛ́u, à kãikũ̀ ń Damasio, ɔ̃ kãndo gupua bɔ̀ luabɛ à kùlɛwà. 4À bɔ̀ lɛ̀lɛ, ɔ̃ à yã'o mà, wàlɛ oɛ̀: Sɔlu, Sɔlu, bɔyãi nlɛ ĩadaiai? 5Ɔ̃ à mɛ̀: Mmɛ ń déi Dii? Ɔ̃ a wèwà à mɛ̀: Ma Yesu, mamɛ nlɛ ĩadaa. 6Fɛlɛ ǹ gɛ̃ wɛ̃lɛ guu, wi yã pɔ ńyɔ̃ kɛ onɛ. 7Gbɛ̃́ pɔ aalɛ gɛ́aanɔɔ gɔ̃̀ sãii. Aa yã'opi mà, ãma aai gbɛ̃e eo. 8Kɛ́ Sɔlu fɛ̀lɛ, ɔ̃ à a wɛ́ wɛ̃̀, i gu'eo. Ɔ̃ wà aà kũ̀ a ɔwa, wà gɛ̀aanɔ Damasi. 9À kɛ̀ gɔɔ aaɔ̃ gu'esai, pɔblesai, imisai.

10Yesudee ku Damasi wì mɛ Anania. Dii yã'òɛ̀ wɛpungu'ea guu à mɛ̀: Anania. Ɔ̃ a wèwà à mɛ̀: Má kɛ́ Dii. 11Ɔ̃ Dii òɛ̀: Fɛlɛ ǹ gɛ́ zɛ́ pɔ wì mɛ Susu guu e Yuda bɛ'ua, ní Taasu gbɛ̃́ pɔ wì mɛ Sɔlu gbɛa. Àlɛ wabikɛa we. 12Wɛpungu'ea guu a è n mɔ n ɔnàwa kɛ́ a ɛa gu'e. 13Ɔ̃ Anania òɛ̀: Dii, má mà wà gbɛ̃́pi yã'ò dasi, lá à yãvãikɛ̀ n gbɛ̃́ pɔ ku Yelusalɛũɔnɛ. 14Sa'onkia aà gbà zɛ́ aà gbɛ̃́ pɔ aalɛ n sisi laɔ kũkũ. A yãi à mɔ̀i. 15Ɔ̃ Dii òɛ̀: Gɛ́, asa ma gbɛ̃́pi sɛ̀ aà gɛ́ ma tɔbɔi buipãleɔnɛ ń ń kiaɔ ń Isailiɔɛ. 16Lá a taasikɛ ma tɔbɔa yãi, má ɔlɔɛ̀. 17Ɔ̃ Anania bɔ̀, à gɛ̀ gɛ̃̀ uapiu, à ɔnà Sɔluwa à mɛ̀: Sɔlu ma gbɛ̃́, Dii Yesu pɔ bɔ̀ à mɔ̀ma zɛ́u gɔɔ pɔ nlɛ mɔ́ la mɛ́ ma zĩma, kɛ́ ǹ gu'e yãi, Lua Nisĩna i n pa. 18Wegɔ̃ɔ pɔɔ bɔ̀lɛ aà wɛ́u lan kpɔtɛɛɔwa aa kwɛ̀, ɔ̃ à gu'è. Ɔ̃ à fɛ̀lɛ da'ilɛkɛ̀. 19Kɛ́ à pɔblè, à gbãa è, ɔ̃ à gɔɔplakɛ̀ ń Yesude pɔ ku Damasiɔ.

Sɔlu waasokɛa Damasi ń Yelusalɛũo

20Ɔ̃ Sɔlu nà Yesu yã waasokpaawa gɔ̃̀ɔ Yudaɔ luasisikpɛɔ guu à mɛ̀, Yesu mɛ́ Lua Nɛ ũ. 21Yãpi bɔ̀ gbɛ̃́ pɔ màɔ saɛ aa mɛ̀: Gbɛ̃́ bee mɛ́ i gbɛ̃́pi sisinaɔ asookɛ Yelusalɛũo lò? I mɔ la à ń kũkũ à tańnɔ sa'onkiaɔ kĩio lò? 22Sɔlu sɔ̃, aà gbãa ìɔ kãfĩɛ, à Yesu Mɛsikɛyã bìiwànɛ́, ɔ̃ aà yã Yuda pɔ ku Damasiɔ fù.

23Gɔɔpla gbɛa Yudaɔ lɛkpàaĩaazi kɛ́ wà e wà aà dɛ, 24ɔ̃ à ń lɛkpaaĩapi mà. Aa wɛ̃lɛ bĩibɔlɛɔ dɔ̃̀a fãanɛ ń gwãasĩnao, kɛ́ aa e aa aà dɛ yãi. 25Gwãasĩna ɔ̃ Sɔlu gbɛ̃́ɔ aà dà gbiu, aa aà gbàɛ ń bao bàasi bĩ́i musu.

26Kɛ́ à kà Yelusalɛũ, a wɛ̀ɛlɛ à na Yesudeɔwa, ɔ̃ aa vĩakɛ̀ɛ̀ mpii, aalɛ aà Yesudekɛ naaikɛo. 27Ɔ̃ Baanaba aà sɛ̀ gɛ̀aanɔ zĩnaɔ kĩi, a dàu a sìunɛ́ lá Sɔlu Dii è zɛ́u ń yã pɔ Dii òɛ̀o ń lá à Yesu yã'ò gupuau Damasio. 28Ɔ̃ Sɔlu gɛ̃̀ Yesudeɔ guu, à bɛ̀bɛńnɔ Yelusalɛũ, à yã'ò gbɛ̃́ɔnɛ gupuau ń Dii tɔ́o. 29Kɛ́ à yã'ò Yuda gɛlɛkiyãmanaɔnɛ, à lɛkpaakɛ̀ńnɔ, ɔ̃ aalɛ aà wɛ. 30Kɛ́ Yesudeɔ dɔ̃̀, aa gɛ̀ zɛ̀ɛ̀ Sezale, ɔ̃ à tà Taasu.

31Bee gbɛa Yesudeɔ gɔ̃̀ dɔ̀dɔa Yude ń Galileo ń Samali busuo pii, aalɛ zɛdɔ, aalɛ gɛ́ aɛ vĩakɛa Diiɛ guu, aalɛ kãfĩ ń Lua Nisĩna dɔnlɛo.

Enɛ gbãgbãa ń Tabita vuao

32Piɛɛ ì bɛbɛ wɛ̃lɛ ń wɛ̃lɛo pii, ɔ̃ à gɛ̀ Lua gbɛ̃́ pɔ aa ku Lidaɔ gwai. 33À gɔ̃ɛ pɔ wì mɛ Enɛ è we, à kàaũ kalɛa e wɛ̃̀ swaaɔ̃. 34Ɔ̃ Piɛɛ òɛ̀: Enɛ, Yesu Kilisi lɛ́ n gbãgbã. Fɛlɛ ǹ n pɛ koo. Ɔ̃ à fɛ̀lɛ gɔ̃̀ɔ. 35Lidadeɔ ń Salɔnadeɔ aa aà è, ɔ̃ aa zɛ̀ ń Diio.

36Nɔɛ Yesudee ku Zope, aà tɔ́n Tabita. Ń gɛlɛkiyão sɔ̃ Dɔɔkasi. Bee mɛ̀ tue. Yãmaakɛa pɛ̀ɛwà mɛ́ ì wɛ̃nadɔ̃ gbɛ̃́ɔnɛ. 37Gɔɔ bee ɔ̃ à gyãkɛ̀ à gà. Kɛ́ wà aà bɔ̀ í pãsĩu, wà aà sɛ̀ wa wùlɛ kpɛdiakɔ̃au musu. 38Zope sɔ̃ a zã̀ ń Lidaoo. Kɛ́ Yesudeɔ mà Piɛɛ ku we, aa ń gbɛ̃ɔn plaɔ zĩ̀wà, aa wabikɛ̀wà aa mɛ̀: Mɔ wá bɛ kpakpa. 39Ɔ̃ Piɛɛ fɛ̀lɛ gɛ̀ńnɔ. Kɛ́ à kà, wà dɛ̀dɛaanɔ kpɛ́pi musu. Ɔ̃ gyaaɔ sɔ̃̀aazi mpii ń ɔɔlɔo, aa ula ń pɔkasa pɔ Tabita kɛ̀ gɔɔ pɔ a kuńnɔɔ ɔlɔ̀ɛ̀. 40Piɛɛ ń yá à ń bɔlɛ. À kùlɛ à wabikɛ̀, ɔ̃ à aɛdɔ̀ gɛpiwa à mɛ̀: Tabita fɛlɛ! Aà wɛ́ wɛ̃̀, à Piɛɛ è, ɔ̃ à fɛ̀lɛ zɔ̃̀lɛ. 41Piɛɛ aà kũ̀ a ɔwa, à aà fɛ̀lɛ a zɛ̀. Ɔ̃ à Lua gbɛ̃́piɔ sìsi ń gyaaɔ, ɔ̃ à aà kpàmá bɛ̃́ɛ. 42Yãpi lì Zopea pii, ɔ̃ wà Dii naaikɛ̀ we dasi. 43Piɛɛ gɔɔplakɛ̀ we Simɔ Baatotona bɛ.

Currently Selected:

Zĩn 9: Boo2024

Highlight

Copy