Zĩn 8

1Sɔlupi ku gbɛ̃́ pɔ aa Ɛtiɛ̃ dɛ̀ɔ kpɛɛ. Zĩ́ bee wà nà wɛtɛ̃a mɔa Yelusalɛũ Yesudeɔnɛwa pãsĩpãsĩ. Mɛ́ i kɛ zĩnaɔ baasio, gbɛ̃kĩniɔ fã̀aa piiɛ aa tà Yude ń Samali busuɔ guu. 2Luayãmanaeɔ Ɛtiɛ̃ vĩ̀, aa aà gaa ɔɔlɔ̀ ń wii gbãao. 3Ɔ̃ Sɔlupi ãiakɛ̀ ń Yesudeɔ kaalɛao. Ìɔ gɛ̃ ua ń uao àɔ gɔ̃ɛɔ ń nɔɛɔ kũkũ, iɔ ń galɛ à gɛ à ń ká kpɛ́u.

Baonakpaa Samali busuu

4Gbɛ̃́ pɔ fã̀aaɔ gɛ̀ aa Yesu baokpà gupiiu. 5Filipi gɛ̀ Samali mɛɛwiau, ɔ̃ à Mɛsi yã waasokɛ̀nɛ́. 6Kɛ́ bila Filipi yãmà mɛ́ aa dabudabu pɔ a kɛ̀ɔ è, aa laaidɔ̀ yã pɔ àlɛ owa ń nɔsɛmɛndoo. 7Asa gbɛ̃́ pɔ an tãaɔ gòmá ń wii gbãaoɔ dasi, mɛ́ ɛɛɔ ń kɔ̃̀ɔɔ gbã̀gbã dasi. 8Ɔ̃ wà pɔna zɔ̃ɔ kɛ̀ wɛ̃lɛpiu.

9Gɔ̃ɛe ku we za zi wì mɛ Simɔ, ìɔ ɛsɛdekɛkɛ, a yã ì bɔ Samalideɔ saɛ, ɔ̃ à azĩa dìlɛ gbɛ̃́ gbia ũ. 10Nɛfɛ̃nɛn gbɛ̃zɔ̃ɔ pii wì laaidɔ aà yãwa wì mɛ: Gbɛ̃́pi gbãaá Lua gbãa pɔ wì mɛ Gbãa Zɔ̃ɔɛ. 11Ɛsɛdekɛyã pɔ ìɔ kɛ ń guu à gɛ̃̀gɛ̃ à ń kṹ. 12Ãma kɛ́ aa kpala pɔ bɔ̀ Lua kĩi bao pɔ Filipi kpànɛ́ ń Yesu Kilisi tɔ́o mà, aa sì, ɔ̃ aa da'ilɛkɛ̀ gɔ̃ɛɔ ń nɔɛɔ pii. 13Baa Simɔpi yãpi sì, à da'ilɛkɛ̀, ɔ̃ à nà Filipiwa. Kɛ́ à dabudabu ń iko zɔ̃ɔ pɔ Filipi lɛ́ kɛɔ è, à bɔ̀ aà saɛ.

14Kɛ́ zĩnaɔ mà za Yelusalɛũ Samalideɔ Lua yãsì, aa Piɛɛ ń Zãao zĩ̀má. 15Kɛ́ aa kà we, aa wabikɛ̀nɛ́ kɛ́ aa Lua Nisĩna e yãi. 16Wà ń da'ilɛkɛ̀ ń Dii Yesu tɔ́o, ãma Lua Nisĩna i di an gbɛ̃eɛ yãao. 17Kɛ́ aa ɔnàmá, ɔ̃ Lua Nisĩna dìnɛ́ sa. 18Kɛ́ Simɔ è wà Lua Nisĩna è ń zĩnaɔ ɔnaamáo, ɔ̃ à mɔ̀nɛ́ ń ɔ̃ao 19à mɛ̀: À ma gba ikopi sɔ̃, kɛ́ gbɛ̃́ pɔ ma ɔnàwà, ade lí Lua Nisĩna e. 20Ɔ̃ Piɛɛ òɛ̀: N ɔ̃a kaalɛnnɔ, asa nlɛ e ńyɔ̃ Lua gba e ń ɔ̃aoɛ. 21N ɔ ku zĩpiuo, n bàa ku a guuo, asa n nɔ̀sɛ maa Luaɛo. 22Kpɛli n yãvãipiɛ, ní wabikɛ Diiwa. Wìliɔ dɔ̃o a gi suuukɛinnɔ ń n laasoo bee taaoa? 23Asa má è wɛdɔnɛde san n ũ, vãi bakã̀nɛ. 24Ɔ̃ Simɔ mɛ̀: À wabikɛmɛɛ Diiwa ázĩa, kɛ́ yã pɔ á ò su ma leo yãi.

25Kɛ́ Piɛɛ ń Zãao Dii seeladekɛkɛ̀ aa aà yã dànɛ́, ɔ̃ aa ɛ̀a aalɛ tá Yelusalɛũ, aalɛ baonakpa Samali busu wɛ̃lɛɔ guu dasi.

Filipi ń Etiopi gbɛ̃eo

26Dii malaikae yã'ò Filipiɛ à mɛ̀: Fɛlɛ ǹ gɛ́ gɛɔmidɔkĩi oi. Zɛ́ pɔ bɔ̀ Yelusalɛũ à pã̀ gbáaa à gɛ̀ Gaza sɛ́. 27Ɔ̃ à dà zɛ́u. Etiopi gbɛ̃e bɛ zɛ́piu. Etiopi busu nɔɛ kia pɔ wì mɛ Kandase ziiaɛ. Ɔ̃mɛ aà aizɛɛ dɔ̃anaɔ gbɛ̃zɔ̃ɔ ũ, ɔ̃ à mɔ̀ luasìsi Yelusalɛũ. 28Kɛ́ à ɛ̀a àlɛ tá a zɔ̃lɛa a sɔ̃gou, àlɛ ãnabi Isaia lá kyokɛ. 29Ɔ̃ Lua Nisĩna ò Filipiɛ: Gɛ ǹ na sɔ̃go keewa. 30Ɔ̃ Filipi baalɛ̀ gɛ̀. A mà àlɛ ãnabi Isaia lá kyokɛ, ɔ̃ à aà là à mɛ̀: Ń kyo pɔ nlɛ kɛ bɔɔlɛ dɔ̃a? 31A wèwà à mɛ̀: Tó gbɛ̃e i a zɛ́ ɔlɔmɛɛo, kpelewa má fɔ̃ mà dɔ̃i? Ɔ̃ à Filipi sìsi, à gɛ̃̀ zɔ̃̀lɛ aà saɛ. 32Yã pɔ àlɛ a kyokɛpin kɛ:

Lan sã pɔ wàlɛ gɛ́ a kolokpaiwa,

lan sã pɔ wàlɛ a kãkɛ̃ɛlɛwa,

a nilɛ kpɛ̃́, i a lɛ́ wɛ̃aao.

33Wà widàwà,

wi yãkpalɛkɛaanɔ a zɛ́wao.

Demɛ a aà gɔɔdeɔ yã'oi?

Asa wà aà kua dũniau midɛ̀ɛ.#Isa 53.7-8

34Ɔ̃ gɔ̃ɛpi ò Filipiɛ: Omɛɛ, dé musu ãnabipi yãpi òui? Aazĩa yã yã̀ ge gbɛ̃pãle yãɛ? 35Ɔ̃ daalɛa Lua yãpiwa Filipi Yesu baokpàɛ̀. 36Kɛ́ aalɛ gɛ́ aɛ, aa kà í kĩi, ɔ̃ gɔ̃ɛpi mɛ̀: Í gwa kɛ. Bɔmɛ a kpamɛɛ mà da'ilɛkɛi? 37Ɔ̃ Filipi òɛ̀: Tó n yãpi sì ń nɔsɛmɛndooɛ, ńyɔ̃ fɔ̃́. A wèwà à mɛ̀: Má sì Yesu Kilisiá Lua Nɛɛ. 38Ɔ̃ à mɛ̀ wà sɔ̃go zɛ. Ɔ̃ ampla mpii aa pìla aa gɛ̃̀ íu. Ɔ̃ à aà da'ilɛkɛ̀. 39Kɛ́ aa bùa sĩsĩa, ɔ̃ Dii Nisĩna Filipi kpàɛ̀ gui, gɔ̃ɛpi i aà e lɔo, ɔ̃ pɔna guu à gɛ̃̀zɛa. 40Filipi è á ku Azota, ɔ̃ à gɛ̀, à Yesu baokpà wɛ̃lɛ ń wɛ̃lɛo e à gɛ̀ kàò Sezale.

Currently Selected:

Zĩn 8: Boo2024

Highlight

Copy