Zĩn 6

Dɔnlɛde gbɛ̃ɔn soplaɔ dilɛa

1Gɔɔ bee kɛ́ Yesudeɔ lɛ́ kãfĩ, an gɛlɛkiyãmanaɔ lɛ́ yãkũtɛ̃ka an hɛbɛluyãmanaɔzi aa mɛ̀, tó wàlɛ blɛ kpaalɛ lagulɛdɔ, wì pãkpa ń gyaaɔziɛ. 2Ɔ̃ zĩna gbɛ̃ɔn kuɛplaɔ Yesudeɔ sìsi pii aa mɛ̀: A zɛ́ vĩ wà pãkpa Lua yãi wà laaidɔ blɛkpaalɛawao. 3À gɔ̃ɛɔ plɛ á guu gbɛ̃ɔn sopla, gbɛ̃maa pɔ ɔ̃nɔ pànɛ́ mɛ́ aa paa ń Lua Nisĩnaoɔ, wí ń dilɛ zĩpi gbɛ̃zɔ̃ɔɔ ũ, 4wí laaidɔ wabikɛawa ń Lua yã'oanɛ́o. 5Yãpi kàńgu mpii, ɔ̃ aa Ɛtiɛ̃ pɔ Lua naai vĩ mɛ́ a paa ń Lua Nisĩnao sɛ̀ ń Filipio ń Pɔlɔkɔɔo ń Nikanɔɔo ń Timɔo ń Paamɛnao ń Antiɔsi gbɛ̃́ Nikola pɔ Yudaɔ zɛ́ sɛ̀ yãao. 6Wà gɛ̀ńnɔ zĩnaɔ kĩi, ɔ̃ aa wabikɛ̀nɛ́ ń ɔnaamáo.

7Lua yã lɛ́ ligua, Yesudeɔ lɛ́ kãfĩ Yelusalɛũ maamaa, ɔ̃ sa'onaɔ Yesu yãsì dasidasi.

8Gbɛ̃kɛ ń gbãao pɛ̀ɛ́ Ɛtiɛ̃wa, ɔ̃ àlɛ dabudabuɔ ń yãbɔnsaɛɔ kɛ bila guu. 9Luasisikpɛe ku wì mɛ Wɛ̃ɛɔ luasisikpɛ. A gbɛ̃eɔ bɔ̀ Silɛni ń Alɛsãndio ń Silisi busuo ń Azi busuo. Ɔ̃ aa ibɛlɛsɛ̀ ń Ɛtiɛ̃o, aa lɛkpaakɛ̀aanɔ. 10Ãma aai fɔ̃ aa aà fùo ɔ̃nɔ pɔ Lua Nisĩna aà gbà yãi. 11Aa nà gbɛ̃́ɔ kpɛ, ɔ̃ gbɛ̃́piɔ mɛ̀: Wá mà, à bɔ̀ Mɔizi ń Luao yã kpɛ. 12Aa Yudaɔ ń ń gbɛ̃zɔ̃ɔɔ ń Mɔizi ikoyãdanɛdeɔ nɔ̀sɛ fɛ̀lɛ, ɔ̃ aa gɛ̀ Ɛtiɛ̃ kũ̀, aa gɛ̀aanɔ ń gbãadeɔ kĩi. 13Ɔ̃ aa mɔ̀ ń seelade ɛgɛnaɔ aa mɛ̀: Gbɛ̃́ɛ bee mɛ́ ìɔ luakpɛ ń Mɔizi ikoyão bɛ̃ɛbo laasai. 14Asa wá mà, à mɛ̀ Yesu Nazalɛti a kpɛ́pi dɛɛlɛ, i wá fɛlɛkaayã pɔ Mɔizi dàwɛ̃ɛ lilɛ sɛ́. 15Ɔ̃ gbãade pɔ kàlɛ weɔ wɛpɛ̀ Ɛtiɛ̃wa mpii, aa è aà oa dɛ lan malaika oawa.

Currently Selected:

Zĩn 6: Boo2024

Highlight

Copy