Zĩn 7

Ɛtiɛ̃ yã'oa gbãadeɔnɛ

1Ɔ̃ sa'onkia Ɛtiɛ̃ là à mɛ̀: N yãpi ò sĩana yã? 2Ɔ̃ a wèwà à mɛ̀: Ma gbɛ̃́ɔ ń ma maeɔ, à ma! Lua gawide bɔ̀ à mɔ̀ wá dezi sɛ̃ia Ablahaũwa gɔɔ pɔ a ku Mɛsɔpɔtami busuu, zadɔ̃ i gɛ́ zɔ̃lɛi Halanao. 3A òɛ̀: Bɔ n busuu n daɛɔ guu, ní ta busu pɔ má ɔlɔnɛu.#Daa 12.1 4Ɔ̃ à bɔ̀ Kaladeɔ busupiu, à gɛ̀ zɔ̃̀lɛ Halana. Aà mae gaa gbɛa Lua sùaanɔ busu pɔ á kuu tiaɛ bee guu.#Daa 11.31, 12.4 5Lua i busupi tɔɔlɛe kpawà baa kɛsɛ doo, ãma à a lɛgbɛ̃̀ɛ̀, à mɛ̀ a gɔ̃ aà pɔ ũ ń aà buiɔ.#Daa 15.18, 17.8 Gɔɔ bee sɔ̃ Ablahaũ nɛ vĩo. 6Lua òɛ̀ à mɛ̀: N buiɔ nibɔble busu pãleu. We aa zɔbleu, wi ĩadamá wɛ̃̀ ɔaa pla. 7Lua mɛ̀ á ĩada bui pɔ aa zɔblenɛ́ɔwa,#Daa 15.13-14 Ablahaũ buipiɔ bɔlɛ aa mɔ a sisii guɛ beeu.#Bɔa 3.12 8Ɔ̃ Lua tɔ̃zɔ̃yã dà Ablahaũɛ a baakuaaanɔ seela ũ.#Daa 17.10-14, 21.4 Kɛ́ à Izaaki ì, à tɔ̃zɔ̃̀ɛ̀ a gɔɔ swaaɔ̃dezĩ. Màa Izaaki kɛ̀ Yakɔbuɛ lɔ, ɔ̃ Yakɔbu kɛ̀ wá dezikaau gbɛ̃ɔn kuɛplaɔnɛ.

9Ɔ̃ wá dezikaaupiɔ wɛdɔ̀ ń gbɛ̃do Yosɛfuɛ, aa aà yìa, wà tàaanɔ Egipi. Lua kuaanɔ,#Daa 37.28, 39.21 10à aà bɔ̀ aà taasi guu pii. Lua aà gbà ɔ̃nɔ, a tò à kɛ̀ na ń Egipiɔ ki Falaɔ̃o, ɔ̃ à aà dìlɛ Egipi busu dɔaana ũ ń a bɛ'uao.#Daa 41.39-41 11Ɔ̃ nɔana kà Egipi ń Kanaa busuo pii. Taasi kɛ̀ zɔ̃ɔ, wá dezipiɔ i pɔe e wa blèo. 12Kɛ́ Yakɔbu mà ese ku Egipi, à wá dezipiɔ zĩ̀ we. An gɛa sɛ̃ian we.#Daa 42.1-2 13A gɛ̃n plaade Yosɛfu azĩa ɔlɔ̀ a vĩiɔnɛ, ɔ̃ Falaɔ̃ Yosɛfu daɛɔ dɔ̃̀.#Daa 45.1 14Ɔ̃ Yosɛfu gbɛ̃́ zĩ̀ a mae Yakɔbuwa aà mɔ ń a daɛɔ pii. Ampii aa gbɛ̃ɔn basiiɔ̃ sɔosaiɛ. 15Ɔ̃ Yakɔbu gɛ̀ Egipi. À gà we ń wá dezipiɔ pii.#Daa 46.1-7, 49.33 16Wà sù ń ń gɛɔ Sikɛũ, ɔ̃ wà ń vĩ́ gbɛ'ɛ pɔ Ablahaũ lù Hamɔɔ nɛɔwa mia ũ à fĩabò ń ãnusuo guu.#Daa 23.3-16, 50.7-13; Yoz 24.32

17Kɛ́ lɛ́ pɔ Lua gbɛ̃̀ Ablahaũɛ kɛgɔɔ ye kai, wá bui dasikũ̀ à kã̀fĩ Egipi maamaa. 18Ɔ̃ kia dafu pɔ Yosɛfu dɔ̃o zɔ̃̀lɛ kpalau Egipi.#Bɔa 1.7-8 19A pãsĩ ń wá buiɔ, à wá deziɔ wɛtã̀, a tò aa ń nɛɔ kɔ̀lɛ aa gàga.#Bɔa 1.10-11, 22 20Gɔɔ bee ɔ̃ wà Mɔizi ì, aà maa kɛ̀ zai. Wà aà gwà a mae bɛ mɔ aaɔ̃ɛ. 21Kɛ́ wà aà vũ̀aa, ɔ̃ Falaɔ̃ nɛnɔɛ aà kɔ̃mpa, à aà gwà azĩa nɛ ũ.#Bɔa 2.2-10 22Wà Egipiɔ ɔ̃nɔ dàda Mɔiziɛ pii, à gɔ̃̀ gbɛ̃zɔ̃ɔ ũ yã'oa ń yãkɛao guu.

23Kɛ́ à kà wɛ̃̀ bla, a dà a sɔ̃u à gɛ́ a gbɛ̃́ Isailiɔ gwai. 24Kɛ́ a è Egipi gbɛ̃́ lɛ́ ĩada Isailiwa, ɔ̃ à yãsì ń a gbɛ̃́o, à tɔsìɛ̀, à aà dɛ̀. 25Àlɛ e a gbɛ̃́ɔ dɔ̃ kɛ́ Lua ye à ń suaba a sabaiɛ, ãma aai dɔ̃o. 26Kɛ́ a gu dɔ̀ gbɛ̃ɔn plaɔ lɛ́ solekɛ, ɔ̃ à mɔ̀ ń yoaai, à awakpànɛ́ à mɛ̀: Ma gbɛ̃́ɔ, bɔyãi álɛ ĩadakɔ̃wa kɔ̃tɛ̃ɛi? 27Ɔ̃ gbɛ̃́ pɔ lɛ́ ĩada a gbɛ̃dowa ɔzɔ̃̀ Mɔizizi à mɛ̀: Demɛ n kpa kia ũ, ɔ̃ nlɛ yãgɔ̃gɔ̃wɛ̃ɛi? 28Ń ye ǹ ma dɛ lá n Egipi gbɛ̃́ dɛ̀ gĩawa yã? 29Kɛ́ Mɔizi yãpi mà, à baalɛ̀ tà Madiã busuu.#Bɔa 2.11-15 We à nɛgɔ̃ɛɔ ìu gbɛ̃ɔn pla.#Bɔa 18.3-4

30Wɛ̃̀ bla gbɛa ɔ̃ malaika bɔ̀ à mɔ̀wà gbáau Sinai gbɛ saɛ lɛlau tɛ́ guu. 31Kɛ́ Mɔizi dabu bee è, à bɔ̀ aà saɛ. Kɛ́ à sɔ̃̀i gwai, a mà Dii yã'o à mɛ̀: 32Mamɛ má n deziɔ Ablahaũ ń Izaakio ń Yakɔbuo Lua ũ. Vĩa Mɔizi kũ̀, àlɛ lualua, i fɔ̃ wɛsɛ a gwào. 33Ɔ̃ Dii òɛ̀: Ǹ n kyale bɔbɔ, asa gu pɔ ń zɛu kua adoaɛ. 34Ma wɛtɛ̃a pɔ wàlɛ mɔ ma gbɛ̃́ pɔ ku Egipiɔnɛ è sãasã, ma ń aaukɛa mà, ɔ̃ ma mɔ ń boi. Má n zĩ Egipi sa.#Bɔa 3.1-10 35Mɔizi pɔ aa gìɛ̀ yãa aa mɛ̀, demɛ aà dìlɛ kia ũ aà yãgɔ̃gɔ̃nɛ́ipi#Bɔa 2.14 ɔ̃ Lua aà zĩ̀ à dɔaanɛ́ à ń misi malaika pɔ bɔ̀ à mɔ̀wà lɛlau sabai. 36Aapi mɛ́ bɔ̀ńnɔ, à yãbɔnsaɛɔ ń dabudabuɔ kɛ̀ Egipi ń Isiatɛ̃ao ń gbáa guuo wɛ̃̀ bla.#Bɔa 7.3, 14.21; Nao 14.33 37Mɔizipi ò Isailiɔnɛ Lua a ń gbɛ̃e sɛ ãnabi ũ láawa.#Iko 18.15-18 38Mɔizipi ku ń gbɛ̃́ pɔ kãaaapiɔ gbáau, a ku we ń wá deziɔ ń malaika pɔ yã'òɛ̀ Sinai gbɛ musuo. Lua yã wɛ̃nideɔ kpàwà, ɔ̃ a dàwɛ̃ɛ.#Bɔa 19.18-20

39Wá deziɔ gì aà yãmai, ɔ̃ aa gìaazi, an laasoo tà Egipi. 40Aa ò Aalonaɛ aa mɛ̀: Diieɔ kɛwɛ̃ɛ aa dɔaawɛ̃ɛ, asa Mɔizi pɔ wá bɔlɛ Egipi, wá dɔ̃ bɔ́ à bɔ̀lɛ a ũo. 41Gɔɔ bee aa tãa pì lan gaaewa, ɔ̃ aa sa'òwà, aa dikpɛkɛ̀ pɔ pɔ aa kɛ̀ ńzĩaɛpiɛ.#Bɔa 32.1-6 42Ɔ̃ Lua kpɛlìnɛ́, a tò aa kùlɛ musupɔɔnɛ lá wa kɛ̃̀ ãnabiɔ láuwa à mɛ̀:

Isailiɔ, i kɛ mamɛ a sa'òa gbáau wɛ̃̀ blao.

43Tãa Mɔlɔku zwãakpɛ ɔ̃ á sɛa

ń saana Lamfã pɔ a zɛò taao.

Dii pɔ á pì a kulɛnɛ́ɔ yãi

ɔ̃ má to wà taánɔ Babiloni kpɛle.#Amɔ 5.25-27

44Wá deziɔ zwãakpɛ vĩ gbáau. Lua a taa ɔlɔ̀ Mɔiziɛ, ɔ̃ wa kɛ̀ lá Lua òɛ̀wa.#Bɔa 25.9, 40.17 45Kpɛ́pi gɔ̃̀ Yozueɛ ń wá deziɔ, ɔ̃ aa mɔ̀ aa buipãle pɔ Lua ń yánɛ́ɔ busu sìòmá.#Yoz 3.14-17 Kpɛ́pi ku we e Davidi gɔɔ. 46Davidi na ń Luao, ɔ̃ à wabikɛ̀wà à e kpɛdɔ Yakɔbu Luaɛ. 47Salomɔ mɛ́ kpɛ́pi dɔ̀ɛ̀.#1 Kia 6.1-38 48Ãma Musude líɔ ku kpɛ́ pɔ gbɛ̃nazĩnaɔ dɔ̀ guuo, lá ãnabi òwà: 49Dii mɛ̀:

Musuá ma kpalabaaɛ,

tɔɔlɛá ma gbadibɔɛ.

Kpɛ́ kpeletaa á dɔmɛɛi?

Gu kpele má e mà pilaui?

50Mamɛ mi pɔpii kɛo lò?#Isa 66.1-2

51Luayãdansaiɔn á ũ! Á nɔ̀sɛ paaao! Á swã gbãaɛ! Iɔ gi Lua Nisĩnai, iɔ kɛ lá á deziɔwa.#Isa 63.10 52Ãnabi kpele á deziɔ i a wɛtão ni? Gbɛ̃́ pɔ dɔ̀aa wà Gbɛ̃maa mɔa yã'òɔ aa ń dɛdɛ̀. Aapi ɔ̃ a bɔ aà kpɛ a aà dɛ̀ sa. 53A Lua ikoyã pɔ malaikaɔ ònɛ́ mà, ãma á kũao.

Ɛtiɛ̃ gaa

54Kɛ́ aa yãpi mà, an pɔ fɛ̃̀aazi, aa lɛsakã̀aazi. 55Ɛtiɛ̃ paa ń Lua Nisĩnao ɔ̃ à wɛbìi musuwa, ɔ̃ à Lua gawi è ń Yesuo zɛa aà ɔplaai. 56Ɔ̃ à mɛ̀: À ma! Ma luabɛ è wɛ̃a, Gbɛ̃nazĩn Nɛ zɛa Lua ɔplaai. 57Ɔ̃ aa ɔtà ń swãlɛ aa wii gbãa lɛ̀, ɔ̃ aa kùsiwà sãnusãnu. 58Aa aà gàlɛ wà bɔ̀ò wɛ̃nkpɛ, ɔ̃ aalɛ aà papa ń gbɛo wà dɛ. Aa ń uladaɔ bɔ̀ wa kàlɛ ń ɛwaaso pɔ wì mɛ Sɔluo. 59Kɛ́ aalɛ Ɛtiɛ̃ papa ń gbɛo, à wabikɛ̀ à mɛ̀: Dii Yesu, ma nisĩna sí. 60Ɔ̃ à kùlɛ à wii gbãa lɛ̀ à mɛ̀: Dii, nsu ǹ ń duunaɛ bee dao. Yãpi oa gbɛa ɔ̃ à gà.

Currently Selected:

Zĩn 7: Boo2024

Highlight

Copy